Apocalipsis 14 - Quiché Bible

E q'ui xquibixoj jun c'ac'alaj bix

¹ Xinwil ri Alaj Chij tac'al puwi' ri juyub Sion. E c'o jun sient cawinak quiejeb mil (144,000) winak ruc'. Tz'ibatal c'u ri u bi' ri Alaj Chij xukuje' ri u bi' ri u Tat cho ri u metz'al ri qui palaj.

² Xinta' jun ch'abal chicaj, jas ri qui chojojem q'uialaj ja', jas ri rok'ebal jun nimalaj cakulja. Ri ok'ebal ri xinto, are jacha' ri que ok'esan tak arp ri cäcok'isaj ri e q'ui arp.

³ Xquibixoj c'u jun c'ac' bix chuwäch ri tem re ajawibal, chquiwäch ri quiejeb awaj, xukuje' chquiwäch ri nimak tak tatayib. Man c'o ta c'u jun cäcuinic cäretamaj ri bix, xuwi ri jun sient cawinak quiejeb mil (144,000), ri xelok' chquixo'l ri e aj uwächulew.

⁴ E are wa' ri man xquitz'iloj ta quib cuc' ixokib, mawi xec'uli'c. Are wa' ri queterenem ri Alaj Chij apawije' ta ne ri cäbe wi. Ri xelok' chquixo'l ri winak che ri Dios xukuje' che ri Alaj Chij, je ta ne ri e nabe tak u wächinic ri tico'n.

⁵ Man xriktaj ta c'u jun banoj tzij pa qui chi', e ch'ajch'oj.

Ri tzijol ri xequiya' ri oxib tako'nib aj caj

⁶ Xinwil chi jun tako'n aj caj ri cärapin pa u niq'uiajil ri caj. C'o ri junalic tzij re colobal ib ruc', che u tzijoxic chque ri e c'o cho ri uwächulew, chque conojel ri nimak tak tinimit, xukuje' conojel amak', conojel ch'abal, xukuje' conojel winak.

⁷ Xubij ruc' chuk'ab: “Chixe'j iwib chuwäch ri Dios. Chinimarisaj u k'ij, rumal rech chi xopan ri jok'otaj aretak cuk'at tzij. Chik'ijilaj ba ri xbanow ri caj, ri ulew, ri plo xukuje' ri e u q'uiyibal tak ja'.”

⁸ Petinak chi c'u jun ucab tako'n aj caj chrij, ri je cubij wa': “¡Tzakinak, tzakinak ri nimalaj Babilon, ri rumal ri u wa'l ri u uva xebuk'abarisaj conojel ri nimak tak tinimit ruc' ri nimalaj qui rayinic che qui banic macunic ruc'!”

⁹ Jun urox tako'n aj caj xterenenic, xubij ruc' chuk'ab: “We c'o jun cuk'ijilaj ri itzel awaj xukuje' ri u wächbal, cumaj c'ut u c'amic retal cho ri u metz'al ri u palaj o che ri u k'ab,

¹⁰ are ri' caruq'uiaj na re ri u wa'l uva ri c'äjisabal u wäch rumal ri Dios, ri man c'o ta jun jasach chic yujam ruc', suc'umam pa ri lak re ri royowal. Curik na c'ax rumal ri k'ak' xukuje asubre chquiwäch ri e tastalicalaj tak tako'nib aj caj xukuje' chuwäch ri Alaj Chij.

¹¹ Ri u sibal ri quiriko c'ax cäpaki' amak'el chbe k'ij sak, man c'o ta uxlanem mawi pa k'ij mawi chak'ab chque ri cäquik'ijilaj ri itzel awaj xukuje' ri u wächbal, quic'amom c'ut ri retal ri u bi'.”

¹² Chi' quil wi, ri quicoch'onic ri tastalic tak winak ri quequinimaj ri u takanic ri Dios xukuje' ri cojonic che ri Jesus.

¹³ Xinta' jun ch'abal chicaj, ri xubij: “Chatz'ibaj wa': ‘Utz que ri quecäm pa ri Ajawaxel. Cäminakib ri e rech ri Ajawaxel ri camic xukuje' ri que takem na ri que cämic.’ ” “Je',” cächa ri Uxlabaxel, “quebuxlan na che ri qui chac, queteri c'u bic ri qui chac chquij.”

Ri k'atoj re ri uwächulew

¹⁴ Xinca'yic, xinwil jun sakloloj sutz'. C'o jun t'uyul puwi' ri sutz' ri je ta ne cäpe jun rija'l winak. C'o jun corona' re k'an puak che ri u jolom, c'o jun t'ist'icalaj jos pa u k'ab.

¹⁵ Jun chic tako'n aj caj xel ulok pa ri rachoch Dios, xurak u chi' ruc' chuk'ab che ri t'uyul puwi' ri sutz', xubij che: “Chacojo' ri a jos, chatk'atowok. Xopan ri jok'otaj re ri k'atoj. Chaki'j chic ri k'atoj re ri uwächulew.”

¹⁶ Are c'u ri t'uyul puwi' ri sutz' xucoj ri u jos cho ri uwächulew, xbantaj ri k'atoj cho ri uwächulew.

¹⁷ Jun chic tako'n aj caj xel ulok pa ri rachoch Dios ri c'o pa ri caj. Xukuje' ri are' ruc'am jun t'ist'icalaj u jos.

¹⁸ Jun chic tako'n aj caj, ri c'o takanic pa u k'ab puwi' ri k'ak', xel ulok cho ri porobal. Co xch'awic ruc' chuk'ab che ri c'o ri t'ist'icalaj u jos, xubij: “Chacojo' ri t'ist'icalaj a jos, chebamaca ri u wäch ri uva ri e c'o cho ri uwächulew, e chak' chic ri uva.”

¹⁹ Ri tako'n aj caj xucoj ri u jos cho ri uwächulew, xumol ri qui wäch ri qui uva ri e c'o cho ri uwächulew, xuq'uiak pa ri nimalaj pitz'bal uva. Are c'u wa' ri nimalaj c'äjisabal wächaj ri cuya' ri Dios.

²⁰ Xepitz' c'u ri uva chrij ri tinimit. Xel c'u bic quic' pa ri pitz'bal uva ri xak'an c'ä pa ri jiq'uibal u pa qui chi' ri quiej, xetakal c'ä pa oxc'al quieb (62) legua.