Chapletajic 21 - Quiché Bible

Ri ralaxic ri Isaac

¹ Jas ri u bim ulok ri Ajawaxel, kas je xuban che ri Sara,

² ri are' xcanaj yawab winak, xralaj c'u jun u c'ojol ri Abraham aretak sibalaj nim winak chic. Xalax ri ac'al kas pa ri k'ij ri u bim ri Dios.

³ Ri Abraham xucoj Isaac che u bi' ri u c'ojol ri xalax rumal ri Sara,

⁴ wajxakib k'ij chic ilom u wäch ri Isaac aretak xkopix ri u wi' ri u tz'umal ri achi' che retal rumal ri Abraham, jas ri takanic ri u yo'm ri Dios che.

⁵ Jun sient u junab ri Abraham aretak xalax ri Isaac.

⁶ Xubij ri Sara pa ranima': “Ri Dios xuya' quicotemal chwe, conojel c'u ri cäquetamaj chi c'olinak jun wal, quequicot na wuc'.

⁷ ¿Jachin ta xbin che ri Abraham chi quebenwalaj na ralc'ual? Xinwalaj c'u jun u c'ojol pune' sibalaj in nim winak chic.”

Ri Agar, ri Ismael, quebesax bic pa rachoch ri Abraham

⁸ Aretak nim chic ri Isaac, xesax puwi' ri tu'. Aretak c'u xesax puwi' ri tu' ri Abraham xuban jun nimalaj nimak'ij.

⁹ Xril c'u ri Sara chi ri u c'ojol ri Abraham ri ralam ri Agar ri aj ejipt, cutze'j u wäch ri Isaac.

¹⁰ Xbe ri Sara xubij che ri Abraham: “¡Chel bic we lok'om pataninel ri' rachil ri ral! Man cuya' ta c'ut cäban quieb che ri rechbal ri wal Isaac cäya' ta c'u niq'uiaj che ri ral ri lok'om pataninel.”

¹¹ Sibalaj c'ax xuna' ri Abraham aretak xuto chi quesax bic ri u c'ojol.

¹² Ri Dios xubij che ri Abraham: “Matoc il che ri ala mawi che ri a lok'om pataninel. Chabana' ronojel ri cubij ri Sara chawe, rumal c'ut ri Isaac queq'uiyir na ri e awija'lil.

¹³ Are c'u ri ral ri lok'om pataninel quinbano chi cupok'isaj na jun nim tinimit, rumal rech chi a c'ojol.”

¹⁴ Sibalaj ak'ab chucab k'ij, ri Abraham xuya' bic wa che ri Agar xukuje' jun c'olbal ja' re tz'um nojinak che ja'; xuya' bic cho rachak, xujach c'u bic ri Ismael pa u k'ab. Quiwil iwib xcha' bic chque. Xbe ri Agar, pa ri chaki'j uwo sak re Beerseb, man reta'm ta c'ut jawije' cäbe wi.

¹⁵ Aretak xq'uis ri ja' ri c'o pa ri tz'um, xuya' can ri ac'al chuxe' jun patzäpic k'ayes

¹⁶ xbec, naj xet'uyul wi apanok, man craj taj cärilo aretak cäcäm ri ral. Aretak xt'uyic xuchaplej ok'ej ri ac'al.

¹⁷ Ri Dios xuto chi cok' ri ala, kas c'u pa ri caj ri tako'n aj caj xusiq'uij ulok ri Agar, xubij c'u che: “¿Jas xac'ulmaj Agar? Maxe'j awib, ri Dios xuta' ri rok'ej ri ac'al chila' jawije' ri c'o wi.

¹⁸ Jät, jatzucuj ri ac'al, matzokopij ri u k'ab, quinban c'u na chi cupok'isaj na jun nim tinimit ri nim u k'ij.”

¹⁹ Ri Dios xubano chi ri Agar xril jun c'ua' nojinak che ja' ri c'o apanok. Xbec, xunojisaj ri tz'um che ja', xuya' c'ut re ri Ismael.

²⁰ Ri Dios xuto' ri ala, ri ala xq'uiyic xc'oji' pa ri chaki'j uwo sak, xux c'u jun utzalaj q'uiakal ch'ab.

²¹ Xc'oji' pa ri chaki'j uwo sak re Paran, ri Ismael xc'ulubax rumal ri u nan ruc' jun ali aj Ejipt.

Ri Abraham, ri Abimelec xquiban jun c'ulwächinic

²² Pa tak c'u ri k'ij ri' ri Abimelec xbe che u ch'abexic ri Abraham. Xachilax bic rumal ri Picol, qui nimal ri rajch'ojab. Ri Abimelec xubij che ri Abraham: “Cäkilo chi ri Dios catuto' che ronojel ri cäbano.

²³ Rumal ri' chabana' ri chi'nic ri kas cäban na pa ri u bi' ri Dios, kas pa we c'olbal ri', chi man c'o ta lawaloyil cäban na chke mawi chwe in mawi chque ri walc'ual mawi chque ri e awija'lil. Chabanaa' ri chi'nic ri kas cäban na chi cäban na ri utzil chwe jacha' ri nu banom chawe, chi junam cäban na chque ri winak ri e re we ulew ri' jawije' ri at jekel wi camic.”

²⁴ “Quinban ri chi'nic ri kas cäban na,” xutzelej u bixic ri Abraham.

²⁵ C'o c'u jun c'ua' ri xuch'a' ri Abraham che ri Abimelec, ri majom can che cumal ri pataninel tak rech ri Abimelec.

²⁶ Ri Abimelec xubij che: “Man yo'm ta u bixic wa' chwe, man nu tom ta in. Mawi jubik' weta'm jachin xbanow wa'.”

²⁷ Ri Abraham xebuc'am chij, wacax, xebuya' che ri Abimelec. Pa ri k'ij ri' e quieb xquiban jun c'ulwächinic.

²⁸ Ri Abraham xebutas wukub chij chquixo'l ri u chij,

²⁹ rumal c'u ri' ri Abimelec xuc'ot u chi': “¿Jasche e a tasom we wukub chij ri'?”

³⁰ Ri Abraham xutzelej u bixic: “We wukub chij ri' quebenya' che la, che u c'utic chwäch la chi in xinc'otow we c'ua' ri'.”

³¹ Rumal ri' xcoj Beerseb che u bi' we c'olbal ri', chila' c'ut xcan wi jun chi'nic ri kas cäban na qui cabichal.

³² Bantajinak chi c'u ri c'ulwächinic, ri Abimelec xukuje' ri Picol, xetzelej pa ri culew ri aj pilisteyib.

³³ Chila' pa Beerseb ri Abraham xutic juwi' che, jun tamarin, xuya' c'u u k'ij ri u bi' ri Ajawaxel, ri junalic Dios.

³⁴ Naj xbeytaj ri Abraham chupam ri culew ri aj pilisteyib.