Aj Levitib 9 - Quiché Bible

Ri Aaron cuchaplej u cojic tabal tok'ob

¹ Pa ri uwajxak k'ij, ri Moises xusiq'uij ri Aaron e rachil ri e u c'ojol, xukuje' ri nimak tak tatayib re Israel;

² xubij c'u che ri Aaron: “Chac'ama' jun alaj ama' wacax che tabal tok'ob re cuyubal mac, xukuje' jun ama' chij ri man c'o ta u yab che tabal tok'ob ri cächajirisaxic chebaya' c'u chuwäch ri Ajawaxel.

³ Chabij chque ri aj israelib: chi chquic'ama' ulok jun alaj ama' q'uisic' che tabal tok'ob re cuyubal mac, jun alaj ama' wacax xukuje' jun alaj ama' chij re jujun qui junab ri man c'o ta qui yab ri queya' che tabal tok'ob ri quechajirisaxic,

⁴ xukuje' jun ama' wacax, xukuje' jun ama' chij ri quepil chuwäch ri Ajawaxel che tabal tok'ob re utzirisan ib, xukuje' chquic'ama' ulok jun sipanic re c'äj ri yok'om aseit ruc'; culuc'utu' c'u na rib ri Ajawaxel chiwäch camic.”

⁵ Ri aj israelib xequic'am ulok c'ä chuwäch ri Lic'om Rachoch Dios re rikoj ib ri xtakan wi ri Moises, conojel c'u ri aj israelib xekebic, xetaq'ui' c'u na chuwäch ri Ajawaxel.

⁶ Xubij c'u ri Moises chque: “Are wa' ri takanic ri xuya' ri Ajawaxel. Chibana', cuc'ut c'u na rib ri Ajawaxel chiwäch ruc' nimalaj juluwem.”

⁷ Xubij c'u ri Moises che ri Aaron: “Chatkeb ruc' ri porobal, chaya' ri tabal tok'ob re ri cuyubal a mac xukuje' ri awaj re tabal tok'ob ri cächajirisaxic rech quecuyutaj ri a mac xukuje' ri qui mac ri aj israelib. Xukuje' chaya' ri qui sipanic ri aj israelib che cuyubal qui mac, jacha' ri takanic ri xuya' ri Ajawaxel.”

⁸ Xkeb c'u ri Aaron ruc' ri porobal, xutok' u kul ri alaj ama' wacax ri cuchi'j qui mac quech ri e u mac.

⁹ Ri e u c'ojol xquiya' ri quic' che ri Aaron, ri Aaron xurub ri u wi' u k'ab pa ri quic' xubil chquij ri uc'a' re ri porobal, are c'u ri quic' ri xtotajic, xujamij pa rakan ri porobal.

¹⁰ Xuporoj c'u ri xepo rachilam quieb quinak', xukuje' ri u xepoyil ri u seseb ri awaj ri xpil u mac rech ri macaj, jacha' ri takanic ri u yo'm ri Ajawaxel che ri Moises.

¹¹ Are c'u ri ti'j xukuje' ri tz'um, xuporoj pa k'ak' chrij ri tinimit.

¹² Ri Aaron xutok' u kul ri awaj ri cäya' che tabal tok'ob ri cächajirisaxic, e are' c'ut ri e u c'ojol xquic'am bic ri quic' ri xujamij ri Aaron puwi' xukuje' pa tak uxcut ri porobal.

¹³ Xquic'am c'u bic ri u jolom ri awaj che, rachil ri u ti'jal ri cächi'x che tabal tok'ob ri cächajirisaxic ri Aaron xuporoj ri ti'j puwi' ri porobal.

¹⁴ Xebuch'aj c'u ri ti'j chupam xukuje' tak ri ra', xebuporoj c'u puwi' ri porobal.

¹⁵ Ri Aaron xuchi'j xukuje' ri qui sipanic ri aj israelib. Xuc'am ri alaj ama' q'uisic' ri are tabal tok'ob u mac rech ri u mac ri tinimit, xutok' c'ut ri u kul, xuchi'j c'ut qui mac ri macaj, jacha' ri xuban che ri nabe sipanic.

¹⁶ Aretak xujach ri awaj ri cachi'x che ri tabal tok'ob ri cächajirisaxic je xuban che jas ri jekebam u banic.

¹⁷ Xujach c'ut ri sipanic quech c'äj, ri xuc'am jumuk' che, ri xuporoj puwi' ri porobal, e c'o chi c'u wi na ri' ri tabal tak tok'ob ri que chajirisax ak'abibal.

¹⁸ Ri Aaron xukuje' xutok' u kul ri ama' wacax, xukuje' ri chij ri xquichi'j ri aj israelib che tabal tok'ob re utzirisan ib, ri e u c'ojol xquic'am bic ri quic' che, xujamij c'u ri Aaron puwi' xukuje' pa tak uxcut ri porobal;

¹⁹ xukuje' xquijach ri e u xepoyil ri ama' wacax che, xukuje' ri e rech ri ama' chij, ri e qui je', ri xepo ri e c'o chquij ri ti'j chupam, ri e quinak' xukuje' ri seseb ri c'o wi xepo,

²⁰ xequiya' c'ut ri xepoyil cuc' tak ri e uwo c'uxaj. Xebuporoj c'ut ri Aaron puwi' ri porobal.

²¹ E are' tak cuc' ri e uwo c'uxaj, cachil ri a'aj aj iquiak'ab, xuwi xuban ri xban che qui jachic chuwäch ri Ajawaxel, jacha' ri takanic ri u yo'm che ri Moises.

²² Ri Aaron xebuyac ri u k'ab paquiwi' ri aj israelib, xebutewichi'j; aretak jachtajinak chic ri tabal tok'ob u mac rech ri macaj, ri tabal tok'ob ri cächajisaxic, xukuje' ri tabal tok'ob re utzirisan ib xbec xuya' can ri porobal.

²³ Xoc c'u ri Moises rachil ri Aaron chupam ri Lic'om Rachoch Dios re rikoj ib, aretak c'u xebel ulok xequitewichi'j ri aj israelib xuc'ut c'u rib ri Ajawaxel ruc' nimalaj juluwem chquiwäch conojel ri tinimit.

²⁴ Xel ulok k'ak' chuwäch ri Ajawaxel, xuporoj ri awaj ri poroxic rij, xukuje' tak ri xepo ri c'o puwi' ri porobal. Aretak xquil conojel ri aj israelib xquirak qui chi' ruc' quicotemal, xquimej quib c'ä xquiya' na ri qui palaj cho ri ulew.