Chapletajic 12 - Quiché Bible

Ri Dios xusiq'uij ri Abram

¹ Pa jun k'ij ri Ajawaxel xubij che ri Abram: “Chaya' can ri awulew, ri e awachalaxic, xukuje' ri rachoch ri a tat, rech catbe pa ri ulew ri quinc'ut na chawäch.

² Quinban na jun nim tinimit ri nim u k'ij chque ri e awija'lil; catintewichi'j na xukuje' quinnimarisaj na a k'ij, catux c'u na jun tewichibal chque niq'uiaj chic.

³ Quebentewichi'j na ri catquitewichi'j, quebenc'okoj na ri catquic'okoj; conojel ri winak cho ri uwächulew cäquirik na tewichibal rumal awech.”

⁴ Xel c'u bic ri Abram pa Aran jas ri takanic ri xya' che rumal ri Ajawaxel. Oxc'al olajuj (75) u junab aretak xel bic chila' xbe pa Canaan.

⁵ Xuc'am bic ri Saraiy ri rixokil, xukuje' ri Lot ri u c'ojol ri u chak', xequic'am bic conojel ri jastak quech xukuje' conojel ri winak ri xequilok' pa Aran. Aretak xebopan pa Canaan,

⁶ ri Abram xoc'ow pa ronojel ri ulew ri' c'ä xopan na pa Siquem, jawije' c'o wi ri tastalicalaj bakit pa Mor. E c'o c'u ri aj cananeyib pa ri ulew ri'.

⁷ Chila' xuc'ut wi rib ri Ajawaxel chuwäch ri Abram, xubij che: “We ulew ri' quinya' na chque ri e awija'lil.” Ri Abram xuban jun porobal chila' ri xuk'ijilaj wi ri Ajawaxel, rumal rech chi chila' xuc'ut wi rib chuwäch.

⁸ Xbextax c'ut pa ri c'achelajalaj ulew ri c'o pa elebal k'ij che ri tinimit Betel, chila' c'u xuwoc wi ri u lic'om rachoch. Ri Betel xcanaj pa ri u kajebal k'ij che ri u lic'om rachoch, are c'u ri tinimit Hai xcanaj pa elebal k'ij. Ri Abram xuban chi jun porobal chila' ri xutz'onoj wi tok'ob pa ri u bi' ri Ajawaxel.

⁹ C'äte ri' nojim nojim xutakej ri u be, xbe pa ri rulewal Negueb.

Ri Abram pa Ejipt

¹⁰ Xpe c'u jun nimalaj wi'jal pa ronojel ri c'olbal ri', ri Abram xec'ol quieb oxib k'ij pa Ejipt, man c'o ta chi c'u catij pa ri c'olbal ri jekel wi.

¹¹ Aretak opanem cuban pa Ejipt, ri Abram xubij che ri Saraiy ri rixokil: “Chatampe', quinbij chawe, in weta'm chi at jun je'lalaj ixok,

¹² aretak c'u catquil ri aj ejiptib, cäquibij na chi at wixokil. Ri in quinquicämisaj, are c'u ri at catquic'asba' canok rech quec'oji' na can awuc'.

¹³ Rumal c'u ri' quintz'onoj jun tok'ob chawe, chabij chi at wana'b, rech utz nu wäch quintzelejic, rech quinc'asi' rumal awech.”

¹⁴ Aretak xopan ri Abram pa Ejipt, ri aj ejiptib xquil ri Saraiy chi sibalaj je'lic,

¹⁵ xukuje' ri nimak qui k'ij ri e c'o ruc' ri paraon ri ajawinel pa Ejipt xquil ri Saraiy, xequibij c'u che chi sibalaj je'lic we ixok ri'. Xquic'am c'u bic pa ri rachoch ri ajawinel.

¹⁶ Sibalaj utz xuban ri ajawinel che ri Abram rumal rech ri Saraiy. Xebusipaj u chij, u wacax, u bur, u camey, xukuje' xebusipaj u lok'om tak pataninelab, achijab xukuje' ixokib.

¹⁷ U mac c'u rech ri Saraiy, ri Ajawaxel xuc'äjisaj u wäch ri ajawinel, xukuje' conojel ri e c'o pa ri rachoch cuc' nimak tak yabil.

¹⁸ Rumal ri' ri ajawinel xutak u siq'uixic ri Abram, xubij che: “¿Jasche je a banom wa' chwe? ¿Jasche man xak'alajisaj ta chnuwäch chi awixokil we ixok ri'?

¹⁹ At xabij chi awana'b, ri in xincuin ta ri' xic'am ta che wixokil. ¡C'o we awixokil ri', chac'ama' bic, jät!”

²⁰ Xuya' c'u takanic ri ajawinel chque ri winak ri e c'o ruc' chi cäquesaj bic ri Abram pa Ejipt rachil ri rixokil, xukuje' ronojel ri jastak rech.