Chapletajic 44 - Quiché Bible

Ri u kumubal ri Jose re sak puak

¹ Ri Jose xuya' u takquil ri u tako'n, xubij che: “Chanojisaj ri qui coxtar we achijab ri' che trico, joropa' ri cäquich'ij bic, xukuje' chaya' bic ri qui rajil puwi' tak ri qui coxtar chquijujunal.

² Are c'u ri nu kumubal re sak puak, chaya' bic puwi' ri u coxtar ri chak'axel junam ruc' ri rajil ri u trico.” Ri tako'n xuban ronojel ri xubij ri Jose che.

³ Xuwi xca'y ri k'ij, ri Jose xebujach bic ri rachalal xequic'am bic ri qui bur.

⁴ C'ä maja' c'u naj e benak, c'ä te' e c'o apan tza'm ja aretak ri Jose xubij che ri u tako'n: “Jät aninak che qui rikic we achijab ri'. Chabij c'u chque aretak quebarika': ‘¿Jasche xiban jun etzelal che u tojic u q'uexel ri utzil? ¿Jasche xiweläk'aj ulok ri lak re sak puak

⁵ ri cuq'uian wi ri wajaw, ri xukuje' cäch'obon wi? Sibalaj man utz taj ri xibano.’ ”

⁶ Aretak xeberik rumal ri tako'n, xebubij we junam tak tzij ri' chque,

⁷ xquibij c'ut ri rachalal ri Jose che: “¿Jasche je cabij la wa' chke? Mawi jubik' je ta cäkaban wa'.

⁸ Xkac'am chi ne na ulok jumul ri puak ri xekarik puwi' tak ri ka coxtar, ¿jas ta c'u che cäkeläk'aj ulok k'an puak o sak puak pa ri rachoch ri ajaw la?

⁹ ¡Chcämok apachique chque we pataninel tak ech la ri' ri cäriktaj wi ri kumubal, xukuje' c'u ne ri uj cujcanaj can che lok'om pataninelab la!”

¹⁰ Xubij c'ut ri tako'n: “Je' cäbanic jacha' ri quibij, xuwi c'u jachin ruc' cäriktaj wi ri eläk'am ulok, cäcanaj che nu lok'om pataninel. Are c'u ri niq'uiaj man c'o ta qui mac.”

¹¹ Chquijujunal c'ut xequikasaxtaj ri qui coxtar cho ri ulew xquijak c'ut.

¹² Ri tako'n xutzucuj pa tak ri coxtar, xuchaplej ruc' ri nabeal. Xuq'uisa' c'ä ruc' ri q'uisbal qui chak'. Xurik c'u ri lak kumubal chupam ri u coxtar ri Benjamin.

¹³ Xquijis ri catz'iak chquij rumal ri qui bis. Conojel xequiq'uiak ri queka'n ri qui bur. Xetzelej chi jumul pa ri tinimit.

¹⁴ Aretak xopan ri Juda xukuje' conojel ri rachalal cho rachoch ri Jose, ri Jose c'ä c'o chila'. Xquimej quib, xexuquic. C'ä xequiya' na ri qui palaj cho ri ulew.

¹⁵ Ri Jose xubij chque: “¿Jas ri i banom? ¿La ma ta iweta'm chi jun achi jas ri in reta'm cäch'obonic?”

¹⁶ Ri Juda xubij che ri Jose: “¿Jas ta ba' ri cäkabij chic che la? ¿Jas ta chic ri cäkatobej kib? Uj u rikom ri Dios pa ri ka mac. Uj c'olic ri', chujcojo' la che lok'om tak pataninel la, junam ruc' ri xriktaj wi ri lak.”

¹⁷ Ri Jose xubij chque: “Man cuya' taj. Xuwi ri xriktaj wi ri lak are wa' ri cäcanaj can che nu lok'om pataninel. Ri niq'uiaj chic cuya' quetzelej ruc' quicotemal cho rachoch ri qui tat man c'o ta cäyo'w latz' chque.”

Ri Juda xch'aw puwi' ri Benjamin

¹⁸ Ri Juda xoc chuwäch ri Jose, xubij che: “Quinwaj quinbij quieb oxib tzij che la. Bana' la jun tok'ob mäpe oyowal la chwe, ri lal xak junam k'ij la ruc' ri ajawinel.

¹⁹ Ri lal xata' la chke we c'asal ri ka tat xukuje' we c'ä c'o na jun kachalal,

²⁰ are c'u ri uj xkatzelej u bixic che la chi c'asal ri ka tat ri nim winak chic xukuje' jun ka chak' ri c'ä ac'al na ri xralc'ualaj pa ri u ri'jil. Ri rachalal we ala ri' xcämic xuwi ri are' xc'asi' canok ri xak junam qui nan ruc', rumal ri' sibalaj lok' chuwäch ri ka tat.

²¹ Ri lal xbij la chke chi cäkac'am ulok, rech quetamaj la u wäch.

²² Ri uj xkabij che la chi we ala ri' man cuya' taj cuya' can ri u tat. We c'u cuya' canok cäcäm ri u tat che bis.

²³ Ri lal xbij la chke chi we man cäkac'am ulok we ala ri', man cujc'ulaj ta chi la.

²⁴ Aretak xujopan cho ja, xkatzijoj che ri nu tat ronojel ri xbij la chke.

²⁵ Aretak c'u xq'uis ri ka trico, ri ka tat xubij chke chi cujpe chi jumul pa Ejipt che u lok'ic ka trico.

²⁶ Ri uj xkabij che ri ka tat: ‘Man cuya' taj cujbec we man cäbe ri q'uisbal ka chak' kuc'. Man cujc'ulax ta ri' rumal ri tata' we man benak ri ka chak' kuc'.’

²⁷ Ri nu tat xubij chke: ‘Ix iweta'm chi ri wixokil, xa e quieb ral xec'ojic;

²⁸ ri jun xsachic, mawi jumul wilom chi u wäch c'ä camic, quinchomaj chi xtijow rumal jun juyubal awaj.

²⁹ We c'u quiwesaj chi bic we jun ri' chnuwäch, we c'u ne c'o jas cuc'ulmaj canok, ix ri' c'o i mac chi we nim winak ri' cäcäm na rumal bis.’

³⁰ Sibalaj c'u ranima' rib ri nu tat ruc' ri ala. We c'u man kachil ri ala aretak cujopanic,

³¹ cäcäm ba' ri' ri ka tat we man cäril u wäch ri ala ri', cujux ajchak'mac chi ri ka tat ri nim winak cäcäm na rumal bis.

³² Xinbij c'u can che chi in quintaq'ui' puwi' ri ala, xukuje' xinbij can che: ‘We man quelentzelej ri ala, quincanaj ajchak'mac chwäch la chbe k'ij sak.’

³³ Quinta' c'u jun tok'ob che la chi in quincanaj che lok'om pataninel la, che u q'uexwäch ri ala. Tzokopij la bic ri ala rech cabe cuc' ri rachalal.

³⁴ ¿Jas ta c'u nu palaj quinc'utu' ta wib chuwäch ri nu tat, we ta ma ta wachilam bic ri ala? Man quinwaj taj quinwil ri lawaloyil ri cucoch' ta na ri nu tat.”