Apocalipsis 5 - Quiché Bible

Ri wuj xukuje' ri Alaj Chij

¹ Xinwil pa ri u k'ab re ri riquiak'ab ri t'uyul pa ri tem re ajawibal jun wuj ri tz'ibatal chupam xukuje' chrij t'ikom c'u cuc' wukub t'ikbal.

² Xinwil jun cowilaj tako'n aj caj ri xubij ruc' chuk'ab: “¿Jachin che ri ya'tal wi chi cujak ri wuj xukuje' quebuquir ri e u t'ikbal?”

³ Man c'o ta c'u jun pa ri caj, mawi cho ri uwächulew, mawi chuxe' ri ulew ri cäcuin che u jakic ri wuj, mawi che u ca'yexic.

⁴ Ri in sibalaj xinok'ic, rumal rech chi man c'o ta jun xriktajic ri ya'tal che chi cujak ri wuj, mawi che rilic.

⁵ Jun chque ri nimak tak tatayib xubij chwe: “Chatanaba' ok'ej. Chawilampe', ri coj aj ramak' Juda, ri rija'l ri David, are' ch'äcaninak che u jakic ri wuj xukuje' ri e wukub u t'ikbal.”

⁶ Pa u niq'uiajil ri tem re ajawibal, chquixo'l ri quiejeb awaj, xukuje' chquixo'l ri nimak tak tatayib, xinwil jun Alaj Chij. Chäcalic, je ta ne ri cämisam. C'o wukub ruc'a', c'o wukub u bak'wäch, are wa' ri wukub ruxlabal ri Dios ri e takom bic cho ronojel ri uwächulew.

⁷ Ri Alaj Chij xbe che u c'amic ri wuj pa u k'ab re u wiquiak'ab ri t'uyul pa ri tem re ajawibal.

⁸ Aretak xuc'am ri wuj, ri quiejeb awaj xukuje' ri juwinak quiejeb nimak tak tatayib xexuqui' chuwäch ri Alaj Chij. Chquijujunal cuc'am jujun arp xukuje' jujun lak re k'an puak e nojinak che c'oc' k'ol. Are wa' ri qui ch'awem ri e tastalic tak winak aj Dios.

Ri c'ac'alaj bix

⁹ Xquibixoj jun c'ac'alaj bix, xquibij: “Ya'tal che la chi cäc'am la ri wuj, chi quejak la ri e u t'ikbal, rumal rech chi xcämisax la, ruc' ri quiq'uel la xelok' la winak rech quebux rech ri Dios re conojel qui wäch winak, ch'abal, amak', nimak tak tinimit.

¹⁰ Banom c'u la chque chi quebux ajawinelab xukuje' e cojol tabal tok'ob chuwäch ri ka Dios, quebajawin c'u na paquiwi' ri uwächulew.”

¹¹ Xinca'yic, xinta' ri qui ch'abal q'ui tako'nib aj caj chrij ri tem re ajawibal. Xinta' ri qui ch'abal ri awaj xukuje' ri qui ch'abal ri nimak tak tatayib. Ri cajilabal miyonab chi e miyonab.

¹² Xquibij ruc' chuk'ab: “Takal che ri Alaj Chij ri xcämisaxic, chi cuc'am ri cuinem, ri k'inomal, ri no'j, xukuje' ri chuk'ab, xukuje' ri nim ilic, xukuje' ri juluwem xukuje' chi cak'ijilaxic.”

¹³ Conojel ri jastak ri e banom rumal ri Dios, ri e c'o pa ri caj, ri e c'o cho ri uwächulew, ri e c'o chuxe' ri ulew, ri e c'o pa ri plo, xukuje' conojel ri jastak ri e c'o chquipam, xinto chi cäquibij: “Che ri t'uyul pa ri tem re ajawibal xukuje' che ri Alaj Chij chyok wi ri tewichi'nic, xukuje' ri nim ilic, xukuje' ri juluwem, xukuje' ri cuinem amak'el chbe k'ij sak.”

¹⁴ Ri quiejeb tak awaj e c'aslic e k'ijilanelab xquibij: “Je' chbanok.” Ri juwinak quiejeb nimak tak tatayib xexuqui' xek'ijilan c'ut.