Bixonic Tak 1 - Quiché Bible

Bixonic quech tak ri bix

¹ Ri sibalaj je'l na chquiwäch tak ri e u bix ri Salomon.

Nabe bix Ri ixok xubij:

² “¡Chaya' nu chi' cumal ri e a chi'! E qui' na chuwäch ri u wa'l uva ri e awajwanic,

³ Ri e a c'oc'al sibalaj e je'l na che ri nu sikbal, ri a bi' c'oc'al ri jamin. ¡Rumal c'u ri', catcaj ri ixokib!

⁴ ¡Ruc' aninakil chinac'ama' bic awuc'! ¡Chinac'ama' bic o ajawinel, pa tak ri e a jekelibal!” “Awuc' cujejajat wi na; e c'o na ri e u rayixic tak ri e awajwanic chke chuwäch ri u wa'l uva. ¡Jacha' ba' catcaj ri ixokib!”

Ri e rachil xquibij: Ri ixok xubij:

⁵ “Ixokib aj Jerusalen, in räxbak'alic in c'u ne je'lic; räxbak'alic jacha' tak ri e qui cäbal tak ri e aj ri Sedar, je'lic e jacha' ri e u k'atibal ri Salomon.

⁶ Mixoc il chwe chi in räxbak'alic, mawi chi c'atisam ri nu tz'umal rumal ri k'ij. Ri e nu xibal xeboyowar wuc', xinquicoj c'u che qui chajixic ri ticbal tak uva, ¡Are c'u ri kas nu ticbal uva man xinwilij ta chic!

⁷ Chabij chwe, u lok'ok'ebal c'u'x ri nu c'aslemal, ¿Jawije' quebayuk'uj wi tak ri a jumulaj? ¿Jawije' quebac'am wi bic che uxlanem aretak curik ri tiq'uil k'ij? ¿Jas ta che xak quinbinic jacha' jun wacatel, Chquinakaj tak ri e qui jumulaj tak ri e awachil?”

Ri e rachil xquibij:

⁸ “We man aweta'm at, je'lic chquixo'l tak ri je'lic, Chatakej ri cakan ri jumulaj chebayuk'uj c'ut ri alaj tak a q'uisic' chquinakaj tak ri qui cäbal ri ajyuk'ab.”

Ri achi xubij:

⁹ “Ri at chwe in, nu lok', catjunamataj ruc' ri je'licalaj ati't quiej re ri u carwaj ri ajawinel paraon.

¹⁰ ¡Sibalaj e je'lic ri jutak peraj a palaj chquixo'l ri u wi'tak xquinaj! ¡Sibalaj je'lic ri a kul chquixo'l tak ri chachal!

¹¹ ¡Quekaban u wi' tak a xiquin re k'an puak quekach'ap tak sak puak chupam!”

Ri ixok xubij:

¹² “Joropa' ri cäbeytaj ri ajawinel pa ri mexa, ri nu nard cäc'oc'at ri ruxlab.

¹³ Ri nu lok' chwe in jacha' ri alaj juyat'aj mir ri c'o amak'el chquixo'l ri e uwo nu c'u'x.

¹⁴ Ri quinlok'ok'ej jacha' ri cotz'i'j pok' ri c'o chquixo'l ri juwi' tak uva pa En-gad.”

Ri achi xubij:

¹⁵ “¡Sibalaj at je'lic nu lok', sibalaj at je'lic! ¡Ri e a bak'wäch e quieb palomax!”

Ri ixok xubij:

¹⁶ “¡Sibalaj at je'lic nu lok', sibalaj at je'lic!” “¡Ri k'ayes ri cätojtatic are ka soc!

Ri achi xubij:

¹⁷ Ri e chacalte' tak e are' ri e u temal ri kachoch, ri q'uisis tak, e are' ri e u wi' ri kachoch.”