Apocalipsis 12 - Quiché Bible

Ri ixok xukuje' ri dragon

¹ Xilitaj c'u jun nimalaj etal pa ri caj: Jun ixok u cojom ri k'ij che ratz'iak, c'o ri ic' chquixe' ri rakan, c'o jun corona' re cablajuj ch'imil che ri u jolom.

² Yawab winak chic. Curak u chi', c'o k'oxowem re alc'ualanic che, curik c'ax che alc'ualanic.

³ Xilitaj chi jun etal pa ri caj: Xinwil jun nimalaj dragon quiäk rij, ri e c'o wukub u jolom, e c'o lajuj ruc'a', paquiwi' ri e u jolom e c'o wukub corona'.

⁴ Ri u je' xujuruj ri coxil ch'imil ri e c'o cho ri caj, xebuq'uiak ulok cho ri uwächulew. Ri dragon xuya' rib chuwäch ri ixok, ri xa co'l man calc'ualanic, chutijic ri ral ri ixok aretak cäralc'ualaj.

⁵ Ri ixok xralc'ualaj c'u jun ral ala, ri cätakan na paquiwi' conojel ri nimak tak tinimit ruc' jun bara' re räx ch'ich'. Are' c'u ri ral ri ixok xtokix bic, xc'am bic chuwäch ri Dios xukuje' chuwäch ri u tem re ajawibal.

⁶ Ri ixok xanimaj bic pa ri chaki'j uwo sak, jawije' suc'umam wi jun u c'olbal rumal ri Dios, rech chila' cätzuk wi jun mil quieb sient oxc'al (1260) k'ij.

⁷ Xban jun nimalaj ch'o'j pa ri caj. Are ri Miquel xukuje' ri u tako'nib aj caj xech'ojin ruc' ri dragon. Ri dragon xukuje' ri u tako'nib xech'ojinic,

⁸ man xech'äcan ta c'ut. Xukuje' mawi c'o chic qui c'olbal pa ri caj.

⁹ Xq'uiak c'u bic ri nimalaj dragon, ri ojer cumätz, ri cäbix itzel xukuje' Satanas che, ri quebusub conojel ri winak. Xq'uiak bic cho ri uwächulew. Xukuje' ri u tako'nib xeq'uiak bic ruc'.

¹⁰ Te c'u ri' xinta' jun nimalaj ch'abal pa ri caj, ri xubij: “Opaninak ri colonic, ri u cuinem ri Dios, xukuje' ri rajawinic. C'o chic ri takanic pa u k'ab ri Crist. Are c'ut ri tzujul quech ri kachalal ri quebutzujuj chuwäch ri ka Dios chi pa k'ij chi chak'ab q'uiakom bic.”

¹¹ Ri e are' xech'äcan puwi' rumal ri u cuinem ri u quiq'uel ri Alaj Chij, xukuje' rumal ri tzij rech ri u k'alajisanic. Man nim ta xquil wi ri qui c'aslemal, xane' utz xquil wi quecämic rumal rech ri Crist.

¹² Rumal rech wa', chixquicotok, caj xukuje' ri ix ri ix jekel pa ri caj. ¡C'ax iwe ri ix ri ix c'o cho ri uwächulew xukuje' ri e c'o pa ri plo, rumal rech chi kajinak bic ri itzel iwuc', sibalaj c'o royowal! Reta'm c'ut chi xa quieb oxib k'ij chic c'olic.

¹³ Are c'u ri awaj dragon, aretak xrilo chi xq'uiak bic cho ri uwächulew, xrokataj ri ixok ri xralc'ualaj ral ala.

¹⁴ Xeya' c'u quieb u xic' rech nimalaj cot che ri ixok rech cäcuinic cärapapic pa ri c'olbal ri suc'uman che pa ri chaki'j uwo sak, naj che ri cumätz'. Chila' cätzuk wi na oxib junab ruc' niq'uiaj.

¹⁵ Ri cumätz xresaj ulok ja' pa u chi' je jas jun nima', xuq'uiak bic chrij ri ixok, rech cäc'am bic rumal ri nima'.

¹⁶ Ri ulew xuto' ri ixok. Ri ulew xujak ri u chi', xubik' ri nima' ri xuxawaj ulok ri dragon pa u chi'.

¹⁷ Xpe c'u royowal ri dragon chrij ri ixok. Xbe c'u che ch'ojinic chquij ri niq'uiaj e rija'l chic, ri qui nimam u banic ri u takanic ri Dios, jekel c'ut ri u k'alajisanic ri Jesus cuc'.

¹⁸ Xätaq'ui c'ut ri dragon puwi' ri u sanyebil ri plo.