Aj Levitib 5 - Quiché Bible

Jalan tak tabal tok'ob rumal rech ri macaj

¹ “We c'o jun winak cäsiq'uix che u k'alajisaxic ri xrilo o xuto, man cuya' ta c'u u bixic, cuban jun macaj rajawaxic c'ut are' queka'n na ri chak'maquil.

² We c'o jun winak cuchap jun jasach tz'il, jacha' jun cäminak awaj tz'il, we aj juyubal, we aj uwo ja, we ri cujuruj rib ri tz'il, cacanaj xukuje' tz'il, cux c'u ajchak'mac, pune' man c'o ta xunabej.

³ We c'o jun cuchap u tz'ilol jun winak, apachique jasach ri catz'ilobisax rumal man xuch'ob ta c'ut, we c'u c'äte cuch'obo cux ajchak'mac.

⁴ We c'o jachin jun quel ulok pa u chi' ruc' aninakil jun chi'nic ri kas cäban na, cacha' che u banic ri utz o ri man utz taj (chque we chi'nic ri' ri kas cäban na ri quebixic ri man cächomax ta na), man c'u cunabej taj pa ri jok'otaj ri' we c'u c'äte' cunabej na cux na aj chak'maquil che jun we jastak ri'.

⁵ Jachin ri quetamatajic chi macuninak pa jun chque we jastak ri', rajawaxic cuk'alajisaj ri macaj ri u banom;

⁶ cujach na jun ati't awaj chuwäch ri Ajawaxel ri cresaj ulok chquixo'l ri u chij che tabal tok'ob u mac rech ri macaj ri bantajinak; cuya' cuc'am ulok jun ati't chij jun ati't q'uisic' rumal c'ut we tabal tok'ob ri', ri cojol tabal tok'ob curik ri sachbal u mac we winak ri'.

⁷ We c'u man cäcuin che u lok'ic jun alaj ama' chij, rajawaxic cuc'am na ulok chuwäch ri Ajawaxel quieb palomax o quieb tucumux u mac rech ri macaj ri bantajinak, jun chque che tabal tok'ob re sachbal mac ri jun chic che tabal tok'ob ri cächajirisaxic.

⁸ Quebuc'am ulok chuwäch ri cojol tabal tok'ob, are c'u nabe cuya' ri cachi'x che sachbal mac, cubak'atij ri u kul, man cuto'kopij ta c'u ri u jolom.

⁹ Cuchicoj c'u na jubik' ri u quiq'uel ri tabal tok'ob re sachbal mac pa jun u xcut ri porobal, are c'u ri cäto'taj can che ri quic', cuyitz' pa rakan ri porobal; tabal tok'ob wa' re sachbal mac.

¹⁰ Are c'u ri ucab cuya' che tabal tok'ob ri cächajirisaxic je jas ri nak'atisabal; xa jeri' ri cojol tabal tok'ob curik ri sachbal mac che ri mac ri u banom we winak ri', cäcuyutaj c'u ri u mac.

¹¹ We c'u ne man cäcuinic che qui lok'ic quieb palomax, mawi quieb tucumux, cuc'am na ulok che u sipanic, quiejeb libra ruc' niq'uiaj utzalaj c'äj che sachbal u mac. Man cuya' ta aseit ruc' mawi cuya' c'oc'alaj k'ol puwi', rumal rech chi are jun sipanic u mac rech ri macaj.

¹² Rajawaxic cuc'am ulok chuwäch ri cojol tabal tok'ob, ri cuc'am jumuk' jacha' che natabal, cuporoj c'u puwi' ri porobal, junam cuc' ri sipanic ri cäporox che u ya'ic u k'ij ri Ajawaxel, jun sipanic c'u wa' rumal rech ri macaj.

¹³ Rech curik ri cojol tabal tok'ob ri cuyubal mac, che apachique mac ri u banom we winak ri' cäcuyutaj c'ut ri u mac. Jacha' c'ut ri caban chque tak ri sipanic que c'äj ri cäto'taj canok, cäcanaj che ri cojol tabal tok'ob.”

Tabal tak tok'ob ri queya' che cuyubal macaj

¹⁴ Ri Ajawaxel xutzijobej ri Moises, xubij che:

¹⁵ “Ri winak ri camacunic ri man ruc' taj ri u rayibal cux c'u ajchak'mac re ri quit'orixic ri tastalic tak jastak rech ri Ajawaxel, rajawaxic cäresaj chquixo'l ri u tzobaj jun ama' chij ri man c'o ta jun u yab, jacha' tabal tok'ob u mac rech ri macaj, cuc'am c'u bic che ri Ajawaxel. Ri rajil ri ama' chij rajawaxic u chomaxic joropa' sak puak cäreklej je jacha' ri pajbal ri c'o chupam ri k'ijilabal.

¹⁶ Ri winak ri' cutoj na ri u t'orim chque ri tastalic tak jastak cuya' chi na jun u ro'il, ri cujach pa u k'ab ri cojol tabal tok'ob. Rumal c'u ri chij ri cäpil che cuyubal mac, ri cojol tabal tok'ob curik ri sachbal mac che ri u mac we winak ri', cäcuyutaj c'u ri u mac.

¹⁷ We c'o jun winak cämacunic, cuc'ulelaj c'u ri u takanic ri Ajawaxel, pune' man xuch'obo aretak xubano, cäcanaj ajchak'mac, cuch'ob c'ut chi macuninak.

¹⁸ Rumal ri' rajawaxic cäresaj na ulok jun ama' chij chquixo'l ri u chij ri man c'o ta u yab, at c'u catk'atow jas ri kas rajil, cuc'am c'u na bic che ri cojol tabal tok'ob jacha' che tabal tok'ob u mac rech ri macunic, rech cärik ri sachbal u mac we winak ri' ri man ruc' ta ri u rayibal xubano, cäsachtaj c'ut ri u mac.

¹⁹ Jun tabal tok'ob wa' u mac rech ri macunic, we winak ri' uxinak ajchak'mac chuwäch ri Ajawaxel.”