Ajilanic 7 - Quiché Bible

Sipanic tak che u tastajic ri k'ijilabal

¹ Pa ri k'ij aretak ri Moises xuq'uis u woquic ri k'ijilabal, xutaso ruc' aseit, e rachil conojel ri e u chaconisan ri k'ijilabal xukuje' ri e rech ri porobal.

² Chanim ri e c'amal tak qui be ri amak', ri e to'baninak che u banic ri ajilanic, xebec.

³ Xebel qui jacha' c'u chuwäch ri Ajawaxel jacha' che sipanic wakib caret ri' ri ch'ukutal quij xukuje' cablajuj wacax, ri u bixic wa', jun caret cumal quieb c'amal tak be jun wacax c'ut cumal jujun. Ronojel wa' xquiya' chuwäch ri k'ijilabal.

⁴ Xubij c'ut ri Ajawaxel che ri Moises:

⁵ “Chebac'ama' tak ri caret chque xukuje' tak ri wacax, chebaya' c'u chque ri aj levitib rech quebe qui coj pa tak ri chac re ri Lic'om Rachoch Dios re rikoj ib, je jas ri u cholajil ri chac ri caquiban chquijujunal.”

⁶ Ri Moises xebuc'am ri caret xukuje' tak ri wacax, xebujach c'u chquixo'l ri aj levitib.

⁷ Chque ri e rija'lil ri Jerson xebuya' quieb caret xukuje' quiejeb wacax, are c'u wa' ri cajwataj chque tak ri qui chac.

⁸ Chque ri e rija'lil ri Merar xebuya' quiejeb caret xukuje' wajxakib wacax e are wa' ri quebajwataj che u banic ri qui chac chuxe' ri u takanic ri Itamar (ri u tat ri Itamar are' ri Aaron cojol tabal tok'ob).

⁹ Are c'u ri chque ri e rija'lil ri Coat man xebuya' ta caret chque mawi tak wacax, rumal rech chi ri tastalicalaj tak jastak ri quecuc'aj na, rajawaxic puwi' tak qui teleb quecuc'aj wi u bic.

¹⁰ Aretak xtastaj ri porobal ri e c'amal tak qui be ri amak' xequic'am bic tak ri e qui sipanic xequiya' c'u chuwäch ri porobal.

¹¹ Xubij c'ut ri Ajawaxel che ri Moises: “K'ij chk'ij jun c'amal u be jun amak' jalanic ri cuc'am ulok ri u sipanic che ri u tasic che ri porobal.”

¹² Pa ri nabe k'ij xuc'am ulok ri Naason (ri u tat ri Naason are' ri Aminadab, aj ramak' ri Juda).

¹³ Ri u sipanic are jun liq'uilic lak re sak puak ri cäpajan oxib (3) libra ruc' wajxakib (8) onz xukuje' jun nimalaj lak re sak puak ri cäpajan cajlajuj (14) onz (je' jas ri pajbalil aj k'atbal tzij rech ri k'ijilabal), qui cabichal e nojinak che utzalaj c'äj, ri yok'om aseit ruc', che ri sipanic quech tak c'äj;

¹⁴ c'o chi c'u na jun paq'uebal re k'an puak ri cäpajan quiejeb (4) onz, ri nojisam bic k'ol chupam,

¹⁵ jun alaj ama' wacax, jun ama' chij jun alaj ama' chij re jun u junab che u chi'xic jacha' che tabal tok'ob ri cächajirisaxic,

¹⁶ jun ama' q'uisic' che tabal tok'ob che u josk'ixic ri macaj,

¹⁷ chuq'uisbalil c'ut, che ri tabal tok'ob re utzirisan ib, quieb ama'ib tak wacax, job ama'ib tak chij, job ama'ib tak q'uisic' job alaj ama'ib tak chij re jujun qui junab. Are wa' ri u sipanic ri Naason (ri u tat ri Naason are' ri Aminadab).

^18-23 Pa ri ucab k'ij ri Natanael (u c'ojol ri Zuar, c'amal u be ri ramak' ri Isacar) xuc'am ulok ri u sipanic, xak c'u junam ri u sipanic ruc' ri xuya' ri Naason.

^24-29 Pa ri urox k'ij ri Eliab (u c'ojol ri Helon, c'amal u be ri ramak' ri Zabulon) xuc'am bic ri u sipanic, xak c'u junam ri u sipanic cuc' ri xquiya' ri e nabe.

^30-35 Pa ri ucaj k'ij ri Elisur (u c'ojol ri Sedeur, c'amal u be ri ramak' ri Ruben) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^36-41 Pa ri uro' k'ij ri Selumiel (u c'ojol ri Zurisaday, c'amal u be ri ramak' ri Simeon) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^42-47 Pa ri uwak k'ij ri Eliasap (u c'ojol ri Reuel, c'amal u be ri ramak' ri Gad) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^48-53 Pa ri uwuk k'ij ri Elisam (u c'ojol ri Amihud, c'amal u be ri ramak' ri Eprain) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^54-59 Pa ri uwajxak k'ij ri Gamaliel (u c'ojol ri Pedasur, c'amal u be ri ramak' ri Manases) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^60-65 Pa ri ubelej k'ij ri Abidan (u c'ojol ri Jedeoniy, c'amal u be ri ramak' ri Benjamin) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^66-71 Pa ri ulajuj k'ij ri Ahiezer (u c'ojol ri Amisaday, c'amal u be ri ramak' ri Dan) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^72-77 Pa ri ujulajuj k'ij ri Pajiel (u c'ojol ri Ocran, c'amal u be ri ramak' ri Aser) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

^78-83 Pa ri ucablajuj k'ij ri Ahir (u c'ojol ri Enan, c'amal u be ri ramak' ri Neptali) xuc'am ulok ri u sipanic, xak c'u junam ri u sipanic cuc' ri xquiya' ri e nabe.

⁸⁴ Je c'u ri', aretak xtastaj ri porobal, ri e c'amal tak qui be ri ramak' ri Israel xequichi'j cablajuj liq'uilak tak lak re sak puak, cablajuj nimak tak lak re sak puak xukuje' cablajuj paq'uebal re k'an puak.

⁸⁵ Chquijujunal ri liq'uilak tak lak re sak puak quepajan oxib libra ruc' wajxakib onz, chquijujunal c'ut ri nimak tak lak, cajlajuj (14) onz. Chnimalaj ronojel ri sak puak, chque conojel ri liq'uilak tak lak xukuje' chque conojel ri nimak tak lak quepajan oxc'al job (65) libra, je jas ri pajbal aj k'atbal tzij rech ri k'ijilabal.

⁸⁶ E c'o xukuje' cablajuj paq'uebal re k'an puak ri e nojisam ulok k'ol chquipam, ri quepajan quiejeb (4) onz chquijujunal, je jas ri pajbal aj k'ijilabal. Ri k'an puak ri xcoj che qui banic ri paq'uebal chnimalaj ronojel oxib (3) libra quiejeb (4) onz.

⁸⁷ Ri awajib chnimalaj conojel ri quecoj che tabal tok'ob ri quechajirisaxic e cablajuj c'ojol ama'ib tak wacax, cablajuj ama'ib tak chij, cablajuj alaj ama'ib tak chij re jujun qui junab, quecachilaj ri e cach tak sipanic re c'äj, cablajuj ama'ib tak q'uisic' che tabal tok'ob u mac ri macaj.

⁸⁸ Ri awajib chnimalaj conojel ri quecoj che ri tabal tok'ob re utzirisan ib chi conojel e juwinak quiejeb (24) c'ojol tak wacax, oxc'al ama'ib tak chij, oxc'al ama'ib tak q'uisic' xukuje' oxc'al alaj ama'ib tak chij re jujun qui junab. E are tak sipanic wa' che ri u banic ri rawas ri porobal, aretak tastajinak chic.

⁸⁹ Aretak xoc ri Moises chupam ri Lic'om Rachoch Dios re rikoj ib che tzijonem ruc' ri Ajawaxel, xuto chi ri Ajawaxel cäch'aw ulok ruc' kas puwi' ri tz'apibal ri c'o puwi' ri caxa re ri c'ulwächinic, ri c'o chquixo'l ri quieb aj cajalaj tak to'banelab ri e c'o qui xic'.