Apocalipsis 4 - Quiché Bible

Ri k'ijilanic pa ri caj

¹ Xuwi c'u xebitaj we jastak ri' xinca'yic, xinwil jun oquibal jaktal pa ri caj. Ri nabe ch'abal ri xinto jacha' ri rok'ebal jun trompet. Xubij chwe: “Chatpakal ulok waral, quebenc'ut na ri jastak chawäch ri rajawaxic quec'ulmax na oc'owinak chi c'u wa.”

² Chanim xinc'oji' pa ri Uxlabaxel. Xinwil jun tem re ajawibal ri yo'm pa ri caj, c'o c'u jun t'uyul puwi'.

³ Ri Jun t'uyul pa ri tem re ajawibal xiltaj ri u ca'yebal junam ruc' jun je'lalaj abaj re jasp o jun je'lalaj quiäk abaj cornalin, xinwil c'u jun räxquiak'ab ri cajuluwic jacha' jun je'lalaj räx abaj esmerald.

⁴ Chrij ri tem re ajawibal e c'o juwinak quiejeb (24) tem re ajawibal. E c'o juwinak quiejeb nimak tak tatayib e t'uyut'oj paquiwi' tak ri tem, qui cojom sakloloj tak atz'iak, qui cojom corona' re k'an puak che ri qui jolom.

⁵ Quebel ulok caypa', ch'abal, xukuje' cakulja pa ri tem re ajawibal. Quenicow c'u wukub chaj chuwäch ri tem. E are' c'u wa' ri wukub ruxlabal ri Dios.

⁶ C'o jun jasach chuwäch ri tem je ta ne jun plo ri carepc'unic jacha' ri cha. Pa ri u niq'uiajil ri tem xukuje' chrij ri tem e c'o quiejeb awaj e c'aslic e k'ijinelab e nojinak che bak'wächaj chquiwäch xukuje' chquij.

⁷ Ri nabe awaj je ta ne jun coj. Ri ucab awaj je ta ne jun alaj ama' wacax. Ri urox awaj je ta ne jun winak. Ri ucaj awaj je ta ne jun cot ri cätajin cärapinic.

⁸ Ri quiejeb awaj ri' e c'o wakitak qui xic' chquijujunal, e nojinak che bak'wächaj chquij xukuje' chquipam. Chi pa k'ij chi chak'ab man quebuxlan ta che u bixic: “U tasom rib, u tasom rib, u tasom rib ri Ajawaxel man cuban ta etzelal, ri Dios ri c'o ronojel u cuinem, ri c'o ulok ojer, ri c'olic, cäpe c'u na.”

⁹ Aretak ri awaj cäquiya' juluwem xukuje' nim ilic xukuje' k'ijilanic che ri t'uyul pa ri tem re ajawibal, che ri c'asal amak'el chbe k'ij sak,

¹⁰ ri juwinak quiejeb nimak tak tatayib quexuqui' chuwäch ri t'uyul pa ri tem re ajawibal, cäquik'ijilaj ri c'asal amak'el chbe k'ij sak, cäquiya' ri qui corona' chuwäch ri tem, cäquibij:

¹¹ “Kajaw xukuje' ka Dios, ya'tal che la ri u c'amic ri juluwem, ri nim ilic xukuje' ri cuinem. Lal xebanow la conojel ri jastak, rumal ri rayibal la e c'olic, xebantajic.”