Apocalipsis 21 - Quiché Bible

Ri c'ac'alaj caj xukuje' ri c'ac'alaj ulew

¹ Xinwil jun c'ac'alaj caj xukuje' jun c'ac'alaj ulew. Ri nabe caj xukuje' ri nabe ulew xeboc'owic. Xukuje' ri plo man c'o ta chic.

² Ri in Xuan xinwil ri tastalicalaj tinimit, ri c'ac'alaj Jerusalen, ri cäkaj ulok chicaj ruc' ri Dios. Ri suc'umam jas jun ali, ri quec'ulanok, wiktal che ri rachajil.

³ Xinta' jun cowilaj ch'abal ri xel ulok pa ri tem re ajawibal, ri xubij: “Chiwilampe', ri u kajebal ri Dios c'o chquixo'l ri winak. Cajeki' c'u na cuc'. Ri e are' quebux na u tinimit, kas are' ri Dios cac'oji' na cuc' cux c'u na qui Dios.

⁴ Cusu' na ronojel ri u wa'l qui wäch ri e ok'inak. Man c'o ta chi cämical. Man c'o ta chi bis, man c'o ta chi curak u chi' rumal c'ax, mawi c'o chi k'oxowem. Xeboc'ow c'ut ri nabe tak jastak.”

⁵ Xubij ri t'uyul puwi' ri tem re ajawibal: “Chawilampe', quinban c'ac' chque conojel ri jastak.” Te c'u ri' xubij chwe: “Chatz'ibaj rumal rech chi e jic xukuje' kastzij we tzij ri'.”

⁶ Te c'u ri' xubij chwe: “Xbantajic. In ri' ri nabe xukuje' ri q'uisbal, ri tiquiritajic xukuje' ri q'uistajic. Apachin ri cächaki'j u chi', quinya' na re ri q'uiyibal ja' re c'aslemal, ri xa' cäcochi'xic.

⁷ Are' c'ut ri cäch'äcanic cärechbej na we jastak ri'. Quinux na u Dios, ri are' cux na walc'ual.

⁸ Are c'u ri cäquixe'j quib, ri man quecojon taj, ri e tz'ilobinak cumal itzelalaj tak jastak, ri cämisanelab, ri xak cäcuc'aj quib cuc' achijab ixokib che qui banic ri macunic, ri cäquiban itzinic, ri cäquik'ijilaj tak diosib, ri e banal tak tzij, quebe ri e are' pa ri cho ri cänicow wi ri k'ak' xukuje' asubre, are wa' ri ucab cämical.”

Ri c'ac' Jerusalen

⁹ Xpe jun chque ri wukub tako'n aj caj ri e cuc'am ri wukub lak ri e nojinak che ri wukub q'uisbal tak c'axc'olil, xtzijon wuc', xubij: “Tasaj, quinc'ut na ri alibatz chawäch, ri cäc'uli' ruc' ri Alaj Chij, ri rixokil.”

¹⁰ Ri tako'n aj caj xinuc'am bic pa ri Uxlabaxel puwi' jun nimalaj juyub naj elinak chicaj. Xuc'ut ri tastalicalaj u tinimit ri Dios chnuwäch, ri Jerusalen, ri cätajin cäkaj ulok chicaj ruc' ri Dios.

¹¹ C'o c'ut ri u juluwem ri Dios che. Ri u tun cajunataj ruc' ri u tun ri jun abaj jasp ri sibalaj pakal rajil.

¹² C'o jun nimalaj tapia chrij naj ak'aninak. E c'o c'u cablajuj u chi', c'o c'ut jun tako'n aj caj che ri jujun u chi', e c'o c'u bi'aj etz'ibatal chque tak ri e u chi'. Ri bi'aj e are ri qui bi' ri cablajuj amak' aj Israel.

¹³ E c'o oxib u chi' pa ri elebal k'ij, oxib chic pa ri riquiak'ab ri elebal k'ij, oxib chic pa ri u mox ri elebal k'ij, xukuje' oxib chic pa ri u kajebal k'ij.

¹⁴ Ri tapia ri c'o chrij ri tinimit, e c'o cablajuj u tac'alibal. Paquiwi' wa' e c'o ri cablajuj qui bi' ri cablajuj takom ri e rech ri Alaj Chij.

¹⁵ Ri tako'n aj caj ri cätzijon wuc' ruc'am jun etabal re k'an puak che retaxic ri tinimit, ri e u chi', xukuje' ri tapia ri c'o chrij.

¹⁶ Ri tinimit cajtzalaj rij, ri u nimal, ri u rabic je jas ri u nimal ri u wäch. Xretaj c'u ri tinimit ruc' ri etabal, ri xel chuwäch are quiejeb sient cawinak lajuj (450) legua. Ri u nimal ri u rabic, ri u nimal u wäch, ri u chicajil xak e junam.

¹⁷ Xukuje' xretaj ri u pimal ri tapia ri c'o chrij, are jumuch' (80) bara'. Jacha' ri etabal aj winak ri cätajin cucoj ri tako'n aj caj.

¹⁸ Ri tapia abaj jasp cojom che u banic. Ri tinimit k'an puak cojom che u banic ri man c'o ta jun jasach chic yujam ruc', cachuplinic cajunamataj ruc' ri cha.

¹⁹ Ri u tac'alibal ri u tapia ri tinimit e wikom che ronojel qui wäch abaj pakal cajil: jasp ri nabe u tac'alibal, azul abaj sapir ri ucab, räx abaj agat ri urox, esmerald ri ucaj,

²⁰ onis ri uro', quiäk abaj cornalin ri uwak, k'an abaj crisolit ri uwuk, beril ri uwajxak, k'an abaj topas ri ubelej, crisopras ri ulajuj, räx abaj jasint ri ujulajuj, morato abaj amatist ri ucablajuj.

²¹ Ri cablajuj u chi' are cablajuj perl, chquijujunal ri e u chi' jun perl banbem rech. Ri be chupam ri tinimit are re k'an puak ri man c'o ta jun jasach chic yujam ta ruc', cachuplinic cajunamataj ruc' ri cha.

²² Man xinwil ta c'u ri k'ijilabal chupam. Are c'u ri k'ijilabal re we tinimit ri' are ri Ajawaxel, Dios ri c'o ronojel u cuinem xukuje' ri Alaj Chij.

²³ Ri tinimit man cajwataj ta ri k'ij che rech cuya' ri u sakil, mawi rajawaxic ri ic' che. Are c'u ri u juluwem ri Dios xjuluw puwi', are c'ut ri u chäj are' ri Alaj Chij.

²⁴ Ri tinimit tak quebin na pa ri u sakil. Ri ajawinelab re ri uwächulew cäquic'am na ulok ri qui juluwem che.

²⁵ Man quetz'apix ta ri u chi' ri tinimit pa k'ij, man c'o ta c'u chak'ab chila'.

²⁶ Quequic'am na ulok ri qui juluwem xukuje' ri nim quilic we tinimit ri' che.

²⁷ Man c'o ta jun tz'ilalaj jasach ri coc chupam ri tinimit. Man coc ta jun ri quebanow itzelalaj tz'il tak jastak, man coc ta jun banal tzij, xuwi queboc ri tz'ibatal qui bi' pa ri wuj re c'aslemal rech ri Alaj Chij.