Bixonic Tak 2 - Quiché Bible

Ri ixok xubij:

¹ “In jun cotz'i'j re ri beya' re Saron, jun roxox que tak ri lianic.”

Ri achi xubij:

² “Ri quinlok'ok'ej uxinak, chquixo'l ri ixokib, jacha' jun roxox chquixo'l tak ri q'uix.”

Ri ixok xubij:

³ “Ri quinlok'ok'ej uxinak, chquixo'l tak ri achijab, jacha' ri u che'al mansa'n chquixo'l tak ri che' ri e c'o pa ri c'ache'laj. ¡Man c'o ta c'o wi aretak xint'uyi' chuxe' ri u mujal! ¡Sibalaj qui' xinna' ri u wächinic!

⁴ Xinuc'am bic pa ri ja ri cätajin wi ri ula'nic ri e nu ca'yexic tak rumal chwe in e re lok'ok'ebal c'uxaj.

⁵ ¡Chiya' chajin anima' chwe cumal tak lej que pasa, chinitzuktzubej cuc' tak mansa'n, camic c'u quinban che lok'ok'enic!

⁶ ¡Chucojo' ri u mox k'ab chuxe' ri nu jolom, chi nu matze'j c'ut ruc' ri riquiak'ab!”

Ri achi xubij:

⁷ “Chichi'j chwe, ixokib aj Jerusalen, cumal tak ri masat aj lianic xukuje' cumal tak ri ati'tab tak masat ri e c'o pa ri c'ache'laj, quiya' la latz' che ri u waram ri nu lok'ok'ebal c'uxaj. ¡Chiya' che chi warok c'ä jampa' chraj chc'astajok!”

Ucab bix Ri ixok xubij:

⁸ “¡Ulem cuban ri quinlok'ok'ej! ¡Quinta' chi apanok ri u ch'abal! Cach'opinic petinak paquiwi' nimak tak juyub, cach'opinic petinak chquixo'l ri alaj tak juyub.

⁹ Ri nu lok' jacha' jun masat aj c'ache'laj: jacha' jun cojol masat. ¡C'o chic, chrij ri oquibal, cäca'y pa ri wenta'n, cätzun chrij ri k'atibal!

¹⁰ Ri quinlok'ok'ej xubij chwe: ‘Chatwalijok, nu lok'; aninak, nu lok', jo'.

¹¹ ¡Chawila' xoc'ow ri tew xukuje' ri jäb xbe junam ruc'!

¹² E pak'inak chic ri cotz'i'j pa ri juyub, opaninak ri k'ijol re bixonic, cätataj chic ri cok'ebal tak tucumux.

¹³ E wächininak chic ri higo puwi' ri u che'al, xukuje' ri ticbal tak uva caquijabuj ri qui c'oc'al. Chatwalijok, nu lok', aninak nu lok', jo'.

¹⁴ Nu palomax ri quebac'u' awib xo'l tak ri abaj, pa tak chicajil xukuje' c'axalaj tak c'ubal ib chaya' chwe chi quinwil ri a palaj, chaya' chwe chi quinta' ri a ch'abal. ¡Man c'o ta c'o wi ri awilic! ¡Sibalaj qui' ri a tatabexic!’ ”

Quicabichal xquibij:

¹⁵ “Chebichapa' tak ri yac, ri alaj tak yac ri caquiban c'ax chque tak ri ka uva ri e ka ticom, ri e ka ticom tak uva ri e cotz'i'jinak.”

Ri ixok xubij:

¹⁶ “Ri nu lok' xukuje' c'u ri in in rech. Ri are' quebuyuk'uj ri u jumulaj chquixo'l tak ri roxox.

¹⁷ Pa ri ropanem ri k'ij quebanimaj tak c'ut ri mumu'j, chattzelejok nu lok'; je chabana' jacha' jun masat aj lianic, jacha' jun alaj masat pa tak ri juyub ri quiquemalam wi tak quib ri q'uix.”