Apocalipsis 2 - Quiché Bible

Ri xtz'ibax che ri comon cojonelab pa Epes

¹ “Chatz'ibaj che ri u tako'n ri comon cojonelab pa Epes: ‘Ri e c'o ri wukub ch'imil pa u k'ab re u wiquiak'ab, ri cäbin pa qui niq'uiajil ri wukub tzuc'ulibal re k'an puak, je cubij wa':

² E weta'm ri e a chac, ri e c'axalaj a chac, xukuje' ri a ch'ijonic, weta'm chi man quebak'i taj ri itzel tak winak. Weta'm chi xebanic'oj ri cäquibij quib chi e takom, man e je ta c'ut. Xebanic'oj c'ut chi e banal tak tzij.

³ C'o a ch'ijonic, at coch'oninak rumal rech ri nu bi', man at k'itajinak ta c'ut.

⁴ C'o c'u jas quinna' chawij, chi a yo'm can ri lok'ok'ebal c'u'x ri c'o awuc' nabe.

⁵ Chnataj ba chawe ri a banic canok ri at tzakinak wi. Chaq'uexa' ri a c'u'x, xukuje' chabana' ri chac ri xaban canok nabe. We c'u man jeri', quinbe awuc', quinwesaj na ri a tzuc'ulibal pa ri u c'olbal, we man caq'uex a c'u'x.

⁶ C'o c'u jun jasach ri utz cätajin cabano. Cawetzelaj u wäch ri qui chac ri nicolaitab, xukuje' in quinwetzelaj qui wäch.

⁷ Apachin ri c'o u xiquin, chutatabej ri cubij ri Uxlabaxel chque ri e comon cojonelab. Apachin ri cäch'äcanic, quinya' na re ri che' re ri c'aslemal pa tijic, ri c'o pa ri je'licalaj c'olbal ri c'o wi ri Dios pa ri caj.’ ”

Ri xtz'ibax che ri comon cojonelab pa Smirn

⁸ “Chatz'ibaj che ri u tako'n re ri comon cojonelab pa Smirn: ‘Ri nabe xukuje' ri q'uisbal, ri xcäm na, c'asal chi c'ut, je xubij wa':

⁹ Weta'm chi at c'o pa c'axc'olil, at meba', pune' c'ut at k'inom. Weta'm chi quixyok' cumal ri cäquibij quib chi e aj judeyib. Man e je ta c'ut, xane' e jun u comon ri Satanas.

¹⁰ Maxe'j awib chquiwäch ri c'ax ri carika' na. Chawilampe', ri itzel chanim quebuya' na jujun chiwe pa che', che c'ambejenic catoc'ow c'u na pa lajuj k'ij c'axc'ol. Chatux jic c'ä pa ri a cämical. Quinya' c'u na ri corona' re c'aslemal chawe.

¹¹ Apachin ri c'o u xiquin, chutatabej ri cubij ri Uxlabaxel chque ri e comon cojonelab. Apachin ri cäch'äcanic, man curik ta c'ax rumal ri ucab cämical.’ ”

Ri xtz'ibax che ri comon cojonelab pa Pergm

¹² “Chatz'ibaj che ri u tako'n ri comon cojonelab pa Pergm: ‘Ri c'o t'ist'icalaj u ch'ich' quieb upuchi' je cubij wa':

¹³ Weta'm ri at jekel chila' jawije' ri c'o wi ri u tem ri Satanas re ajawibal. Pune' at c'o chila', man a tzokopim ta c'u ne ri nu bi', man awesam ta awib che ri a cojonic chwe. Xukuje' ne pa tak ri u k'ij ri Antips ri jicalaj nu k'alajisanel, ri xcämisax chixo'l, jawije' ri jekel wi ri Satanas.

¹⁴ C'o c'u quieb oxib jastak quinna' chawij, rumal rech chi e c'o jujun chixo'l ri cäquiterenej ri u tijonic ri Balaam ri xuya' u no'j ri Balac che u banic macunic chquiwäch ri israelib, rech cäquitij ri jastak ri e yo'm chquiwäch tak ri diosib, xukuje' ri cuc'axic quib cuc' achijab ixokib che qui banic macunic.

¹⁵ Jeri' xukuje' e c'o jujun chixo'l ri cäquiterenej ri qui tijonic ri nicolaitab.

¹⁶ Chaq'uexa' ba' ri a c'u'x. We c'u man caq'uex a c'u'x, chanim quinbe awuc', quinch'ojin na cuc' ruc' ri ch'ich' ri quel ulok pa nu chi'.

¹⁷ Apachin ri c'o u xiquin, chutatabej ri cubij ri Uxlabaxel chque ri e comon cojonelab. Apachin ri cäch'äcanic, quinya' na re ri jaswa' pa tijic ri c'u'talic. Xukuje' quinya' na jun alaj sak abaj che, ri tz'ibatal wi jun c'ac' bi'aj ri man c'o ta jun etamaninak, xuwi ri cäc'amowic.’ ”

Ri xtz'ibax che ri comon cojonelab pa Tiatir

¹⁸ “Chatz'ibaj che ri u tako'n ri comon cojonelab pa Tiatir: ‘Ri u C'ojol ri Dios, ri e c'o u bak'wäch jas ri rak' k'ak' xukuje' ri rakan e junam ruc' k'an ch'ich', je cubij wa':

¹⁹ Weta'm jas ri a chac cabano. Weta'm ri lok'ok'ebal a c'u'x xukuje' ri a cojonic. Weta'm chi catpataninic xukuje' a coch'om ri c'ax, chi e q'ui na ri e a chac camic chuwäch ri nabe.

²⁰ Quinna' c'u wa' chawij: a yo'm c'u che ri ixok Jezabel, ri cubij rib chi k'axal tzij, chi quebutijoj ri nu pataninelab xukuje' chi quebusub che u banic macunic cuc' ixokib, xukuje' che u tijic jastak ri e cojom chquiwäch tak diosib.

²¹ In beytajinak che reyexic rech cuq'uex u c'u'x, man cäraj ta c'ut cuq'uexo. Man u yo'm ta can ri u banic ri u macunic cuc' achijab.

²² Chawilampe', quinbano chi ri Jezabel cäkaj pa ch'at. Ri quekaj pa macunic ruc', quinya' nimalaj c'axc'olil paquiwi' we man cäquiq'uex qui c'u'x, we man cäquiya' can ri e u chac ri are'.

²³ Quebencämisaj na ri e ral. Conojel c'u ri e comon cojonelab cäquich'ob na chi in ri' ri weta'm ronojel ri c'o pa ri qui chomanic xukuje' pa ri canima'. Quinya' c'u na chiwe chijujunal ri tojbal jacha' ri u cholajil ri e i chac.

²⁴ Quinbij, chque ri e c'o pa Tiatir, conojel ri man qui terenem ta we tijonic ri', ri man quetamam ta ri jastak re ri Satanas, jas ri cäquibij e are'. Man quinya' ta chi c'u na jun eka'n chque;

²⁵ ri c'o c'ut iwuc', mitzokopij c'ä quinpe na.

²⁶ Apachin ri cäch'äcanic, xukuje' ri quebutakej na qui banic ri nu chac c'ä pa ri q'uistajic, quinya' na u takanic paquiwi' ri nimak tak tinimit,

²⁷ jas ri nu Tat u yo'm takanic pa nu k'ab, cätakan c'u na paquiwi' ri nimak tak tinimit ruc' bara' re räx ch'ich', quebuc'äjij na je ta ne e lak re ulew.

²⁸ Quinya' na ri ch'imil chque aj u sakaribal.

²⁹ Apachin ri c'o u xiquin, chutatabej ri cubij ri Uxlabaxel chque ri e comon cojonelab.’ ”