Aj Levitib 3 - Quiché Bible

Ri e tabal tok'ob re utzirisan ib

¹ “We c'o jachin jun cuc'am chquixo'l ri rawaj jun ati't wacax o jun ama' wacax che u chi'xic jun tabal tok'ob che ri Ajawaxel re utzirisan ib, ri awaj ri cächi'xic ma ta c'o jun u yab.

² Ri cäjachow ri sipanic quebuya' ri u k'ab puwi' ri u jolom ri awaj, cutok' c'u ri u kul chuchi' ri oquibal chupam ri Lic'om Rachoch Dios re rikoj ib. Ri e cojol tabal tok'ob, e are' quechicon ri quic' puwi' xukuje' pa tak u xcut ri porobal.

³ Ri cäjachow ri awaj che u chi'xic jun tabal tok'ob re utzirisan ib, rajawaxic cuya' chuwäch ri Ajawaxel, jacha' jun tabal tok'ob ri porom, ri xepo ri quech'ukuw ri ti'j chupam ri awaj,

⁴ ri quieb u quinak', ri xepo ri e c'o chquij, ri xepo ri e c'o paquiwi' ri uwo rachak, xukuje' ri xepo ri c'o chrij ri seseb, ri junam cäresaj cuc' ri quieb u quinak'.

⁵ Ri e cojol tabal tok'ob caquiban na chi canicow ronojel wa' puwi' ri porobal, junam ruc' ri awaj ri queporox puwi' ri si' ri cätajin canicowic, jacha' sipanic ri nicowisam ri c'oc' ruxlab che ri Ajawaxel.

⁶ We c'o jachin jun cuchi'j che ri Ajawaxel jun awaj ri cäresaj chuxo'l ri u tzobaj jacha' tabal tok'ob re utzirisan ib, rajawaxic cuchi'j jun ama' o jun ati't ri man c'o ta jun u yab.

⁷ We cuchi'j jun alaj ama' chij, aretak cuya' chuwäch ri Ajawaxel

⁸ Cuya' ri u k'ab puwi' ri u jolom, cutok' c'u ri u kul chuwäch ri Lic'om Rachoch Dios re rikoj ib. E are' tak c'ut ri e cojol tabal tok'ob caquichicoj na ri u quiq'uel ri awaj puwi' xukuje' pa tak u xcut ri porobal.

⁹ Ri cächi'n ri awaj che tabal tok'ob re utzirisan ib, rajawaxic cuya' che ri Ajawaxel, jacha' sipanic ri nicowisam, ri xepo, ri u je' tz'akat cäkopix c'ä che ri q'uisbal uwo rachak iquim, ri xepo ri quech'ukuw ri ti'j chupam ri awaj,

¹⁰ ri quieb u quinak' ri xepo ri e c'o chquij ri e c'o cho ri uwo rachak xukuje' ri xepo ri c'o chrij ri seseb ri junam cäresaj cuc' ri quieb u quinak'.

¹¹ Ri cojol tabal tok'ob cunicowisaj ronojel wa' puwi' ri porobal, jacha' che sipanic re wa ja' che u ya'ic u k'ij ri Ajawaxel.

¹² We ri awaj ri cuchi'j are' jun q'uisic', cuchi'j chuwäch ri Ajawaxel

¹³ cuya' na ri u k'ab puwi' ri u jolom, cuk'at c'ut ri u kul chuwäch ri oquibal chupam ri Lic'om Rachoch Dios re rikoj ib. E are c'u ri cojol tabal tok'ob quechicon na ri quic' puwi' xukuje' pa tak u xcut ri porobal.

¹⁴ Ri cachi'n ri awaj cuya' cuc'amo xukuje' cuyao, jacha' sipanic nicowisam che u ya'ic u k'ij ri Ajawaxel, ronojel ri xepo ri e ch'ukuwinak ri ti'j chupam,

¹⁵ ri quieb u quinak', ronojel ri xepo ri e ch'ukuwinak quij ri e c'o cho ri uwo rachak, xukuje' ri xepo ri c'o chrij ri seseb, ri junam queresaj cuc' ri quieb u quinak'.

¹⁶ Ri cojol tabal tok'ob cuporoj ronojel wa' puwi' ri porobal, jacha' sipanic re wa ja' canicowisaxic, ri cäc'oc'at ruxlab. Ronojel ri xepo cäya' che ri Ajawaxel.

¹⁷ Pixab wa' ri kas xa jumul cäjeki'c canok quebel cuc' ri tataxelab cäk'ax cuc' ri alc'ualaxelab, apawije' ta ne ri ix jekel wi: c'o jubik' xepo mitijo mawi quic'.”