Aj Levitib 16 - Quiché Bible

Ri k'ij re cuyubal mac

¹ Ri Ajawaxel xutzijobej ri Moises aretak e cäminak chic ri e quieb u c'ojol ri Aaron ri xecämic aretak xekeb chuwäch ri Ajawaxel.

² Ri Ajawaxel xubij che ri Moises: “Chabij che ri Aaron ri awachalal chi man xak ta apachique k'ijol coc chupam ri k'ijilabal ri c'o chrij ri ch'ukubal, mawi chuwäch ri tz'apibal ri c'o puwi' ri caxa', rech man cäcäm taj, quinc'ut c'u na wib pa jun sutz' puwi' ri tz'apibal.

³ Jewa' rajawaxic cuban ri Aaron aretak coc chupam ri k'ijilabal: cuc'am bic jun alaj ama' wacax jacha' che tabal tok'ob u mac rech ri macaj xukuje' jun ama' chij che u chi'xic che tabal tok'ob ri cächajirisaxic.

⁴ Rajawaxic cucoj bic ri u pam ratz'iak re lino ri tastalic, quebuch'uk bic ri u pa tak ra' ruc' säcaw re lino cucoj bic ri pas xe' u pam, xukuje' cucoj bic ri pisbal jolomaj. Atz'iak wa' ri tastalic, catin c'u na c'äte ri' quebucojo.

⁵ Che ri tinimit aj israelib ri Aaron quebuc'am quieb ama'ib tak q'uisic' tabal tok'ob re josk'ibal mac, xukuje' jun ama' chij che u chi'xic che tabal tok'ob ri cächajirisaxic.

⁶ Cuchi'j c'u na ri alaj ama' wacax che tabal tok'ob rumal ri mac ri u banom, rech quecuyutaj ri u mac, xukuje' ri qui mac ri rachalaxic.

⁷ C'äte ri' quebuc'am ri quieb ama'ib tak q'uisic', quebuchi'j c'u chuwäch ri Ajawaxel chuchi' ri oquibal chupam ri Lic'om Rachoch Dios re rikoj ib;

⁸ caq'uikaxtaj c'u na taklebenic paquiwi' ri quieb q'uisic': jun cux na che ri Ajawaxel, ri jun chic che ri Azazel.

⁹ Ri ama' q'uisic' ri cutaklebej ri Ajawaxel, cuchi'j na ri Aaron che tabal tok'ob che u josk'ixic ri macaj.

¹⁰ Are c'u ri q'uisic' ri cäkaj wi ri taklebenic che u c'amic bic ri macaj, c'aslic cuchacaba' na chuwäch ri Ajawaxel che qui rikic ri cuyubal tak macaj, cuq'uiak c'u na bic ri q'uisic' ri cäc'amow bic ri macaj chupam ri chaki'j uwo sak.

¹¹ Ri Aaron cuchi'j na ri c'ojol ama' wacax jacha' che ri u tabal tok'ob u mac rech ri macaj, rech quesachtaj ri e u mac xukuje' ri e quech ri rachalal.

¹² Cuc'am c'u jun bukibal nojinak che rachak k'ak' ri e c'amom puwi' ri porobal chuwäch ri Ajawaxel, xukuje' camuk' coc'alaj k'ol joc'om, cuc'am bic chrij ri ch'ukubal.

¹³ Cujopij ri k'ol puwi' ri k'ak' chuwäch ri Ajawaxel, are c'u ri u sibal ri c'oc'alaj k'ol cuch'uk ri u wi' ri tz'apibal ri c'o puwi' ri caxa' ri c'olotal wi ri pixab, we jewa' cuban ri Aaron man cäcäm taj.

¹⁴ Cuc'am jubik' che ri u quiq'uel ri c'ojol ama' wacax, cuchicoj ruc' ri u wi' u k'ab pa ri u xcut ri tz'apibal ri cäca'y pa elebal k'ij Wukub mul cuchicoj ri quic' ruc' ri u wi' u k'ab chuwäch ri tz'apibal.

¹⁵ C'äte ri' cutok' u kul ri ama' q'uisic' jacha' che tabal tok'ob che ri josk'ibal u mac ri tinimit, cuc'am bic ri quic' chupam ri c'olbal ri c'o chrij ri ch'ukubal, chila' cuchicoj wi ri quic' puwi' xukuje' chuwäch ri tz'apibal, jacha' ri xuban che ri u quiq'uel ri c'ojol ama' wacax.

¹⁶ Je u josk'ixic wa' ri k'ijilabal chque conojel ri tz'ilol ri walijisam tak ib xukuje' macaj ri xequiban ri aj israelib, junam rajawaxic u banic che ri Lic'om Rachoch Dios re rikoj ib ri jekel chquixo'l xukuje' chquixo'l ri e qui tz'ilol.

¹⁷ Man c'o ta jun winak cäc'oji' ta pa ri k'ijilabal, aretak ri Aaron cätajin cuya' ri tabal tok'ob che u rikic ri cuyubal mac, c'ä cäbantaj na ri cuyubal mac, xukuje' ri e quech ri e c'o pa rachoch, xukuje' ri quech conojel ri aj israelib,

¹⁸ quel c'u ulok, cäbe che u josk'ixic ri porobal ri c'o chuwäch ri Ajawaxel. Cuc'am jubik' ri u quiq'uel ri c'ojol ama' wacax, xukuje' ri u quiq'uel ri ama' q'uisic', cubil chquij ri ruc'a' ri porobal, xukuje' chrij ri porobal.

¹⁹ Wukub mul cuchicoj ri quic' puwi' ri porobal ruc' ri u wi' u k'ab, je u josk'ixic wa' cubano che quesaxic ri qui tz'ilol ri aj israelib, cutas c'ut.

²⁰ Aretak ri Aaron u q'uisom chic u josk'ixic ri k'ijilabal, ri Lic'om Rachoch Dios re rikoj ib xukuje' ri porobal, cutak u c'amic ri ama' q'uisic' ri c'ä c'aslic.

²¹ Quebuya' ri u k'ab pa u jolom ri awaj, cuk'alajisaj ronojel ri etzelal, ri man e nimanic taj, xukuje' ronojel ri qui mac ri aj israelib. Je cuban wa' che qui ya'ic bic ri qui mac ri aj israelib pa u jolom ri ama' q'uisic', c'o c'u jun achi ri cac'amow bic, cutzokopij c'u can pa ri chaki'j uwo sak.

²² Aretak ri ama' q'uisic' cäq'uis u sachic bic chupam ri chaki'j uwo sak, quebuc'am na bic ronojel ri quetzelal ri aj israelib pa tak ri ulew ri man e c'o ta wi winak.

²³ Coc c'ut ri Aaron chupam ri Lic'om Rachoch Dios re rikoj ib, cäresaj c'ut ri ratz'iak re lino ri xucoj che ri oquem chupam ri k'ijilabal, cuya' c'u can chila'.

²⁴ Cuch'aj c'u na ri u cuerp ruc' ja' pa tastalic c'olbal aretak c'u u cojom chic ri ratz'iak, quel ulok, che u cojic ri kas u tabal tok'ob ri cächajirisaxic xukuje' ri rajawaxic u chi'xic rumal ri tinimit.

²⁵ Ri u xepoyil ri tabal tok'ob re josk'ibal macaj, cuporoj puwi' ri porobal;

²⁶ are c'u ri xc'amow u bic ri q'uisic' ri c'amowinak bic ri macaj, quebuch'aj ri ratz'iak, xukuje' catinic c'äte ri' cuya' coc pa ri kajebal.

²⁷ Ri ama' wacax xukuje' ri ama' q'uisic' ri xepil che qui josk'ixic ri mac, ri xec'am bic ri qui quiq'uel pa ri k'ijilabal che u rikic ri cuyubal quech ri macaj, quebesax na bic chrij ri tinimit, queporox c'u ri qui tz'umal, ri qui ti'jal, xukuje' ri qui mes.

²⁸ Ri winak ri queporon ri awaj, rajawaxic quebuch'aj ri ratz'iak, xukuje' catinic, c'äte ri' cuya' coc pa ri kajebal.

²⁹ Jun pixab wa' chiwe ri quitakej u banic: pa ri lajuj rajilabal ri uwuk ic', rajawaxic man quixwa' taj, xukuje' man c'o ta jun chac quibano, mawi ri man e i winakil taj ri e jekel chixo'l.

³⁰ Are c'u k'ij wa' ri quirik ri cuyubal i mac, quixcanaj c'u ch'ajch'oj che ronojel ri i mac chuwäch ri Ajawaxel.

³¹ K'ij wa' re uxlanem chiwe, rajawaxic man quixwa' taj, pixab wa' ri quitakej u banic.

³² Ri cojol tabal tok'ob ri chätajinak, yo'm takanic pa u k'ab chi cacanaj che u q'uexwäch ri u tat are' cäbanow ri nak'atisabal che u rikic ri sachbal mac; quebucoj ri atz'iak re lino, ri e tastalic.

³³ Cuban c'u na ri josk'inic re ri sibalaj tastalicalaj c'olbal, xukuje' ri rech ri Lic'om Rachoch Dios re rikoj ib, xukuje' ri rech ri porobal curik c'u na ri cuyubal tak macaj ri quech ri e cojol tabal tok'ob, xukuje' ri rech ronojel ri tinimit.

³⁴ Jun pixab wa' ri cäcanaj chiwe jumul pa ri jun junab quiban we nak'atisabal ri' che u rikic ri cuyubal quech ri mac ri qui banom ri aj israelib.” Je c'u xuban ri Moises jacha' ri takanic ri xya' che rumal ri Ajawaxel.