Aj Levitib 12 - Quiché Bible

Ri u josk'ixic rib ri ixok aretak alaninak chic

¹ Ri Ajawaxel xutzijobej ri Moises, xubij che:

² “Chabij chque ri aj israelib ri quinbij chawe: Aretak jun ixok cäcanaj yawab winak, caralaj c'u jun ral ala, cäcanaj tz'il wukub k'ij; jacha' ri cubano aretak cäyabin chi ic'.

³ Ri ac'al ala cakopix na ri u tz'umal ri u wi' ri achi wi aretak cätz'akat wajxakib (8) u k'ij.

⁴ Ri u nan ri ac'al cäbeytaj na juwinak oxlajuj (33) k'ij ri u josk'itajic che ri u quiq'uel; man c'o ta jun jasach ri tastalic cuya' cuchapo mawi coc ta chupam ri k'ijilabal, c'ä cätz'akat na ri u josk'itajic.

⁵ We ali ri cäralaj, cajlajuj (14) k'ij cäcanaj tz'il, jacha' ri cubano aretak cäyabin chi ic', oxc'al wakib (66) k'ij cäbeytaj na ri u josk'itajic che ri u quiq'uel.

⁶ Aretak quebetz'akat ri k'ij re ri u josk'itajic che ri ralanic jun ala o jun ali, ri u nan ri ac'al cuc'am ulok chuchi' ri Lic'om Rachoch Dios re rikoj ib jun alaj ama' chij re jun u junab che tabal tok'ob ri cächajirisaxic, xukuje' jun tucumux o jun palomax cujach pa u k'ab ri cojol tabal tok'ob, u mac rech ri macaj.

⁷ Are' c'u ri cojol tabal tok'ob quebuchi'j chuwäch ri Ajawaxel che u tz'onoxic ri sachbal u mac ri ixok, ruc' wa' cäjosk'itaj ri ixok che ri u quiq'uel.” E are tak pixab wa' che ri ixok aretak cäralaj jun ala o jun ali.

⁸ We c'u ri u nan ri ac'al man cuban ta ri u rajil che u lok'ic ulok jun alaj ama' chij, cuya' quebuc'am na ulok quieb palomax o quieb tucumux jun che tabal tok'ob ri cächajirisaxic, ri jun chic jacha' che tabal tok'ob che u josk'ixic ri mac; ri cojol tabal tok'ob cutz'onoj ri sachbal u mac ri ixok, cäjosk'itaj c'ut.