Aj Levitib 4 - Quiché Bible

Tabal tak tok'ob ri queya' che sachbal macaj

¹ Ri Ajawaxel xutzijobej ri Moises, xubij che:

² “Chabij chque ri aj israelib chi, aretak c'o jachin jun camacun chrij jun chque ri e u takomal ri Ajawaxel ri man ruc' ta ri u rayibal cuban ta c'u jun jasach ri man ya'tal ta u banic, are wa' ri cäban na:

³ We ri camacunic are' ri quinimal ri e cojol tabal tok'ob, cuban c'ut chi cakaj na ri macaj puwi' ri tinimit, rajawaxic cuchi'j na che ri Ajawaxel jun alaj ama' wacax ri man c'o ta u yab jacha' che tabal tok'ob u mac ri macaj.

⁴ Cuc'am na bic chuwäch ri Ajawaxel, chuchi' ri oquibal chupam ri Lic'om Rachoch Dios re rikoj ib, chila' cuya' wi ri u k'ab puwi' ri u jolom ri alaj ama' wacax, cutok' c'ut ri u kul chuwäch ri Ajawaxel.

⁵ Chwi chi c'u wa' kas are c'ut cuc'am na jubik' ri u quiq'uel ri alaj ama' wacax cuc'am c'u u bic chupam ri Lic'om Rachoch Dios re rikoj ib;

⁶ chila' curub wi ri u wi' u k'ab chupam ri quic' wukub mul c'ut cuchicoj chuwäch ri Ajawaxel chusuq'uil ri ch'ukubal u pam ri k'ijilabal.

⁷ Cubil xukuje' jubik' quic' chque tak ri e ruc'a' ri porobal ri caporox wi ri c'oc'alaj k'ol ri c'o chuwäch ri Ajawaxel, chupam ri Lic'om Rachoch Dios re rikoj ib, ronojel c'u ri quic' ri cäto'tajic cujamij pa rakan ri porobal re tabal tok'ob ri cächajirisaxic ri c'o chuchi' ri oquibal chuwäch ri Lic'om Rachoch Dios re rikoj ib.

⁸ Cäresaj ronojel ri u xepoyil ri alaj ama' wacax ri yo'm che sachbal mac, ronojel ri xepo ri c'o chquij ri ixco'l xukuje' ri c'o chquij ri ti'j chupam,

⁹ ri quieb u quinak', ri xepo ri c'o chquij, xukuje' ri c'o chquij ri uwo rachak; ri xepo ri c'o chrij ri seseb ri quesax junam ruc' ri quieb u quinak',

¹⁰ je cäban che jas ri resaxic ri quesax che ri wacax re ri tabal tok'ob re utzirisan ib, ri cojol tabal tok'ob cunicowisaj na puwi' ri porobal quech ri tabal tok'ob ri quechajirisaxic.

¹¹ Are c'u ri u tz'umal ri alaj ama' wacax, ronojel ri u ti'jal, cärachilaj ri u jolom, ri e ra', ri rixco'l xukuje' ri u mes,

¹² ronojel ri alaj ama' wacax, cäresaj bic cuya' pa jun c'olbal ch'ajch'oj chrij ri tinimit, jawije' ri cuya' quejamix wi ri chaj, chila' c'ut puwi' ri jumulaj chaj, canuc' wi ri si' cat'ik c'u k'ak' che.

¹³ We c'u conojel ri aj israelib caquiban jun etzelal ri man xquirayij ta u banic, man c'o ta c'u jun chque cänabenic chi ri qui banoj quebuc'ulelaj ri e u takomal ri Ajawaxel e uxinak c'u ajchak'maquib rumal wa',

¹⁴ aretak c'u quetamax ri mac ri qui banom, rajawaxic conojel junam cäquiya' jun alaj ama' wacax che tabal tok'ob u mac rech ri macaj. Caquic'am na u bic chuwäch ri Lic'om Rachoch Dios re rikoj ib.

¹⁵ Ri cäquiya' wi ri qui k'ab ri nimak tak tatayib ri e re ri tinimit puwi' ri u jolom ri alaj ama' wacax, chuwäch ri Ajawaxel, kas chila' c'ut cäquitok' wi na ri u kul.

¹⁶ Ri qui nimal ri cojol tabal tok'ob cuc'am na bic jubik' ri u quiq'uel ri alaj ama' wacax pa ri Lic'om Rachoch Dios re rikoj ib,

¹⁷ curub na ri u wi' u k'ab pa ri quic' cuchicoj wukub mul chuwäch ri Ajawaxel, chusuq'uil ri ch'ukubal.

¹⁸ Cubil na jubik' ri quic' chquij tak ri ruc'a' ri porobal ri c'o chuwäch ri Ajawaxel, chupam ri Lic'om Rachoch Dios re rikoj ib. Ronojel c'u ri quic' ri cäto'tajic, cujamij pa rakan ri porobal ri queporox wi ri tabal tok'ob ri cächajirisaxic ri c'o chuchi' ri oquibal chuwäch ri Lic'om Rachoch Dios re rikoj ib.

¹⁹ Xukuje' quesax na che ri alaj ama' wacax ronojel ri u xepoyil, caporox c'u na puwi' ri porobal;

²⁰ ri u bixic chi je cäban che we alaj ama' wacax ri' junam jas ri cuban che ri alaj ama' wacax ri capil u mac rech ri macaj, jeri' ri cojol tabal tok'ob curik na ri cuyubal qui mac we winak ri', casach taj c'u na ri macaj ri qui banom.

²¹ Cäresaj bic ri alaj ama' wacax chrij ri kajebal, cuporoj c'u na, jacha' ri caban che ri nabe alaj ama' wacax are c'ut ri tabal tok'ob u mac rech ri u mac ri tinimit.

²² We cämacun jun c'amal be cuban c'u jun jasach ri quebuc'ulelaj ri e u takomal ri Ajawaxel, cux na ajchak'mac pune' man xuban ruc' ri u rayibal.

²³ Aretak c'u cuch'obo chi macuninak cuc'am na bic jacha' che sipanic jun ama' q'uisic' ri man c'o ta jun u yab.

²⁴ Cuya' na ri u k'ab puwi' ri u jolom ri ama' q'uisic', cutok' ri u kul chuwäch ri Ajawaxel, pa ri c'olbal jawije' ri quepil wi ri awaj ri queporoxic, tabal c'u tok'ob u mac rech ri macaj.

²⁵ Ri cojol tabal tok'ob cuc'am na ruc' ri u wi u k'ab jubik' u quiq'uel ri awaj ri pilom u mac rech ri macaj, cubil na chquij ri e ruc'a' ri porobal ri cäporox wi ri tabal tok'ob ri cächajirisaxic, aretak cäbantaj wa' ri quic' ri cäto'taj canok cujamij pa rakan ri porobal,

²⁶ cuporoj c'u ronojel ri xepo puwi' ri porobal, jacha' ri cäban che ri u xepoyil ri tabal tok'ob re utzirisan ib. Jeri' ri cojol tabal tok'ob curik na ri cuyubal u mac ri c'amal be, cäsachtaj c'u na ri macaj ri banom.

²⁷ We jun winak ri man nim ta u k'ij cämacunic man ruc' ta ri u rayibal, cux c'u ajchak'mac chi xuban jun jasach ri quebuc'ulelaj tak ri e u takomal ri Ajawaxel,

²⁸ aretak c'u cuch'obo chi macuninak cuc'am na bic jun ati't q'uisic' ri man c'o ta jun u yab, jacha' sipanic u mac rech ri macaj ri bantajinak.

²⁹ Cuya' na ri u k'ab puwi' ri u jolom ri awaj ri xuchi'j u mac rech ri macaj, cutok' c'u na u kul pa ri c'olbal que ri tabal tok'ob ri quechajirisaxic.

³⁰ Ri cojol tabal tok'ob cuc'am ruc' ri u wi' u k'ab jubik' quic' cubil c'u chquij ri e ruc'a' ri porobal tabal tok'ob ri cächajirisaxic, ronojel c'u ri quic' ri cäto'tajic cujamij na pa rakan ri porobal.

³¹ Xukuje' rajawaxic quesax ronojel ri u xepoyil, jacha' ri cäban che resaxic che ri awaj ri cächi'xic jacha' che ri utzirisan ib caporox c'u puwi' ri porobal jacha' c'oc'alaj uxlab che ri Ajawaxel. Jeri' ri cojol tabal tok'ob curik na ri cuyubal mac u mac rech ri u mac we winak ri', casachtaj c'u na ri' ri macaj ri banom.

³² We ri winak ri' cuc'am ulok jun ati't chij che tabal tok'ob u mac rech ri macaj, rajawaxic cuc'am ulok jun ati't chij ri man c'o ta jun u yab.

³³ Cuya' ri u k'ab puwi' ri u jolom ri ati't chij, cutok' c'u ri u kul jacha' che tabal tok'ob u mac rech ri macaj pa ri c'olbal jawije' ri quepil wi ri awaj ri quebeporoxok.

³⁴ Are c'u ri cojol tabal tok'ob ruc' ri u wi' u k'ab, cuc'am jubik' ri u quiq'uel ri awaj ri yo'm che tabal tok'ob u mac rech ri macaj cubil chquij ri e ruc'a' ri porobal ri queporox wi ri tabal tok'ob ri quechajirisaxic ronojel c'u ri quic' ri cäto'tajic, cujamij pa rakan ri porobal.

³⁵ Cäresaj c'u ronojel ri u xepoyil, jas ri cäban che resaxic ri u xepoyil ri alaj ama' chij ri cächi'xic jacha' che tabal tok'ob re utzirisan ib, cuporoj c'u ri xepo puwi' ri porobal, junam ruc' ri sipanic ri porom che u ya'ic u k'ij ri Ajawaxel. Xa jeri' ri cojol tabal tok'ob curik na ri cuyubal mac u mac rech ri macaj ri xuban ri winak ri', cäsachtaj c'u na ri u mac.”