Chapletajic 36 - Quiché Bible

Ri e rija'lil ri Esau

¹ E are wa' ri e rija'lil ri Esau ri cäbix Edom che.

² Ri Esau xc'uli' cuc' alitomab aj cananeyib: ri Ada u mia'l ri Elon ri aj hititib; ri Aholibam u mia'l ri Ana ri' u mam ri Zibeon ri aj hebey;

³ xukuje' xc'uli' ruc' ri Basemat u mia'l ri Ismael, rana'b ri Nebaiot.

⁴ Ri alc'ualaxel ri xuya' ri Ada che ri Esau are' ri Elipaz; ri Basemat xralaj ri Reuel;

⁵ ri Aholibam xralaj ri Jeus, ri Jaalam, ri Core. E are wa' ri u c'ojol ri Esau ri xebalaxic aretak xc'oji' pa ri ulew re Canaan.

⁶ Ri Esau xebuca'm bic ri rixokil, ri e u c'ojol, ri e u mia'l, conojel ri winak ri e jekel ruc', ri rawaj, xukuje' ronojel ri xuch'äc pa Canaan; xbe chi pa jun c'olbal che u tasic rib chrij ri Jacob ri u chak',

⁷ ri Jacob, ri Esau sibalaj c'u q'ui ri jastak quech ri c'olic, man cuya' ta c'ut quec'oji' junam; man cubana' ta ri k'ayes ri c'o chila' che qui tzukic ri cawaj.

⁸ Ri Esau ri cäbix Edom che, xejekel pa ri c'ache'laj ulew re Seir.

⁹ E are wa' ri e rija'lil ri Esau e qui mam ri aj Edom ri xec'oji' pa ri c'ache'laj ulew re Seir.

¹⁰ E are wa' ri qui bi' ri u c'ojol ri Esau: ri Elipaz, ral ri Ada ruc' ri Esau; ri Reuel, ral ri Basemat ruc' ri Esau.

¹¹ Ri e u c'ojol ri Elipaz e are wa': ri Teman, ri Omar, ri Zep, ri C'atam, xukuje' ri Senaz.

¹² Ri Elipaz xc'oji' jun ixok ruc', ri man kas ta rixokil, Timna u bi', ri are' xralaj jun u c'ojol ri xcoj Amalec che u bi'. E are tak wa' ri e rija'lil ri Ada jun chque ri rixokil ri Esau.

¹³ Ri Nahat, ri Zera, ri Sam, ri Miz, e are wa' ri e u c'ojol ri Reuel ri e rija'lil ri Basemat ri jun chic chque ri e rixokil ri Esau.

¹⁴ Ri Aholibam are jun rixokil chic ri Esau, ri ral ri xec'ojic e are' ri Jeus, ri Jaalam, ri Core. Ri Aholibam ri are u mia'l ri Ana, ri' u mam ri Zibeon.

¹⁵ Ri e c'amal tak be chque ri e rija'lil ri Esau, e are wa': Ri e c'amal tak be chque ri e rija'lil ri Elipaz u nabeal ri Esau, e are ri Teman, ri Omar, ri Zep, ri Senaz,

¹⁶ ri Core, ri C'atam, ri Amalec. E are wa' ri e c'amal tak be ri xebel chquixo'l ri e rija'lil ri Elipaz pa ri ulew re Edom, conojel tak wa' e rija'lil ri Ada.

¹⁷ Chque ri e u c'ojol ri Reuel, u c'ojol ri Esau, ri e c'amal tak be e are tak wa' ri Nahat, ri Zera, ri Sam, xukuje' ri Miz. E are' wa' ri e c'amal tak be ri e rija'l ri Reuel, chupam ri ulew re Edom, e rija'lil c'ut ri Basemat rixokil ri Esau.

¹⁸ Ri c'amal tak be chque ri ral ri Aholibam rixokil ri Esau ri u mia'l ri Ana, e are ri Jeus, ri Jaalam, ri Core.

¹⁹ Conojel wa' e rija'lil ri Esau ri cäbix Edom che, e c'amal tak be c'ut.

²⁰ E are wa' ri e u c'ojol ri Seir ri aj horey ri xec'oji' pa we c'olbal ri'; ri Lotan, ri Sobal, ri Zibeon, ri Ana,

²¹ ri Dison, ri Ezer, ri Disan. E are wa' ri c'amal tak qui be ri aj horib ri e rija'lil ri Seir pa ri ulew re Edom.

²² Ri e u c'ojol ri Lotan are ri Hori, ri Hemam. Ri Timna are rana'b ri Lotan.

²³ Ri e u c'ojol ri Sobal are ri Alban, ri Manahat, ri Ebal, ri Sep, ri Onam.

²⁴ Ri e u c'ojol ri Zibeon are ri Aja, ri Ana. We Ana ri' are wa' ri xerikow ri bulbux tak ja' pa ri chaki'j uwo sak aretak cätajin quebuyuk'uj ri u bur ri u tat.

²⁵ Ri Ana xalax jun u c'ojol Dison u bi'; xukuje' jun u mia'l Aholibam u bi'.

²⁶ Ri e u c'ojol ri Dison are ri Hemdan, ri Esban, ri Itran, ri Queran.

²⁷ Ri e u c'ojol ri Ezer are ri Bilan, ri Zaaban, ri Acan.

²⁸ Ri e u c'ojol ri Disan are ri Uz xukuje' ri Aran.

²⁹ Ri c'amal tak be chque ri aj horib are ri Lotan, ri Sobal, ri Zibeon, ri Ana,

³⁰ ri Dison, ri Ezer, ri Disan. E are wa' ri c'amal tak be ri xetakan paquiwi' ri aj horib pa tak achalaxic pa ri ulew re Seir.

³¹ E are wa' ri ajawinelab ri xebajawin pa Edom, aretak majok chajawin jun ajawinel paquiwi' ri aj israelib:

³² Ri Bela, u c'ojol ri Beor, are ajawinel re Edom, Dinab u bi' ri u tinimit.

³³ Aretak xcäm ri Bela are' xajawin can ri Jobab pa ri u c'olbal ri u c'ojol ri Zera, ri aj tinimit Bosra.

³⁴ Aretak xcäm ri Jobab, are' xajawin can ri Husam pa ri u c'olbal ri aj rulewal ri Teman.

³⁵ Aretak xcäm ri Husam, are' xajawin can ri Hadad pa ri u c'olbal ri aj Abit u c'ojol ri Bedad. Xebuch'äc ri aj Madian pa ri ulew re Moab.

³⁶ Aretak xcäm ri Hadad, are' xajawin can ri Samla pa ri u c'olbal ri aj Masrec.

³⁷ Aretak xcäm ri Samla, are' xajawin ri Saul pa ri u c'olbal ri aj Rehobot. Ri tinimit ri c'o chunakaj ri nima'.

³⁸ Aretak xcäm ri Saul, are' xajawin can ri Baal-hanan pa ri u c'olbal ri u c'ojol ri Acbor.

³⁹ Aretak xcäm ri Baal-hanan, are' xajawin can ri Hadad pa ri u c'olbal ri aj nimalaj tinimit Pau. Mehetabel u bi' ri rixokil ri Adad u mia'l ri Matred, ri' u mam ri Mezaab.

⁴⁰ Are qui bi' tak wa' ri e nimak qui k'ij aj Esau, pa qui cholajil tak alaxic, c'olbal xukuje' tak bi'aj: Timna, Alba, Jetet,

⁴¹ Aholibam, Ela, Pinon,

⁴² Senaz, Teman, Mibzar,

⁴³ Magdiel, xukuje' ri Iram. Ri Esau ri xukuje' cäbix Edom che, jas ri qui cholajil tak ri c'olbal jawije' ri e jekel tak wi e quech c'ut.