Chapletajic 16 - Quiché Bible

Ri Agar xukuje' ri Ismael

¹ Ri Saraiy man cäcuin taj quebuya' ta ral che ri Abram ri rachajil; c'o c'u jun lok'om pataninel ixok rech ri Saraiy aj Ejipt, ri Agar u bi'.

² Xubij c'u ri Saraiy che ri Abram: “Ri Ajawaxel man u yo'm ta chwe chi quec'oji' ta wal, chabana' jun tok'ob, chac'ama' ri Agar che awixokil ri lok'om pataninel wech, craj ne quec'oji' na wal rumal ri are.” Ri Abram xunimaj ri xbix che rumal ri Saraiy.

³ Are c'u ri Saraiy xuc'am ri Agar, ri aj Ejipt, xuya' c'u che jacha' che rixokil ri Abram, aretak lajuj junab chic e jekel pa Canaan.

⁴ Ri Abram xuc'am ri Agar, xcanaj c'u yawab winak ri Agar. Aretak ri Agar xuna' rib chi yawab winak chic, xretzelaj u wäch ri Saraiy.

⁵ Ri Saraiy xubij che ri Abram: “¡U mac awech chi quetzelax nu wäch rumal ri Agar. In xinyo'w che awixokil; camic c'ut aretak reta'm chic chi cäc'oji' na jun ral, man nim ta chic quinrilo. Chubij ba' ri Ajawaxel jachin ri ajchak'mac, we in o at!”

⁶ Ri Abram xubij che ri Saraiy: “Chawilampe', pa k'ab c'o wi ri Agar, ri a lok'om pataninel, chabana' che jas ri cawaj.” Xuchaplej c'u u banic c'ax ri Saraiy che ri Agar, rumal c'u ri' xanimaj bic ri Agar.

⁷ Xriktaj c'u ri Agar rumal jun tako'n re ri Ajawaxel pa ri chaki'j uwo sak, chunakaj ri bulbux ri c'o pa ri be ri cäbe pa Xur,

⁸ xuc'ot c'u u chi': “Agar, u lok'om pataninel ri Saraiy, ¿Jawije' a petic wi, jawije' c'u catbe wi?” Ri Agar xubij: “Cätajin quinanimaj chuwäch ri nu chuchu' ri Saraiy.”

⁹ Ri tako'n re ri Ajawaxel xubij che ri Agar: “Chattzelej cho rachoch ri a chuchu' ri Saraiy, chanimaj pa ronojel ri catutak wi.”

¹⁰ Xubij chi c'u na ri tako'n che ri Agar: “Quinbano chi queq'uiyir na ri e awija'lil, ri man c'o ta jun cäcuinta che cajilaxic.

¹¹ At yawab winak chic, cäc'oji' c'u na jun awal ala, Ismael cäcoj na che u bi', ri awok'ej xtataj rumal ri Ajawaxel.

¹² Ri awal cux na jun c'analaj achi; cutij na u chuk'ab chquij conojel xukuje' conojel cäquitij na qui chuk'ab ruc'; co c'u cutiq'uiba' ri rachoch pune' cäc'ulelax cumal ri rachalal.”

¹³ Rumal c'u rech chi ri Agar ch'awinak ruc' ri Ajawaxel, xubinaj rumal “Ri Dios ri quinuca'yej”, xuchomaj: “In rilom c'u ri Dios c'ä in c'asal c'ut.”

¹⁴ Xukuje' rumal ri' ri c'ua' xbinaxic: “U C'ua' Ri C'aslic Quinuca'yej”. We c'ua' ri' c'o chuxo'l ri Cades ruc' ri Bered.

¹⁵ Ri Agar xralaj jun u c'ojol ri Abram, ri Abram xucoj Ismael che u bi'.

¹⁶ Jumuch' ruc' wakib (86) u junab ri Abram aretak xalax ri Ismael.