Ajilanic 9 - Quiché Bible

Rokowisaxic ri Oc'owem

¹ K'axenak chi jun junab e elinak ulok ri aj israelib pa Ejipt, pa ri nabe ic' re ri ucab junab, ri Ajawaxel xutzijobej ri Moises pa ri juyub Sinai, xubij c'u che:

² “Ri aj israelib rajawaxic cäquiban ri nimak'ij re ri Oc'owem pa ri ajilabal ri k'atom,

³ ri u bixic, chupam ri cajlajuj rajilabal we ic' ri' aretak cäk'aj k'ij, qui takej c'u u banic je jas ri tz'ibatalic conojel tak ri e u cholajil ri e nu yo'm che u banic ri nimak'ij.”

⁴ Xuya' c'u takanic ri Moises chque ri aj israelib chi chquibana' ri nimak'ij re ri Oc'owem,

⁵ je c'u xquiban ri e are' pa ri cajlajuj rajilabal ri ic' ri', aretak xk'ekaric, pa ri chaki'j uwo sak pa ri Sinai, xquiban c'u ronojel jacha' ri takanic ri u yo'm ri Ajawaxel che ri Moises.

⁶ E c'o c'u jujun achijab ri e tz'ilobitajinak rumal rech chi xquichap jun cäminak, rumal ri' man xuya' ta xquiban ri nimak'ij re ri Oc'owem pa ri k'ij ri'. Xebe c'u wa' che rilic ri Moises xukuje' ri Aaron kas pa ri k'ij ri',

⁷ xquibij c'u che ri Moises: “Uj ka chapom jun cäminak, rumal c'u ri' uj uxinak tz'il. ¿La ma ta c'u lo cäyataj chke chi quel kaya' ri sipanic chuwäch ri Ajawaxel pa ri k'ijol ri k'atom, junam cuc' ri niq'uiaj aj israelib chic?”

⁸ Ri Moises xutzelej u bixic chque: “Chiweyej na quinta' na jas ri cubij na ri Ajawaxel chiwij ix.”

⁹ Ri Ajawaxel xutzijobej ri Moises xubij c'u che: “Chabij wa' chque ri aj israelib:

¹⁰ Iwonojel ix xukuje' ri e iwachalaxic rajawaxic quiban na ri nimak'ij re ri Oc'owem che u ya'ic nu k'ij. Ri e uxinak tz'il rumal rech chi qui chapom jun cäminak, o ri naj e benak wi,

¹¹ caquiban na ri nimak'ij pa ri ucajlajuj rajilabal ri ucab ic', aretak caxk'ekayiric. Rajawaxic quitij ri alaj ama' chij querachilaj c'ayilaj tak k'ayes carachilaj ri caxlanwa ri man cäya' ta ch'am ruc',

¹² c'o c'u mito'tajisaj can che ri rech ri ucab k'ij mawi mak'ajisax jun u bakil. Chibana' ri nimak'ij re ri Oc'owem quitakej c'u qui banic conojel ri e u cholajil ri e nu yo'm.

¹³ Jachin c'ut ri cutanaba' u banic ri nimak'ij re ri Oc'owem ri ch'ajch'oj c'u ne man naj ta c'u benak wi, rajawaxic quesax chquixo'l ri e u winakil. Man xpe ta c'u che u ya'ic ri sipanic chuwäch ri Ajawaxel pa ri k'ijol ri k'atom, cuc'am na ri c'äjisabal wächaj u mac rech ri u mac.

¹⁴ Ri man e i winakil ta ri e jekel chixo'l rajawaxic cäquiban ri nimak'ij re ri Oc'owem che u ya'ic nu k'ij je jas ronojel ri cholajil ri nu yo'm. Ri kas e junam nak'atisabal quebajwataj che ri man i winakil ta jacha' xukuje' che ri aj tinimit.”

Ri sutz' puwi' ri Lic'om Rachoch Dios

¹⁵ Pa ri k'ij ri xwocotaj ri k'ijilabal, ri u bixic, ri Lic'om Rachoch Dios re ri c'ulwächinic, ri sutz' xch'ukuwic. Xuwi c'u caxk'ekayiric cac'utun u wächbal jun kak' puwi' ri k'ijilabal c'ä cäsakar na.

¹⁶ Je c'u cac'ulmataj wa' amak'el: pa k'ij, ri sutz' cuch'uk ri Lic'om Rachoch Dios, are c'u ri chak'ab quilitaj u wächbal jun k'ak'.

¹⁷ Aretak cawalij ri sutz' puwi' ri Lic'om Rachoch Dios, ri aj israelib caquitakej qui be, pa ri c'olbal c'ut jawije' ri quetok'ola wi ri sutz' chila' quebekaj wi.

¹⁸ Aretak cätakan ri Ajawaxel, ri aj israelib caquitakej qui be o quekajic, chila' c'u quecanaj wi joropa' k'ij cäbeytaj ri sutz' puwi' ri k'ijilabal.

¹⁹ We ri sutz' naj cäcanaj puwi' ri k'ijilabal ri aj israelib caquibeytajisaj ri qui binem che u latz'obexic qui wäch pa ri patanijic che ri Ajawaxel.

²⁰ We ri sutz' xa quieb oxib k'ij cacanaj puwi' ri k'ijilabal, rumal jun u takanic ri Ajawaxel caquitakej qui be, xukuje' rumal chi c'u jun takanic quek'ilk'ob na.

²¹ C'o jun tak mul ri sutz' xuwi ri chak'ab cacanajic, chusakariquil cawalijic; caquitakej chi c'ut ri qui be. Xak junam pa k'ij ruc' ri chak'ab, aretak cawalij ri sutz', caquitakej ri qui be.

²² We c'u ri sutz' cäbeytaj quieb k'ij quieb ic' o jun junab, ri aj israelib quecanaj pa ri qui c'olbal man caquitakej ta binem. Xuwi c'u cawalij ri sutz', ri e are' caquitakej qui be.

²³ Rumal c'ut jun u takanic ri Ajawaxel quekajic, rumal chi c'u jun u takanic caquitakej qui be. C'u caquilatz'obisaj na quib che u patanixic ri Ajawaxel jacha' ri takanic ri yo'm rumal ri Moises.