Apocalipsis 6 - Quiché Bible

Ri wukub t'ikbal

¹ Xinwilo aretak ri Alaj Chij xujak jun chque ri wukub t'ikbal. Xinta' jun chque ri quiejeb awaj, chi xubij chwe ruc' jun ch'abebal ri je ta ne cakulja: “¡Tasaj!”

² Xinca'yic, xinwil jun sak rij quiej. Ri t'uyul chrij ruc'am jun q'uiakbal ch'ab. Xya' jun u corona'. Ch'äcanel c'ut xel bic che u rikic ch'äcänic.

³ Aretak ri Alaj Chij xujak ri ucab t'ikbal, xinta' ri ucab awaj, ri xubij: ¡Tasaj!.

⁴ Xel ulok jun quiej chic, quiäk rij. Ri t'uyul chrij, xya' chuk'ab che chi cäresaj bic ri jamaril chquixo'l ri winak cho ri uwächulew, cäquicämisala' c'u quib. Xya' c'u jun nimalaj ch'ich' re ch'o'j che.

⁵ Aretak ri Alaj Chij xujak ri urox t'ikbal, xinta' ri urox awaj xubij: “¡Tasaj!” Xinca'yic, xinwil c'u jun k'ek rij quiej. Ri t'uyul chrij, c'o jun pajbal pa u k'ab.

⁶ Xinta' jun ch'abal pa qui niq'uiajil ri quiejeb awaj, ri xubij: “Quieb libra trico che ri cäch'ac che jun k'ij chac, wakib libra sebad che ri cäch'ac che jun k'ij chac. Masach c'u u wäch ri u wa'l uva mawi ri aseit.”

⁷ Aretak ri Alaj Chij xujak ri ucaj t'ikbal, xinta' ri u ch'abal ri ucaj awaj, xubij: “¡Tasaj!”

⁸ Xinca'yic, xinwil jun k'an rij quiej. Ri t'uyul chrij, “Cämical” u bi'. Terenem rumal jun ri cuq'uexwächij ri qui c'olbal ri cäminakib. Xya' takanic pa qui k'ab puwi' ri u cajil ri uwächulew, che u cämisaxic ruc' ch'ich' re ch'o'j, ruc' wi'jal, ruc' yabil, xukuje' cumal ri juyubal tak awaj re ri uwächulew.

⁹ Aretak ri Alaj Chij xujak ri uro' t'ikbal, xinwil chuxe' ri porobal ri canima' ri xecämisax rumal rech chi qui k'alajisam ri u tzij ri Dios.

¹⁰ Xquirak qui chi' ruc' chuk'ab, xquibij: “Ajawaxel, ri tastalic ri man cuban ta etzelal, xukuje' ri jic, ¿c'ä jampa' cäk'at la tzij paquiwi' ri e c'asal cho ri uwächulew? ¿C'ä jampa' cäya' la rajil u q'uexel ri ka quiq'uel chque?”

¹¹ Xya' sakloloj tak catz'iak chquijujunal, xbix chque chi cheuxlan chi na quieb oxib k'ij, c'ä quetz'akat na ri cach tak pataninelab xukuje' ri cachalal, ri xukuje' quecämisax na jacha' ri e are'.

¹² In xinwilo aretak ri Alaj Chij xujak ri uwak t'ikbal, xuban jun nimalaj cabrakan. Ri k'ij xk'ekaric jacha' jun wakwoj atz'iak. Ri ic' ronojel xux quiäk je jas ri quic'.

¹³ Ri ch'imil ri e c'o chicaj xetzak ulok cho ri uwächulew, jacha' ri u che'al higo ri cayicopisax rumal jun nimalaj quiakik' quebutzak ri e u higo ri man xquirik ta quichak'ajic.

¹⁴ Ri caj xesax apanok je ta ne jun wuj ri cäbotic. Conojel ri juyub xebel pa ri qui c'olbal, xukuje' ri ch'akatak tak ulew ri e c'o pa qui niq'uiajil tak ri plo.

¹⁵ Ri ajawinelab re ri uwächulew, ri nimak qui k'ij, ri e qui nimal ri ajch'ojab, ri k'inomab, ri c'o qui chuk'ab, conojel ri lok'om tak pataninelab, xukuje' conojel ri e tzokopitalic, conojel xcawaj quib pa tak ri jul xukuje' chquixo'l ri nimak tak abaj ri e c'o pa ri juyub.

¹⁶ Xquibij chque ri juyub xukuje' chque ri nimak tak abaj: “Chixtzak ulok pakawi'. Chujiwawaj chuwäch ri t'uyul puwi' ri tem re ajawibal xukuje' chuwäch ri royowal ri Alaj Chij,

¹⁷ xopan c'ut ri nimalaj k'ij cäpe ri c'äjisabal wächaj. ¿Jachin ta lo ri cäcuinic cätaq'ui' ta chuwäch?”