Chapletajic 39 - Quiché Bible

Ri Jose xukuje' ri rixokil ri Potipar

¹ Aretak xc'am bic ri Jose pa Ejipt, jun achi aj Ejipt Potipar u bi' xlok'ow chque ri aj ismaelib ri xec'amow bic chila'. Ri Potipar are jun rach k'atal tzij ri paraon, ri ajawinel pa Ejipt, c'amal qui be ri ajch'ojab.

² C'o c'ut ri Ajawaxel ruc' ri Jose, rumal ri' ronojel ri cubano, utz quel chuwäch aretak xc'oji' pa rachoch ri aj Ejipt.

³ Ri Potipar xuch'obo chi ri Ajawaxel ri c'o ruc' ri Jose are cäbanowic chi ronojel ri cubano, utz quelic.

⁴ Are c'u xbanow wa' chi ri Potipar sibalaj utz xril wi ri Jose, xucoj c'u che takanel puwi' ronojel ri rachoch xukuje' paquiwi' conojel ri jastak rech.

⁵ Kas pa ri k'ij aretak ri Potipar xujach ri takanic pa u k'ab ri Jose puwi' ri rachoch xukuje' ronojel ri jastak rech, ri Ajawaxel xutewichi'j ri Potipar, pa ri rachoch jacha' xukuje' pa ri rulew.

⁶ Aretak ronojel chic c'o pa u k'ab ri Jose, ri Potipar man c'o ta jas coc chi wi il, xa ne xuwi ri wa'im. Sibalaj c'u je'l cäca'y ri Jose, sibalaj rayibal u wäch,

⁷ xurika' c'u jun k'ij aretak ri rixokil ri Potipar xbe ranima' ruc' ri Jose, xubij che: “Chatwar wuc'.”

⁸ Man xraj taj ri Jose, xutzelej c'u u bixic che: “Chilampe la, ri wajaw u jachom ronojel ri jastak rech pa nu k'ab, man c'o ta chi jas coc wi il pa ri rachoch.

⁹ Chupam we ja ri' man c'o ta jun ri c'o ta na u takanic chnuwäch; ri wajaw man c'o ta ri ma ta u jachom pa nu k'ab xane' xak xuwi ri lal, lal c'ut ri rixokil; je c'u ri' ¿jas ta che quinban jun jasach ri sibalaj lawalo, quinmacun ta c'u chuwäch ri Dios?”

¹⁰ Pune' ri ixok sibalaj xucoj u chuk'ab che ri Jose ronojel k'ij rech cak'oyi' ta ruc' cac'oji' ta c'u pa u xcut, ri are' man xuc'ulaj ta u wäch u tzij.

¹¹ Xurika' jun k'ij aretak xoc ri Jose pa ja che u banic ri u patan, man c'o ta c'u apan jun winak,

¹² xpe ri ixok xuchap ri Jose che ri ratz'iak, xubij c'u che: “Chatk'oyol wuc'.” Xutokij rib ri Jose, xanimajic xuya' can ri ratz'iak pa u k'ab ri ixok.

¹³ Aretak xril ri ixok chi xanimaj ri Jose, chi xuya' can ri ratz'iak pa u k'ab,

¹⁴ xurak u chi', xebusiq'uij ri quepatanin pa ri ja, xubij c'u chque: “Chiwilampe', ri wachajil xucoj ulok jun aj hebrey waral ri xa cäretz'bej ka wäch. Xoc pa ri nu warbal, are ta xraj xk'oyi' ta wuc', co c'ut xinrak nu chi';

¹⁵ aretak c'u xinuto chi xinrak nu chi' ruc' ronojel ri nu chuk'ab caxiq'uinic xel bic xuya' c'u ne can ri ratz'iak waral.”

¹⁶ Xuc'olo c'ut ri ratz'iak ri Jose c'ä xopan na ri rajaw cho ja.

¹⁷ Junam c'u u bixic xubij che: “Ri lok'om pataninel aj hebrey ri xacoj ulok pa kachoch, xoc pa ri nu warbal are ta xraj xresaj nu q'uixbal.

¹⁸ Aretak xuto chi xinrakakej nu chi', xanimajic xuya' can ri ratz'iak pa nu k'ab.

¹⁹ Jewa' xuban ri a lok'om pataninel awech chwe.” Ri rajaw ri Jose sibalaj xoyowaric aretak xuta' ri cätajin cäbix che rumal ri rixokil.

²⁰ Xuchap c'u ri Jose, xtakanic chi chcoj pa che' jawije' e c'o wi jujun ri e cojom pa che' rumal ri ajawinel. Pune' c'u c'o ri Jose pa che',

²¹ ri Ajawaxel xutakej c'olem ruc' ri Jose xuc'ut c'u ri rutzil chuwäch, xuban c'ut chi utz xil rumal ri takanel pa ri che'.

²² Ri xebuya' c'u can conojel ri ajpache' pa u k'ab, ri Jose are' cäyo'w ri takanic che ronojel ri cäban chila'.

²³ Ri takanel paquiwi' ri e c'o pa che' man c'o ta jas cusolij che ri jachom pa u k'ab ri Jose, rumal rech chi c'o ri Ajawaxel ruc' cuban c'ut chi ronojel utz quel chuwäch.