Apocalipsis 18 - Quiché Bible

Xtzak ri Babilon

¹ E bantajinak chic we jastak ri', xinwil chi jun tako'n aj caj xkaj ulok chicaj, ri c'o nimalaj u takanic. Xtunun c'ut ri uwächulew rumal ri u juluwem.

² Xurak u chi' ruc' cowilaj ch'abal, xubij: “Xtzakic, xtzak ri nimalaj Babilon. Xban che chi itzel tak uxlabal e jekel chila'. Xban che chi are c'olbal re ronojel tz'ilalaj uxlabal, re ronojel tz'ilalaj chicop ri c'o u xic ri quetzelax u wäch.

³ Rumal ri u wa'l u uva conojel ri nimak tak tinimit xek'abar ruc' ri u rayixic ri u macunic. Ri ajawinelab aj uwächulew qui banom macunic ruc'. Ri ajc'ayib re ri uwächulew e k'inomarinak rumal ri u chuk'ab ri u k'inomal.”

⁴ Xinta' jun ch'abal chic chicaj, ri xubij: “Chixel bic pa ri Babilon, ix ri ix nu tinimit rech man quebikajbej taj ri e u mac mawi quebirik tak iwech ri c'ax ri queburiko.

⁵ Ri e u mac e opaninak c'ä cho ri caj. Ri retzelal xnataj che ri Dios.

⁶ Chiya' che jas ri u yo'm are' chque niq'uiaj chic, chicamulij ri rajil u q'uexel chiya' che. Chiyuju' jun uq'uia' che ri camul k'obisam chuwäch ri xuyuj chque niq'uiaj chic;

⁷ jacha' ri nimal ri xc'amowic, sibalaj xoc'ow u wi' ri u k'inomal, xa junam chibana' ba c'ax che, chiya' pa bis, rumal rech chi cubij pa ranima': ‘In t'uyul che chuchu' ajawinel, man in malca'n taj, man quinwil ta na bis.’

⁸ Rumal ri', xa' pa jun k'ij quepe na ri u rikoj c'ax: quepe na cämical, bis, wi'jal, xukuje' cäporox na pa k'ak'. C'o u chuk'ab ri Ajaw Dios ri cuk'attzij puwi'.”

⁹ Ri ajawinelab aj uwächulew ri xcuc'aj quib ruc' che qui banic macunic, ri qui mulin wi' k'inomal ruc', ri e are' cäquil na ri u sibal aretak cäc'atic, quebok' na, cäquiq'uis na quib che ok'ej puwi'.

¹⁰ E tac'atoj c'u apan chi naj, rumal rech chi cäquixe'j quib chuwäch ri c'ax ri xuriko, cäquibij: “¡C'ax awe, c'ax awe, nimalaj tinimit, Babilon, ri tinimit ri c'o u chuk'ab! Xa' c'u pa jun jok'otaj xpe ri k'atan tzij pawi'.”

¹¹ Xukuje' ri ajc'ayib re ri uwächulew quebok' na, quebison na che, rumal rech chi man c'o ta chic jun cälok'ow ri qui c'ay,

¹² ri qui c'ay re k'an puak, sak puak, abaj pakal tak rajil, perl tak, atz'iak re ch'uch'ujalaj lino xukuje' re seda, atz'iak morato xukuje' quiäk, ronojel c'oc'alaj che', ronojel jasach re marpil, ronojel jasach re che' pakal rajil, re k'an ch'ich', re sak ch'ich', re abaj marmol,

¹³ cane'l, pa eka'n, u c'oc'al tak c'oc' k'ol, mir, c'oc'al, u wa'l uva, aseit, utzalaj c'äj, trico, e wacax, e chij, e quiej, e carwaj; man c'o ta chi quelok'ow ri pataninelab, mawi ri qui c'aslemal ri winak.

¹⁴ Cäbix na che ri tinimit: “Man c'o ta chi awuc' ri jastak ri sibalaj xarayij pa awanima', jacha' ta ne chak' tak u wäch che'. Sachinak qui wäch conojel ri pakal cajil jastak xukuje' ri jastak ri quejuluwic, mawi jumul queriktaj chic.”

¹⁵ Ri e ajc'ay tak que we jastak ri', ri e k'inomarinak rumal ri tinimit, naj quetaq'ui' wi na apanok, rumal rech chi cäquixe'j quib chuwäch ri c'ax ri curiko. Quebok'ic, cäquiq'uis quib che ok'ej,

¹⁶ cäquibij c'u na: “¡Tok'ob u wäch, tok'ob u wäch ri nimalaj tinimit, ri u cojom atz'iak re ch'uch'ujalaj lino, atz'iak morato, xukuje' atz'iak quiäk, wiktal ruc' k'an puak, cuc' abaj pakal tak rajil, xukuje' cuc' tak perl!

¹⁷ Xa c'u pa jun jok'otaj xsach u wäch ri nimalaj k'inomal.” Conojel ri e c'amal qui be ri nimak tak jucub, conojel ri quebe pa nimak tak jucub puwi' ri plo, ri quechacun pa ri nimak tak jucub, xukuje' conojel ri quechacun pa ri plo, xetaq'ui' chi naj.

¹⁸ Aretak xquil ri u sibal ri tinimit ri cäc'atic, xquirak qui chi', xquibij: “¿La c'o ta chi lo jun tinimit ri junam ruc' we nimalaj tinimit ri'?”

¹⁹ Xquiya' ulew pa qui jolom, xquirak qui chi', xebok'ic, sibalaj xebisonic, je caquibij wa': “¡Tok'ob u wäch, tok'ob u wäch ri nimalaj tinimit! Conojel ri c'o nimak tak qui jucub pa ri plo e k'inomarinak rumal ri q'uialaj u k'inomal. ¡Xa c'u pa jun jok'otaj xsach u wäch ronojel!

²⁰ Caj, chatquicot puwi' ri tinimit, ix tastalic tak winak aj Dios, ix takomxenlab, xukuje' ix k'axal tak tzij, u banom c'ut ri Dios ri suq'uilal chiwe rumal ri u c'äjisaxic u wäch.”

²¹ Jun cowilaj tako'n aj caj xuwalijisaj jun abaj jas jun nimalaj ca', xuq'uiak bic pa ri plo, xubij: “Je u q'uiakic wa' ri nimalaj tinimit Babilon cäbanic ruc' chuk'ab, mawi jumul cäriktaj chic.

²² Man quetataj ta chic ri cok'ebal ri arp xukuje' ri ajk'ojomab, ri cok'ebal ri su' xukuje' tak ri trompet. Man c'o ta chi winak awuc' ri quena'w ta che tak chac. Xukuje' ri u juc'uq'uic ri ca' man cätataj ta chic awuc'.

²³ Ri u sakil jun chäj man cäjuluw ta chic awuc'. Man cätataj ta chi awuc' ri u ch'abal ri ach'ajilaxel mawi ri lok'om pataninel. Ri e ajc'ayib ri xebel bic iwuc' nabe canok e are' ri nimak na qui k'ij cho ri uwächulew, xebasub conojel ri nimak tak tinimit cumal tak ri e awitzinic.”

²⁴ Chupam ri tinimit ri' xriktaj wi ri qui quiq'uel ri k'axal tak tzij, xukuje' ri tastalic tak winak aj Dios, ri e cämisam cho ri uwächulew.