Aj Levitib 17 - Quiché Bible

Xuwi wa' k'ijilabal

¹ Ri Ajawaxel xutzijobej ri Moises, xubij c'u che:

² “Chabij che ri Aaron xukuje' chque ri e u c'ojol, xukuje' chque conojel ri aj israelib, chi ri Ajawaxel e u yo'm tak we takanic ri':

³ Apachique aj israel ri cupil jun ama' wacax, o jun alaj ama' chij, o jun ati't q'uisic' chupam o chrij ri kajebal,

⁴ we man cuc'am ta c'u ulok chuchi' ri oquibal chupam ri Lic'om Rachoch Dios re rikoj ib che u chi'xic jacha' che sipanic che ri Ajawaxel chuwäch ri cäk'ijilax wi, cux na ajchak'mac che u jamixic ri quic', rumal ri' quesax na ri u bi' chquixo'l ri e u winakil.

⁵ Xya' we takanic ri' rech ri aj israelib quequichi'j na che ri Ajawaxel ri awaj ri quequipil pa apachique c'olbal, quequic'ama' ulok che ri cojol tabal tok'ob chuchi' ri Lic'om Rachoch Dios re rikoj ib, rech quebuchi'j che qui q'uexwäch jacha' che tabal tok'ob che utzirisan ib.

⁶ Ri cojol tabal tok'ob cuchicoj ri quic' puwi' ri porobal re ri Ajawaxel ri c'o chuchi' ri Lic'om Rachoch Dios re rikoj ib, cuporoj c'u ri xepo che sipanic ri cäc'oc'atic ri cäkaj chuwäch ri Ajawaxel.

⁷ Mawi c'u jumul chquiya' ta chic tabal tak tok'ob chquiwäch tak ri itzelab, ri e qui k'ijila'm, ri qui mac quech e etzelatajinak. Jun pixab wa' ri cacanaj can chiwe, ri coc'ow cuc' ri tataxelab cak'ax c'u cuc' ri alc'ualaxelab.

⁸ Xukuje' chabij chque: apachique ta ne aj israel o jun ri man i winakil taj ri jekel chixo'l, ri cuya' ta jun tabal tok'ob ri cächajirisaxic o apachique chi jun tabal tok'ob,

⁹ we man cuc'am ta ulok chuchi' ri oquibal re ri Lic'om Rachoch Dios re rikoj ib, che u chi'xic che ri Ajawaxel, quesax na ri u bi' chquixo'l ri u winakil.”

Awas u tijic quic'

¹⁰ “In quinc'ulelaj na ronojel aj israel o ri man i winakil taj ri jekel chixo'l ri cutij, apachique ta ne quic'. In quinwesaj na chquixo'l ri e u tinimit.

¹¹ Rumal rech chi ronojel c'aslic, c'asal rumal ri u quiq'uel, nu yo'm c'u in chiwe puwi' ri porobal rech rumal ri quic' quixcuinic quitoj ri u to'tajisaxic ri i c'aslemal, are' c'ut ri quic' cätojow ri u to'tajisaxic ri c'aslemal.

¹² Rumal ri' nu yo'm u bixic chque ri aj israelib: Mawi jun chiwe, mawi jun ri man i winakil taj ri jekel chixo'l ri chutij ta quic'.

¹³ Apachique ta ne aj israel o apawije' ta ne cäpe wi, ri jekel chixo'l, ri cuchap jun awaj pa juyub o jun chicop ri c'o u xic' ri ya'tal u tijic, rajawaxic xa cumuk ri u quiq'uel ri awaj ri xuchapo.

¹⁴ Rumal rech chi ri quic' are' cayo'w c'aslemal che ronojel c'aslic. Rumal ri' nu bim chiwe chi man qui tij ta quic', are' c'ut cäyo'w c'aslemal che ronojel c'aslic.

¹⁵ Apachique ta ne aj israel o apawije' ta ne cäpe wi, ri cutij ri u ti'jal jun awaj ri xak c'ätetal xcämic, o ri xch'akatix rumal jun juyubal awaj, quebuch'aj ri ratz'iak xukuje' catinic, cäcanaj c'u can tz'il, c'ä coc na ri ak'ab, c'äte ri' cäcanaj ch'ajch'oj.

¹⁶ We c'u man quebuch'aj ri ratz'iak mawi catinic, cäkajbex rumal ri u mac.”