Chapletajic 27 - Quiché Bible

Ri Isaac cutewichi'j ri Jacob xukuje' ri Esau

¹ Ri Isaac sibalaj nim winak chic xukuje' man cäca'y ta chic. Xurika' c'u jun k'ij xusiq'uij ri Esau, ri u c'ojol ri nabeal, xubij c'u che: “¡Nu c'ojol!” “Ch'aw la tat,” xutzelej u bixic ri Esau.

² “Cawilo chi sibalaj in nim winak chic, we ne xak chwek cäbij quincämic,” xcha' ri Isaac.

³ “Quinwaj chi catbe pa juyub chac'ama' bic ri a q'uiakbal ch'ab xukuje' tak ri e a ch'ab, jachapa' ulok jun awaj chwe.

⁴ Chasuc'umaj jun qui'laj nu riquil jas ri cäkaj chnuwäch, cäc'am c'u ulok rech quintijo. Quinwaj catintewichi'j canok xa c'u quieb oxib k'ij chic in c'aslic.”

⁵ Cätajin c'u cutatabej ri Rebec ri xubij ri Isaac che ri Esau. Rumal ri' aretak xbe ri Esau pa juyub che u chapic ulok jun awaj che ri u tat,

⁶ ri Rebec xubij che ri Jacob ri chak'axel: “Chatampe', xinta ri xubij ri a tat che ri awachalal Esau, jewa' xubij che:

⁷ ‘Jachapa' ulok jun awaj chwe, chasuc'umaj jun qui'laj nu riquil, rech quintijo; quinya' c'u can ri tewichibal chawe chuwäch ri Ajawaxel, xa c'u quieb oxib k'ij chic in c'aslic.’

⁸ Rumal ri' wal, chabana' ba' ri quinbij chawe:

⁹ Jät jawije' e c'o wi ri kawaj, jebac'ama' ulok quieb alaj tak q'uisic' ri e utz chic; quinban c'u na jun qui'laj u riquil ri a tat jas ri cäkaj chuwäch.

¹⁰ At catc'amow bic ri riquil che ri a tat rech cutijo, rech catutewichi'j canok, c'ä majok chi cämok.”

¹¹ Ri Jacob xubij che ri u nan: “Ri wachalal sibalaj pim ri rismal, man in je ta c'u in.

¹² E c'u we ne quinumalama' ri nu tat, cuch'ob c'u ri' chi in ri Jacob, cubij ri' chi xa cätajin quinsubu, quinuc'okoj c'u ri' che u q'uexwäch ri quinutewichi'j.”

¹³ Xubij c'u ri u nan che: “Chkaj ta ba' we c'okonic ri' panuwi' in. Jät ba', chabana' ri quinbij chawe, jebac'ama' ulok ri alaj tak q'uisic'.”

¹⁴ Ri Jacob xbe che qui c'amic ulok ri alaj tak q'uisic', xebuya' che ri u nan. Xusuc'umaj c'u jun qui'laj riquil, jas ri cäkaj chuwäch ri Isaac,

¹⁵ xresaj ulok jun je'lalaj atz'iak ri c'olotalic ri rech ri Esau ri u nabeal, xucoj chrij ri Jacob ri u chak'axel.

¹⁶ Xebucoj ri qui tz'umal ri alaj tak q'uisic' chquij tak ri u k'ab ri Jacob, xukuje' chrij u wi' jawije' ri man c'o ta wi rismal,

¹⁷ ri Rebec xuya' ri riquil pa u k'ab ri Jacob xukuje' ri caxlanwa ri xubano.

¹⁸ Xoc c'ut ri Jacob jawije' c'o wi ri u tat, xubij c'u che: “¡Tat!” “In c'o waral. ¿At jachin chque ri nu c'ojol?” xcha' ri Isaac.

¹⁹ “In Esau ri nabeal c'ojol la,” xutzelej u bixic ri Jacob. “Xbantaj ri riquil ri xbij la chwe. Bana' la tok'ob walij la, tija' la jubik' ri awaj ri nu cämisam; ya' c'u la ri tewichibal la panuwi'.”

²⁰ Ri Isaac xuc'ot u chi': “¿Jas xaban che u rikic ri awaj chanim nu c'ojol?” “Ri Ajawaxel ri Dios la are xinto'w che u rikic,” xutzelej u bixic ri Jacob.

²¹ Xubij c'u ri Isaac che: “Chatkeb ulok chaya' c'u chwe chi catinmalalej, rech quinwetamaj we kastzij chi at ri Esau o man at taj.”

²² Xkeb ri Jacob chuwäch ri u tat rech cämalamax rumal. Xubij ri Isaac che ri Jacob: “Ri a ch'abal are u ch'abal ri Jacob, are c'u ri a k'ab, are ri u k'ab ri Esau.”

²³ Jeri' ri Isaac man xuch'ob taj chi are ri Jacob, sibalaj c'u pim ri rismal junam ruc' ri rech ri Esau ri rachalal. Aretak c'u xaco'l man cutewichi'j,

²⁴ xuc'ot chi u chi' jumul: “¿La kas pa at ri nu c'ojol Esau?” “Je', in ri' ri Esau,” xcha' ri Jacob.

²⁵ Xubij c'u ri u tat che: “Chaya' ba' ri nu wa, nu c'ojol, rech quintij we ri awaj ri xachapa' ulok, c'ä te' c'u ri' catintewichi'j.” Ri Jacob xukebesaj ri wa' chuwäch ri u tat, xukuje' xuc'am ulok u wa'l uva, xwa' ri Isaac xukuje' xuq'uianic.

²⁶ C'äte c'u ri' xubij che: “Chatkeb ulok, nu c'ojol, quinwaj catintz'umaj.”

²⁷ Aretak xkeb ri Jacob rech catz'umaxic ri Isaac xusik ri ruxlab ri ratz'iak. Xutewichi'j c'u cuc' tak we tzij ri': “Kastzij we uxlab ri' ruxlab ri nu c'ojol. Junam ruc' ri ruxlab jun juyub ri tewichi'm rumal ri Ajawaxel.

²⁸ Chuya' ri Dios chawe ri jäb re ri caj, ri utzalaj tak u wächinic ri telechi'm trico xukuje' telechi'm u wa'l uva.

²⁹ Tinimit winak chatpatanin na; chi ri nimak tak tinimit chiquixucu' quib chawäch. Chattakan paquiwi' ri kas e awachalal; ¡cäquimej quib chawäch! Ri catquic'okoj na, quec'okotaj na, ri catquitewichi'j, quetewichitaj na.”

³⁰ Xq'uis u tewichi'xic ri Jacob rumal ri Isaac, c'ä te' jubik' elinak ulok ri Jacob chuwäch ri u tat aretak xtzelej ulok ri Esau pa ri juyub ruc'am ulok ri awaj.

³¹ Ri are' xukuje' xuban jun qui'laj riquil, xuya' pa tijic che ri u tat, xubij che: “Tat, walij la tija' la ri awaj ri xincämisaj, chintewichi'j c'u la.”

³² Are c'u ri Isaac xuc'ot u chi': “¿Jachin ri' ri at?” “In Esau, ri nabeal c'ojol la.” Xutzelej u bixic.

³³ Ri Isaac sibalaj xmayquenic, ruc' c'ut ch'abal cabirbitic, xubij: “¿Jachin c'u ri' ri xbe pa tzucunic, xuc'am ulok jun qui'laj riquil chwe? Xintij c'u ronojel c'ä maja' catulic, xintewichi'j, tewichital chi c'u camic.”

³⁴ Aretak xtataj rumal ri Esau ri xubij ri u tat, sibalaj xok'ic, xurak u chi', xubij: “¡Tat, chintewichi'j ba' la ri in xukuje'!”

³⁵ Ri Isaac xubij che: “Ulinak ri a chak', xinusub c'ut, xuc'am c'u bic ri tewichibal ri awech at.”

³⁶ “Jacha' ba' xcoj Jacob che u bi',” xcha' ri Esau. “U camul chi wa' in u subum. Ri nabe mul xumaj ri takanic ri c'o wuc' chi in nabeal, ri tewichibal ri ya'tal chwe. ¿La ma ta c'u c'olom la can jun tewichibal chic chwe in?”

³⁷ Are c'u ri Isaac xutzelej u bixic che: “Chawilampe', in nu yo'm takanic chi ri Jacob catakan pawi'; conojel ri e rachalaxic e nu jachom pa u k'ab rech quebux u pataninelab nu telechi'm u trico xukuje' nu telechi'm u wa'l u uva. ¿Jas ta chic ri quincuin ta chi che u banic camic chawe nu c'ojol?”

³⁸ Ri Esau xucoj u chuk'ab che u bixic che ri u tat, xubij: “Tat, ¿la xa c'u jun tewichibal cäcuin la che u ya'ic? ¡Chintewichi'j ba' la in xukuje'!” Xok' chi jumul, ruc' rakojchi'aj.

³⁹ Xubij c'u ri Isaac che: “Naj catejekel wi na chque ri wächinelalaj tak ulew xukuje' che ri jäb ri cäpe chicaj.

⁴⁰ Cato' na awib ruc' ri a ch'ich' re ch'o'j catoc na che pataninel re ri a chak'; aretak c'u cäc'oji' a chuk'ab, cawesaj na awib chuxe' ri u takanic.”

Ri Jacob canimaj chuwäch ri Esau

⁴¹ Kas chi' c'ut ri Esau xretzelaj u wäch ri Jacob, rumal ri tewichibal ri xya' che rumal ri u tat, xubij: “Xak pa quieb oxib k'ij, cäcäm ri nu tat, aretak c'u cäminak chic, quincämisaj ri Jacob ri nu chak'.”

⁴² Aretak xretamaj ri Rebec ri u chomanic ri Esau, xusiq'uij ri Jacob, xubij che: “Wal, ri awachalal Esau cubij chi catucämisaj che resaxic ri royowal chawij.

⁴³ Rumal ri', wal, chabana' ba' ri quinbij chawe; mabey awib jät cho rachoch ri nu xibal Laban, ri c'o pa Aran.

⁴⁴ Chatcanaj ruc' c'ä coc'ow na ri royowal ri awachalal chawij

⁴⁵ xukuje' c'ä cäsach na pa u jolom ri a banom che. Quintak c'u na a siq'uixic rech cattzelej ulok. ¡Man quinwaj taj chi xa pa jun k'ij quinsach qui wäch ri quieb wal!”

⁴⁶ Ri Rebec xutzijobej ri Isaac, xubij che: “Ri in sibalaj in k'itajinak chi che ri c'aslemal, u mac quech ri alitomab aj hititib ri xec'uli' ruc' ri Esau. We ri Jacob cäc'uli' ruc' jun chque ri aj hititib ri e c'o waral pa Canaan, are utz na we quincämic.”