Aj Levitib 14 - Quiché Bible

U josk'ixic ri jun winak ri c'o ch'a'c chrij

¹ Ri Ajawaxel xutzijobej ri Moises, xubij che:

² “E are tak pixab wa' che u josk'ixic jun winak ri c'o chuwilaj ch'a'c chrij: ri yawab cäc'am bic chuwäch ri cojol tabal tok'ob,

³ quel c'u bic che u nic'oxic chrij ri tinimit. We c'u ri cojol tabal tok'ob cärilo chi utzirinak ri chuwilaj ch'a'c ri c'o chrij ri yawab,

⁴ cutak na qui c'amic che ri cujosk'ij rib quieb alaj tak chicop ri e c'o qui xic' ri e c'asc'oj ri xukuje' e ch'ajch'oj, ch'akap chacalte', quiäk quem, xukuje' k'ayes re hisop.

⁵ Ri cojol tabal tok'ob cätakan che u k'atic u kul jun chque ri alaj tak chicop ri e c'o qui xic' puwi' jun bo'j, ri c'o sakalak ja' chupam,

⁶ cuc'am c'ut ri alaj chicop ri e c'o u xic' ri c'aslic, ri ch'akap che' re chacalte', ri quiäk quem xukuje' ri k'ayes re hisop quebuch'akaba' we jastak ri' xukuje' ri alaj chicop ri e c'o u xic' ri c'aslic pa ri u quiq'uel ri alaj chicop ri e c'o u xic' ri cäminak, puwi' ri sakalaj ja'.

⁷ Wukub mul cuchicoj chrij ri winak ri quejosk'ix che ri ch'a'c, cuk'alajisaj c'ut chi ch'ajch'oj. Ri alaj chicop ri e c'o u xic' ri c'aslic cutzokopij bic.

⁸ Ri cäjosk'ixic rajawaxic quebuch'aj ri ratz'iak catinic, xukuje' cusocaj c'u ronojel ri rismal rech cäjosk'itajic. C'äte ri' cuya' coc pa ri kajebal, wukub k'ij c'ut cacanaj can cho ri räxk'ab.

⁹ Aretak cätz'akat wukub k'ij, cusocaj ronojel ri u wi', cusocaj ri rismachi', ri rismal ri rij tak u bak'wäch xukuje' ronojel ri rismal quebuch'aj ri ratz'iak, xukuje' catinic, cäcanaj c'u ch'ajch'oj.

¹⁰ Aretak catz'akat wajxakib k'ij quebuc'am ulok quieb ama'ib tak chij ri man c'o ta qui yab, xukuje' jun ati't chij re jun u junab ri man c'o ta u yab; cajlajuj (14) libra utzalaj c'äj che sipanic re c'äj ri yok'om aseit ruc', carachilaj jun u roxil jun litro aseit.

¹¹ Ri cojol tabal tok'ob ri cäbanow ri josk'inic, cuya' ri winak ri cäjosk'ixic xukuje' ri e jastak rech chuchi' ri oquibal chupam ri Lic'om Rachoch Dios re rikoj ib chuwäch ri Ajawaxel.

¹² Cuc'am jun chque ri ama'ib tak chij cärachilaj jun u roxil jun litro aseit, cujach chuwäch ri Ajawaxel jacha' che tabal tok'ob che u josk'ixic ri chak'maquil.

¹³ Rajawaxic cupil ri ama' chij pa ri c'olbal ri tastalic ri cätok' wi ri qui kul ri awaj ri queya' che tabal tok'ob che u josk'ixic ri macaj xukuje' ri e tabal tak tok'ob ri quechajirisaxic. Ri tabal tok'ob che u josk'ixic ri chak'maquil cux rech ri cojol tabal tok'ob, xukuje' ri tabal tok'ob josk'ibal macaj, jun jasach c'u wa' ri sibalaj tastalic.

¹⁴ Ri cojol tabal tok'ob cuc'am jubik' che ri u quiq'uel ri awaj ri yo'm che tabal tok'ob ri cäjosk'in ri chak'maquil, cubil xe' ri u xiquin re ri riquiak'ab ri cäjosk'ixic, che ri nim u wi' u k'ab re ri riquiak'ab, xukuje' che ri nim u wi' rakan re ri riquiak'ab.

¹⁵ Ri cojol tabal tok'ob cuc'am jubik' che ri aseit, cuk'ij chupam ri u k'ab re ri u mox.

¹⁶ Cut'in ri u wi' u k'ab re ri riquiak'ab pa ri aseit ri c'o chupam ri u k'ab re ri u mox, ruc' we u wi' u k'ab ri' cuchicoj wukub mul ri aseit chuwäch ri Ajawaxel.

¹⁷ Ri u tz'akatil ri aseit ri to'tajinak pa u k'ab, cuc'am jubik' ri cojol tabal tok'ob cubil xe' ri u xiquin re ri riquiak'ab ri cäjosk'ixic, che ri nim u wi' u k'ab re ri riquiak'ab, che ri nim u wi' rakan re ri riquiak'ab, puwi' ri u quiq'uel ri tabal tok'ob ri u mac rech ri chak'maquil.

¹⁸ Ri aseit ri to'tajinak pa u k'ab, cubil pa u jolom ri cäjosk'ixic. Jeri' ri cojol tabal tok'ob curik rumal ri Ajawaxel ri cuyubal mac che u josk'ixic ri macaj.

¹⁹ Are' c'u ri cojol tabal tok'ob, cupil ri sipanic ri quesan ri macaj, cuban c'u ri josk'inic che ri cujosk'ij rib che ri u tz'ilol; c'äte c'u ri' cupila' ri awaj ri cachi'x che tabal tok'ob ri cächajirisaxic.

²⁰ Cuchi'j puwi' ri porobal cärachilaj ri sipanic que c'äj. Jewa' cuban ri cojol tabal tok'ob che u rikic ri cuyubal u mac we winak ri' cäcanaj c'u can ch'ajch'oj.

²¹ We ri winak ri yawab meba' man c'o ta cuma' wi ri cätok'ix che, cuc'am na jun ama' chij jacha' che tabal tok'ob che u rikic ri cuyubal macaj cujach c'ut jacha' che sipanic ri nim u banic che qui rikic ri cuyubal tak u mac, cärachilaj quiejeb libra ruc' niq'uiaj utzalaj c'äj, yok'om aseit ruc' jacha' che sipanic quech c'äj, cärachilaj jun u roxil jun litro aseit.

²² Xukuje' quieb tucumux we quieb palomax, jas ri cäcuin che qui lok'ic; jun che josk'ibal mac, ri jun chic jacha' che tabal tok'ob ri cächajirisaxic.

²³ Aretak cätz'akat wajxakib k'ij quebuc'am bic ronojel wa' che ri cojol tabal tok'ob, che ri u josk'ixic rib, cujach chuwäch ri Ajawaxel chuchi' ri Lic'om Rachoch Dios re rikoj ib.

²⁴ Ri cojol tabal tok'ob cuc'am ri ama' chij ri cäya' che tabal tok'ob u mac rech ri chak'maquil, cärachilaj jun u roxil jun litro aseit, cujach c'ut chuwäch ri Ajawaxel jacha' sipanic ri nim u banic.

²⁵ C'äte ri' cutok' u kul ri alaj ama' chij che tabal tok'ob che cuyubal mac cuc'am jubik' ri u quiq'uel ri ama' chij cubil xe' ri u xiquin re ri u riquiak'ab ri cäjosk'ixic, che ri nim u wi' u k'ab re ri riquiak'ab, xukuje' che ri nim u wi' rakan re ri riquiak'ab,

²⁶ ri cojol tabal tok'ob cuc'am jubik' che ri aseit cuya' chupam ri u k'ab re ri u mox,

²⁷ ruc' c'u ri u wi' u k'ab re ri riquiak'ab, cuchicoj ri aseit wukub mul chuwäch ri Ajawaxel.

²⁸ Xukuje' cubil jubik' we aseit ri' xe' ri u xiquin re ri riquiak'ab ri cäjosk'ixic, che ri nim u wi' u k'ab re ri riquiak'ab, che ri nim u wi' rakan re ri riquiak'ab, ri u bixic pa ri c'olbal ri xbil wi ri quic' re tabal tok'ob u mac rech ri chak'maquil.

²⁹ Are c'u ri aseit ri to'tajinak can pa u k'ab ri cojol tabal tok'ob, cubil pa u jolom ri cäjosk'ixic jewa' cuban ri cojol tabal tok'ob che u rikic ri cuyubal mac.

³⁰ Ri cojol tabal tok'ob cuya' jun chque ri tucumux o jun chque ri palomax, jas ri cuininak ri winak che u ya'ic che u josk'ixic rib.

³¹ Jun chque ri tucumux we ri palomax cäya' che tabal tok'ob re sachbal macaj, ri jun chic che tabal tok'ob ri cächajirisaxic, rachilam ri sipanic re c'äj, jewa' cuban ri cojol tabal tok'ob che u rikic ri cuyubal u mac ri winak chuwäch ri Ajawaxel.”

³² E are tak pixab wa' chque ri cäc'oji' chuwilaj ch'a'c chquij, ri man quecuin taj cäquiya' nimalaj tabal tok'ob che u josk'ixic quib.

Ri cäban che qui josk'ixic ri ja ri c'o retal ch'a'c chque

³³ Ri Ajawaxel xutzijobej ri Moises rachil ri Aaron, xubij c'u chque:

³⁴ “Aretak ix c'o chic pa ri ulew Canaan ri quinjach na pa i k'ab, quintak c'u bic jun yabil re chuwilaj ch'a'c puwi' jun chque ri ja ri c'o pa ri iwulew,

³⁵ ri ajchak'e ja, cuya' u bixic che ri cojol tabal tok'ob, cubij che: In quinwilo chi c'o jun yabil re chuwilaj ch'a'c pa ri wachoch.

³⁶ C'ä majok coc ri cojol tabal tok'ob pa ri ja, cutak u jamic ri ja rech man quetz'ilob taj conojel ri jastak ri e c'o chupam, c'äte ri' cuchaplej u nic'oxic ri yabil.

³⁷ We aretak cunic'oj ri yabil, cärilo chi mecmobinak bic ri u wäch ri tapia ri c'o wi ri yabil ri räxroj we ne e quiäkcoj, ri e mecmobinak bic chupam ri tapia,

³⁸ ri cojol tabal tok'ob quel ulok pa ri ja, catakan che u tz'apixic ri ja wukub k'ij.

³⁹ Aretak cätz'akat wukub k'ij ri cojol tabal tok'ob, cunic'oj chi jumul; we c'u u jabum rib ri yabil cho tak ri u tapia ri ja,

⁴⁰ cutak qui c'oquic ri abaj ri c'o wi ri yabil, quebeq'uiak can pa jun tz'ilalaj c'olbal chrij ri tinimit;

⁴¹ xukuje' cätakan che u josic ronojel ri u pam ri ja, xukuje' ri rij, ri ulew ri josom, quetix can pa jun tz'ilalaj c'olbal chrij ri tinimit.

⁴² Quec'am chi niq'uiaj abaj, quecoj che qui q'uexwäch ri xebesaxic, xukuje' cäban c'ac' xok'ol che u c'ojoxic ri ja.

⁴³ We c'u cäpok' chi jumul ri yabil pa ri ja, aretak e cojom chi tak ri abaj, josom chi ri u tapia, xukuje' banom chic c'ac' u tz'akixic,

⁴⁴ ri cojol tabal tok'ob coc chi che u nic'oxic. We c'u u jabum chi rib ri yabil pa ri ja, chuwilaj ch'a'c wa', xukuje' c'o yabil che ri ja.

⁴⁵ Ri ja cäwilix na, ronojel ri xan, ri abaj, ri che' ri quel che, quebeq'uiak pa jun tz'ilalaj c'olbal chrij ri tinimit.

⁴⁶ Apachin ta ne ri coc pa ri ja pa ronojel ri k'ijol ri xubij ri cojol tabal tok'ob chi catz'apixic, cäcanaj tz'il c'ä coc na ri ak'ab.

⁴⁷ Apachin ta ne ri cäwa'ic o cäwar pa ri ja, rajawaxic quebuch'aj ri ratz'iak che u josk'ixic rib.

⁴⁸ We c'u aretak coc ri cojol tabal tok'ob che u nic'oxic u pam ri ja, crilo chi man u jabum ta rib ri yabil pa ri ja, aretak c'ac' chi u tz'akic ri u pam, ri cojol tabal tok'ob cuk'alajisaj chi man c'o ta yabil che ri ja, ri yabil xoc'owic.

⁴⁹ Che u josk'ixic ri ja, quebuc'am na quieb alaj tak chicop ri e c'o qui xic', ch'akap chacalte', quiäk quem xukuje' k'ayes re hisop.

⁵⁰ Cuk'at u kul jun chque ri alaj tak chicop ri e c'o qui xic' puwi' jun bo'j ri c'o sakalaj ja' chupam.

⁵¹ Cuc'am ri ch'akap chacalte', ri k'ayes re hisop ri quiäk quem rachilam ri alaj chicop ri e c'o qui xic' ri c'aslic, quebuch'akaba' pa ri u quiq'uel ri alaj chicop ri c'o u xic' ri cäminak, rachilam ri sakalaj ja', wukub mul cuchicoj pa ri ja.

⁵² Jewa' cuban che u josk'ixic ri ja ruc' ri u quiq'uel ri alaj chicop ri c'o u xic' rachilam ri sakalaj ja' carachilaj ri alaj chicop ri e c'o qui xic' ri c'aslic, ri ch'akap chacalte', ri k'ayes re hisop xukuje' ri quiäk quem.

⁵³ Cutzokopij c'u bic ri alaj chicop ri e c'o qui xic' ri c'aslic chrij ri tinimit pa ri juyub. Jewa' ri u tz'akatisaxic ri u josk'ixic ri ja.”

⁵⁴ E are tak pixab wa' che ronojel u wäch yabil re ch'a'c xukuje' re quiäkchi'n,

⁵⁵ che ri chuwilaj ch'a'c che atz'iak, xukuje' che ri chuwilaj ch'a'c pa tak ri ja,

⁵⁶ che ri sipoj, ri pok', xukuje' tak ri tz'aj,

⁵⁷ rech cäch'obtajic jachique ri ch'ajch'oj xukuje' jachique ri tz'il. C'ä waral cäq'uis wi u bixic ri cäban che u josk'ixic ri ch'a'c.