Chapletajic 11 - Quiché Bible

Ri nimalaj tz'ak pa Babel

¹ Pa tak ri k'ij ri' conojel ri winak xa jun qui ch'abal c'olic.

² Aretak c'u xebel bic pa elebal k'ij, xquirik jun lianic ri c'o pa Sinar. Chila' c'ut xejeki' wi.

³ Xurika' jun k'ij xquitzijobela' quib, xquibij: “Chekabana' xan quekaporoj pa k'ak'.” Xequiban c'u porom xan ri xequicoj che qui q'uexwäch abaj, k'ek k'ol c'ut xquicoj che u q'uexwäch xok'ol.

⁴ Xquibij c'ut: “Tisaj kayaca' jun ka tinimit xukuje' jun nimalaj tz'ak ri quel ri u wi' c'ä chicaj. Rech cänimar ka k'ij, man cäkatuquij ta c'u kib cho ronojel ri uwächulew.”

⁵ Xkaj c'u ulok ri Ajawaxel che rilic ri tinimit xukuje' ri nimalaj tz'ak ri cätajin cäquiyac ri winak.

⁶ Ri Ajawaxel xuchomaj: “Rumal chi xa e jun tinimit xukuje' xa jun qui ch'abal c'olic, rumal ri' qui chaplem u banic we chac ri'; man c'o ta c'u jun cho ri uwächulew ri cäcuin ta che qui k'atixic rech quetani' che u banic ri nimalaj tz'ak.

⁷ Chujkaj bic kaya' jalajoj tak qui ch'abal chquijujunal, rech man cäquich'ob ta chic jas ri cäquibij chquibil tak quib.”

⁸ Jewa' xuban ri Ajawaxel che qui jabuxic ri winak ri e c'o cho ronojel ri uwächulew, xquitanaba' c'u u yaquic ri tinimit.

⁹ Chila' xuya' wi ri Ajawaxel ri jalajoj tak qui ch'abal conojel ri winak re ri uwächulew, chila' c'u xejabux wi bic pa ronojel ri uwächulew. Rumal ri' xcoj Babel che u bi' ri tinimit.

Ri e rija'lil ri Sem

¹⁰ E are' tak wa' ri e rija'lil ri Sem. Quieb junab oc'owinak chic ri k'ekal jäb, aretak ri Sem c'o chic jun sient u junab xil u wäch ri Arpaxad ri u c'ojol.

¹¹ Xc'asi' chi na job sient (500) junab ri Sem. Xebalax chi na niq'uiaj u c'ojol, xukuje' niq'uiaj u mia'l.

¹² Ri Arpaxad juwinak olajuj (35) u junab aretak xalax ri Sala ri u c'ojol.

¹³ Xc'asi' chi na quiejeb sient ruc' oxib (403) junab ri Arpaxad. Xebalax chi na niq'uiaj u c'ojol, xukuje' niq'uiaj u mia'l.

¹⁴ Ri Sala juwinak lajuj (30) u junab aretak xalax ri Heber ri u c'ojol.

¹⁵ Xc'asi' chi na quiejeb sient ruc' oxib (403) junab ri Sala. Xebalax chi na niq'uiaj u c'ojol, xukuje' niq'uiaj u mia'l.

¹⁶ Ri Heber juwinak cajlajuj (34) u junab aretak xalax ri Peleg ri u c'ojol.

¹⁷ Xc'asi' chi na quiejeb sient ruc' juwinak lajuj (430) junab ri Heber. Xebalax chi na niq'uiaj u c'ojol, xukuje' niq'uiaj u mia'l.

¹⁸ Ri Peleg juwinak lajuj (30) u junab aretak xalax ri Reu ri u c'ojol.

¹⁹ Xc'asi' chi na quieb sient ruc' belejeb (209) junab ri Peleg. Xebalax chi na niq'uiaj u c'ojol, xukuje' niq'uiaj u mia'l.

²⁰ Ri Reu juwinak cablajuj (32) u junab aretak xalax ri Serug ri u c'ojol.

²¹ Xc'asi' chi na quieb sient ruc' wukub (207) junab ri Reu. Xebalax chi na niq'uiaj u c'ojol, xukuje' niq'uiaj u mia'l.

²² Ri Serug juwinak lajuj (30) u junab aretak xalax ri Nacor ri u c'ojol.

²³ Xc'asi' chi na quieb sient (200) junab ri Serug. Xebalax chi na niq'uiaj u c'ojol, xukuje' niq'uiaj u mia'l.

²⁴ Ri Nacor juwinak belejeb (29) u junab aretak xalax ri Tare ri u c'ojol.

²⁵ Xc'asi' chi na jun sient ruc' belejlajuj (119) junab ri Nacor. Xebalax chi na niq'uiaj u c'ojol, xukuje' niq'uiaj u mia'l.

²⁶ Ri Tare c'o chic oxc'al lajuj (70) u junab aretak xebalax ri oxib u c'ojol, ri Abram, ri Nacor, ri Aran.

Ri e rija'lil ri Tare

²⁷ E are' tak wa' ri e rija'lil ri u c'ojol ri Tare are ri Abram, ri Nacor, xukuje' ri Aran. Ri u c'ojol ri Aran are ri Lot,

²⁸ xcäm pa Ur ri culew ri aj caldeyib. Are c'u xcäm nabe chuwäch ri Tare ri u tat. Chila' xcäm wi jawije' ri xalax wi.

²⁹ Ri Abram xc'uli' ruc' ri Saraiy, ri Nacor xc'uli' ruc' ri Milca u mia'l ri Aran, rana'b ri Isca.

³⁰ Ri Saraiy man cuya' taj quec'oji' ral man c'u alanel taj.

³¹ Ri Tare xel bic pa Ur ri culew ri aj caldeyib xbe pa Canaan, xuc'am bic ri Abram ri u c'ojol, ri Lot ri ri' u mam, xukuje' ri Saraiy ri ralib. Aretak c'u xebopan pa ri u tinimit ri Aran, xejeki' c'u chila'.

³² Ri Tare xcäm pa Aran aretak c'o chic quieb sient ruc' job (205) u junab.