Chapletajic 35 - Quiché Bible

Ri Dios cutewichi'j ri Jacob pa Betel

¹ Ri Dios xubij che ri Jacob: “Chatwalijok, chatpakal pa Betel, chatc'ol chila'. Chabana' jun porobal chila' che u k'ijlaxic ri Dios ri xuc'ut rib chawäch aretak xatanimaj chuwäch ri awachalal Esau.”

² Ri Jacob xubij chque ri e c'o pa rachoch xukuje' conojel ri e teren chrij: “Chebiwesaj bic ri jule' tak diosib ri e iwuc'am, chixatinok, chijala' ri iwatz'iak.

³ Chixwalijok, chujpakal pa Betel; chila' quinbana' wi na jun porobal che u k'ijlaxic ri Dios ri xinuto' aretak in in ch'ibatajinak, c'olinak c'u wuc' pa apachique c'olbal ri in c'olinak wi.”

⁴ Conojel ri e c'o pa rachoch ri Jacob xequijach ri jule' tak diosib che ri Jacob ri e cuc'am, xukuje' ri u wi' tak xiquinaj ri e qui cojom che ri qui xiquin, ri Jacob xebumuk chuxe' jun räx che' ri c'o chunakaj ri tinimit Siquem.

⁵ Aretak xebel bic chila', ri Dios xubano chi sibalaj xquixe'j quib tak ri tinimit ri e c'o apan chquinakaj, rumal ri' man c'o ta jun c'ax xquiban chque ri e ralc'ual ri Jacob.

⁶ Ri Jacob xukuje' conojel ri winak ri e benak ruc' xebopan pa Luz, we tinimit ri' xukuje' cäbix Betel che u bi', ri c'o pa ri ulew re Canaan.

⁷ Xuban jun porobal chila', xucoj “El-Betel” che u bi' we c'olbal ri', chila' c'ut xuc'ut wi rib ri Dios chuwäch aretak xanimaj chuwäch ri Esau.

⁸ Xukuje' chila' xcäm wi ri Debora ri ixok ri xq'uiyisan ri Rebec, xmuk c'u can chuxe' jun bakit chunakaj ri Betel, ri Jacob xucoj ri u bi' we c'olbal ri' “Ri räx che' re ri ok'ej.”

⁹ Aretak ri Jacob tzelejem ulok re pa Padan-aram, ri Dios xuc'ut chi rib jumul chuwäch, xutewichi'j c'ut

¹⁰ je u tewichi'xic wa' xubano: “Ri at Jacob ri a bi', man je ta chi c'u cäbix wa' chawe; kas camic ri a bi' are Israel.” Aretak q'uextajinak chic ri u bi' rumal ri Dios,

¹¹ ri Dios xubij che: “In ri' ri Dios ri c'o ronojel u cuinem; chec'ol q'ui awalc'ual xukuje' ri e awija'lil Chawe quel wi na jun nim tinimit xukuje' q'ui tak tinimit, quebel na ajawinel chquixo'l tak ri e awija'lil.

¹² Ri ulew ri xinjach pa u k'ab ri Abraham, ri Isaac, xukuje' quinjach chi na pa qui k'ab ri e awija'lil aretak at cäminak chic.”

¹³ Aretak xel bic ri Dios chila' jawije' ri xutzijobej wi ri Jacob,

¹⁴ ri Jacob xuc'am jun abaj xutac'aba' jacha' jun akan pa ri c'olbal jawije' xtzijobex wi rumal ri Dios, xutas c'ut, xuk'ij u wa'l uva xukuje' aseit puwi' ri abaj,

¹⁵ xucoj “Betel” che u bi' we c'olbal ri'.

Ri u cämical ri Raquel

¹⁶ Xebel chi c'u bic pa Betel, c'ä naj c'u na jubik' e c'o wi che ri Eprat aretak xalan ri Raquel; sibalaj c'ax xuriko aretak xril u wäch ri ral.

¹⁷ Pa ri jok'otaj ri sibalaj c'ax na ri iyom xubij che: “Maxe'j awib, awilom chi u wäch jun ala.”

¹⁸ Cämem c'u cubano, aretak cätajin quel ranima' xucoj can “Benon” che u bi' ri ac'al, are c'u ri u tat ri ac'al xucoj “Benjamin” che u bi'.

¹⁹ Je cämical wa' xurik ri Raquel, xmuk c'u can chuchi' ri be ri cäbe pa Eprat, ri cäbix Belen che camic.

²⁰ Ri Jacob xutac'aba' jun abaj puwi' ri c'olbal ri xmuk wi, are abaj wa' ri cäc'utuw ri xmuk wi ri Raquel.

²¹ Ri Israel xutakej ri u be, xejekel c'u c'ä jela' che ri tac'atic ja re Edar.

²² Xurika' jun k'ij aretak c'o ri Israel pa we c'olbal ri', xpe ri Ruben xk'oyi' ruc' ri Bil jun chi ixok ri man kas ta rixokil ri u tat. Aretak xretamaj ri u tat, sibalaj xpe royowal. Ri e u c'ojol ri Jacob e cablajuj (12).

Ri e u c'ojol ri Jacob

²³ Ri xebuc'ojolaj ruc' ri Lea are' ri Ruben, ri u nabeal; ri Simeon, ri Levi, ri Juda, ri Isacar xukuje' ri Zabulon.

²⁴ Ri xebuc'ojolaj ruc' ri Raquel are' ri Jose xukuje' ri Benjamin.

²⁵ Ri xebuc'ojolaj ruc' ri Bil ri u lok'om pataninelab ri Raquel are' ri Dan, xukuje' ri Neptali;

²⁶ ri xebuc'ojolaj ruc' ri Zilp, ri u lok'om pataninel ri Lea, are' ri Gad, xukuje' ri Aser. E are' tak u c'ojol ri Jacob wa', ri xil qui wäch pa Padan-aram.

Ri u cämical ri Isaac

²⁷ Ri Jacob xbe che u ch'abexic ri u tat pa Mamre, ri tinimit ri xukuje' cäbix Arba che o Hebron. Chila' c'u xc'oji' wi ri Abraham xukuje' ri Isaac.

²⁸ Jun sient ruc' jumuch' (180) u junab ri Isaac aretak xcämic.

²⁹ Sibalaj nim winak chic aretak xcämic, xmuk c'u cuc' ri e u mam cumal ri quieb u c'ojol, ri Esau xukuje' ri Jacob.