Aj Levitib 10 - Quiché Bible

Ri u mac ri Abiu rachil ri Nadab

¹ Ri e u c'ojol ri Aaron are' ri Nadab xukuje' ri Abiu, chquijujunal xquic'am ri qui bukibal, xequiya' k'ak' xukuje' c'oc'alaj k'ol chquipam, xquichi'j c'u chuwäch ri Ajawaxel jun k'ak' ri jun chi wi ri man are ta ri u bim ri Ajawaxel chque.

² Xel c'u ulok k'ak' chuwäch ri Ajawaxel ri xebupororej, xecäm c'ut chuwäch ri Ajawaxel.

³ Xubij c'u ri Moises che ri Aaron: “Are wa' ri xraj ri Ajawaxel xubij: ‘Chque ri quenakajin chwe quinc'ut wi na ri nu tastajic, chquiwäch conojel ri aj israelib quinc'ut na ri nu juluwem.’ ” Man c'o ta c'u jas xubij ri Aaron.

⁴ Ri Moises xebusiq'uij ri Misael xukuje' ri Elzapan, (e u c'ojol ri Uziel, rican ri Aaron), xubij chque: “Tisaj, chebiwesaj bic we iwachalal ri' chupam ri k'ijilabal, jebiya' can chrij ri kajebal.”

⁵ Xekeb c'ut, xequitelej bic e qui cojom ri rij catz'iak, xequiya' can chrij ri kajebal jacha' ri takanic ri u yo'm ri Moises.

Ri pixab chque ri cojol tabal tok'ob

⁶ Xubij c'u ri Moises che ri Aaron, e rachil ri e u c'ojol ri Eleazar xukuje' ri Itamar: ri e u c'ojol ri Aaron: “Miquiyiba' ri i wi', mawi mebijis ri iwatz'iak che u c'utic ri i bis, mixecäm c'u ne, mäkaj ri royowal ri Ajawaxel paquiwi' ri aj israelib. Ri cuya' caquibisoj are ri cachalal ri cachalaxic quib, conojel ri aj israelib, chi ri Ajawaxel xuban na we c'atic ri'.

⁷ Naj mixbe wi che ri Lic'om Rachoch Dios re rikoj ib, rech man quixcäm taj; ri ix tastajinak rumal ri raseit ri Ajawaxel.” Je c'ut jacha' ri takanic ri xuya' ri Moises je xquibano.

⁸ Ri Ajawaxel xtzijon chic ruc' ri Aaron, xubij c'u che:

⁹ “Aretak ri at o ri e a c'ojol quixoc pa ri Lic'om Rachoch Dios re rikoj ib, mitij u wa'l uva, mawi uq'uia' ri quek'abarisanic, rech man quixcäm taj; jun pixab wa' ri cacanaj can chque ri tataxelab xukuje' chque ri c'ojolaxelab

¹⁰ rech quixcuinic quiwil ri u jalbem rib ri tastalic ruc' ri man tastalic taj, ri tz'il xukuje' ri ch'ajch'oj,

¹¹ rech quixcuinic quebitijoj ri aj israelib chque conojel ri pixab ri u yo'm u bixic ri Ajawaxel chiwe rumal ri Moises.”

¹² Xubij c'u ri Moises che ri Aaron, xukuje' che ri Eleazar, ri Itamar, ri e quieb u c'ojol ri Aaron ri e canajinak canok: “Chebic'ama' ri sipanic quech c'äj ri e canajinak can chque ri sipanic ri xeporox chuwäch ri Ajawaxel, mebiya' ch'am cuc', chebitija' chunakaj ri porobal, sibalaj c'u tastalic wa'.

¹³ Chitija' pa jun tastalic c'olbal, are c'u wa' ri i taklebem ri at xukuje' ri e a c'ojol chque ri sipanic ri queporox che u ya'ic u k'ij ri Ajawaxel, are c'u takanic wa' yo'm chwe.

¹⁴ Ri uwo c'uxaj are sipanic wa' ri nim u k'ij, ri ra' ri awaj ri qui yo'm ri aj israelib che sipanic, rajawaxic quebitij pa jun c'olbal ch'ajch'oj ri at, xukuje' ri e a c'ojol ri e a mia'l; e are wa' ri ya'tal chiwe chque ri qui tz'akatil ri tabal tak tok'ob ri cäquiya' ri aj israelib che utzirisan ib.

¹⁵ Ri ra' ri awaj ri cäya' che sipanic, xukuje' ri uwo c'uxaj ri cäya' che sipanic ri nim u k'ij, quec'am na bic chuwäch ri Ajawaxel; queya' chuwäch jacha' sipanic ri nim qui k'ij, querachilaj ri xepo ri queporoxic; are c'u awech wa' amak'el cuc' ri awalc'ual, jacha' ri takanic ri u yo'm ri Ajawaxel.”

¹⁶ Xuta' c'u ri Moises chque jas xquiban che ri alaj ama' q'uisic' ri cäpil u mac ri macaj, xbix c'u che chi xporotajic; xoyowar chrij ri Eleazar xukuje' ri Itamar, ri e quieb u c'ojol ri Aaron ri e canajinak canok, xubij chque:

¹⁷ “¿Jasche man xitij ri tabal tok'ob u mac rech ri macaj pa ri c'olbal ri tastajinak? Jun jasach c'u wa' ri sibalaj tastalic, u yo'm c'u ri Ajawaxel chiwe rech ix quixekan ri qui mac ri aj israelib, quirik c'u ri sachbal qui mac rumal ri Ajawaxel.

¹⁸ We man xc'am ta c'u bic ri quic' pa ri rachoch Dios, ri ix rajawaxic xitij ta ri tabal tok'ob pa ri c'olbal ri tastalic, jacha' ri takanic ri nu yo'm.

¹⁹ Ri Aaron, xubij che ri Moises: Chawilampe', camic ri e are' qui jachom ri tabal tok'ob chuwäch ri Ajawaxel u mac rech ri macaj xukuje' ri qui tabal tok'ob ri cächajirisaxic; are c'u ri in xebenc'ulmaj we jastak ri', we ta c'u xintij ri tabal tok'ob camic ri u mac rech ri macaj, ¿la cäc'amar ta c'u lo ri' chuwäch ri Ajawaxel?”

²⁰ Aretak xuta' ri Moises ri xubij ri Aaron, man c'o ta chi jas xubij.