Aj Levitib 24 - Quiché Bible

Ri aseit ri cajwataj che u ya'ic chäj

¹ Ri Ajawaxel xutzijobej ri Moises, xubij c'u che:

² “Chaya' takanic chque ri aj israelib chi cäquic'am ulok utzalaj aseit re aseitun ri cha'om u wäch, rech man cächup ta ri chäj.

³ Ri Aaron are quekle'n ri qui suc'umaxic, rech quenicow ronojel ri jun ak'ab chuwäch ri Ajawaxel chupam ri Lic'om Rachoch Dios re rikoj ib, chrij ri ch'ukubal ri c'o chuxcut ri caxa' re ri c'ulwächinic. Are jun pixab wa' ri cajeki'c ri caquiban ri tataxelab xukuje' alc'ualaxelab.

⁴ Quebusuc'umaj c'u na ri chäj puwi' ri tzuc'ulibal ri re utzalaj k'an puak rech quenicow chuwäch ri Ajawaxel.”

Ri caxlanwa ri cäya' chuwäch ri Ajawaxel

⁵ “Chac'ama' utzalaj c'äj chebachak'ajisaj cablajuj caxlanwa, re lajuj libra chquijujunal.

⁶ Chebaya' puwi' ri mexa ri re utzalaj k'an puak ri c'o chuwäch ri Ajawaxel, pa catunaj re wakitak caxlanwa chquijujunal.

⁷ Chaya' utzalaj c'oc' k'ol paquiwi' ri jutak nutaj, ri cajwataj che ri caxlanwa jacha' che sipanic re natabal porom che u ya'ic u k'ij ri Ajawaxel.

⁸ Pa tak ri k'ij re uxlanem quetunubax chuwäch ri Ajawaxel, pa qui bi' ri e ralc'ual ri Israel, pixab wa' re chbe k'ij sak.

⁹ Are wa' ri ya'tal che ri Aaron amak'el xukuje' chque ri e rija'lil, ri rajawaxic caquitij chupam jun c'olbal, ri tastalic, sibalaj c'u e tastalic e qui tz'akatil ri sipanic ri quenicowisax che u ya'ic u k'ij ri Ajawaxel, pixab wa' ri cajeki'c canok.”

Ri c'äjisabal qui wäch ri queyok'on che ri Dios

^10-11 Pa tak ri k'ij ri' ri ral jun ixok aj israel, u c'ojol jun aj ejipt, xel ulok chquixo'l ri aj israelib; ri ala ri' ri ral ri ixok aj israel rachil jun achi chic aj israel xech'ojin pa ri kajebal, ri ral ri ixok aj israel xuyok' ri u bi' ri Dios xuc'okoj; xc'am c'u bic chuwäch ri Moises, Selomit u bi' ri u nan, u mia'l ri Dibri aj Dan.

¹² Xcoj pa che, xqueyej na ri xubij ri Ajawaxel chque.

¹³ Ri Ajawaxel, xubij che ri Moises:

¹⁴ “Chawesaj bic ri yok'onel chrij ri kajebal, conojel c'u ri xeto'wic chquiya' ri qui k'ab pa u jolom, conojel ri xquita' ri xubij chbuc' che abaj cumal conojel ri aj israelib.

^15-16 Chabij c'u chque ri aj israelib: Apachin ri cuc'okoj ri u Dios, cäkajbex na rumal ri retzelal, apachin ri cuyok' ri u bi' ri Ajawaxel, cäcämisax na, cäbuc' na chabaj cumal conojel. We man aj Israel taj, che i winakil, we cuyok' ri u bi' ri Dios, chc'okox che cämical.

¹⁷ Xukuje' ri cuch'ay apachique winak cucämisaj c'ut, chcämisax ri are'.

¹⁸ Ri cucämisaj jun awaj, cutoj na ri u q'uexel, awaj cuya' na che u q'uexel.

¹⁹ Ri cusoc jun rajil u tz'akat, jas ri xubano, je chban che ri are':

²⁰ K'ajic cätojbex u q'uexel ri k'ajic, bak'wächaj cätojbex u q'uexel ri bak'wächaj, wareyaj cätojbex u q'uexel ri wareyaj; jas ri socotajic ri xbanic are je u q'uexel cäya' na.

²¹ Ri cucämisaj jun awaj, cutoj na u q'uexel; are c'u ri cucämisaj jun winak cäcämisax na ri are'.

²² Xa jun pixab quicoj che ri man i winakil taj xukuje' che ri i winakil rumal rech chi in ri' ri Ajawaxel ri i Dios.”

²³ Ronojel wa' xubij ri Moises chque ri aj israelib, xquesaj c'u bic ri yok'onel chrij ri tinimit, xquibuc' che abaj. Je c'u xquiban ri aj israelib jas ri xubij ri Ajawaxel che ri Moises.