Ajilanic 35 - Quiché Bible

Ri quechbal ri aj levitib

¹ Ri Ajawaxel xutzijobej ri Moises chupam tak ri lianic re Moab, chunakaj ri Jordan, chuwäch ri Jerico, xubij c'u che:

² “Chaya' takanic chque ri aj israelib chi, che ri ulew ri cäyataj chque, chequiya' chque ri aj levitib tak tinimit ri quejeki' wi na, cheyok xukuje' chque ri juyub tak re yuk'bal ri e c'o chquij tak ri tinimit.

³ Ri aj levitib quejeki' na pa tak ri tinimit ri', pa tak ri juyub quequiya' wi na ri qui wacax xukuje' ri jule' tak cäwaj chic.

⁴ Ri juyub tak re yuk'bal ri rajawaxic queya' chque caquilic' na quib chrij ri tinimit, juwinak quieb c'am quetan chrij ri nimalaj tapia.

⁵ Ronojel ri ulew cux na cajtzalaj re cawinak quiejeb (44) c'am pa jujun u xcut, ri u bixic, xak junam quetan pa ri elebal k'ij xukuje' pa ri u kajebal k'ij, pa ri iquiak'ab xukuje' pa ri mox k'ab. Ri tinimit cacanaj can pa niq'uiajil, chque tak ri juyub re yuk'bal ri e c'o chrij.

⁶ Chque ri tak tinimit ri quebiya' chque ri aj levitib, wakib (6) quebux na to'tajisabal ib jawije' cuya' cutzucuj wi to'bal rib ri winak ri u cämisam jachin jun. Chque we tak tinimit ri' quebitik chi na cawinak quieb (42);

⁷ chnimalaj ronojel, rajawaxic quebiya' chque ri aj levitib cawinak wajxakib tak tinimit quecachilaj tak ri qui juyub re yuk'bal.

⁸ Ri tak tinimit ri quebiya' chque ri aj levitib ri quebiwesaj chque ri niq'uiaj chi aj israelib, chquijujunal tak ri amak' rajawaxic je caquiya' jas ri u q'uiyal ri xquitaklebej: chque tak ri ulew ri e nimak na, e q'ui tak ri tinimit ri quec'am na chque; chque tak ri ulew ri man kas ta e nimak, man e q'ui ta ri tinimit tak ri quec'am chque.”

Tinimit tak re aj to'tajisabal ib

⁹ Ri Ajawaxel xutzijobej ri Moises xubij c'u che:

¹⁰ “Chabij wa' chque ri aj israelib: aretak ri ix qui ramij ri nima' Jordan che ri oquem pa Canaan,

¹¹ rajawaxic quebicha' jujun tak tinimit che to'tajisabal ib, ri cuya' cutzucuj wi to'bal rib ri winak ri man are ta u chomanic xucämisaj ta jun winak.

¹² Chila' cäto'taj wi pa u k'ab ri rachalal ri cäminak ri cäraj cuya' rajil c'axelal che, man cäcäm ta c'u na c'ä cutac'aba' na rib chuwäch ri tinimit rech cäk'at tzij puwi'.

¹³ Chque tak ri tinimit, wakib quecanaj che to'tajisabal ib:

¹⁴ Oxib quecanaj pa ri elebal k'ij che ri Jordan oxib c'ut quecanaj pa Canaan.

¹⁵ We wakib tinimit tak ri' e tinimit re to'tajisabal ib, chque ri aj israelib jacha' xukuje' chque ri man e qui winakil ta ri e jekelic o xak e solinelab e c'o a pam chixo'l. Chila' cuya' cato'tajisaj wi rib ronojel ri man xuchomaj ta xucämisaj jun winak.

¹⁶ We c'o jachin jun cusoc jun winak ruc' jun ch'ich', cäcäm c'ut ri xsoquic, jun cämisanic wa', ri cämisanel cäc'okox na che cämical:

¹⁷ We c'o jachin jun cuch'ay jun winak ruc' jun abaj ri cuc'am ulok cämical, cacäm c'ut ri xch'ay che abaj, jun cämisanic wa', ri cämisanel cac'okox na che cämical.

¹⁸ We c'o jachin cuch'ay jun winak ruc' jun che' ri cuc'am ulok ri u cämical, cäcäm c'ut ri xch'ayic, jun cämisanic wa', ri cämisanel cac'okox na che cämical.

¹⁹ Ri rachalal ri cäminak ri nakaj na che are' cäcämisan na ri cämisanel aretak curiko.

²⁰ We c'o jachin jun cuch'iquimij jun winak rumal oyowal, o we cuq'uiak jun jasach chrij cuc' itzel tak chomanic,

²¹ o rumal c'ulelam ib cuch'ay cuc' tak ri e u k'ab, cäcäm c'ut ri winak, ri ajchak'mac cäc'okox na che cämical cämisanel c'u wa'. Ri rachalal ri cäminak ri nakaj na che are' cacämisan na ri cämisanel aretak curiko.

²² We c'u ne c'o jachin jun xak c'ätetal cuch'iquimij jun winak, man rumal ta c'ulelanic, o we cuq'uiak jun jasach chrij ri man ruc' ta itzel chomanic,

²³ o man xril ta xuq'uiak jun abaj ri cäcämisanic, cakaj c'ut ri abaj puwi' cäcämisax c'u rumal man qui c'ulel ta c'u quib mawi u choman ta u banic jun c'ax che.

²⁴ Are c'u ri tinimit cux na k'atal tzij chquixo'l, ri xbanow ri cämic ruc' ri rachalal ri cäminak ri cäraj cutoj rajil q'uexelal ri cämical ri xbanic, je jastak we cholajil ri'.

²⁵ Ri tinimit rajawaxic cuto' na u wi' ri xbanow ri cämic rech man catoj ta rajil c'axelal che rumal ri rachalal ri xcäm rumal, cuban c'u na chi catzelej pa ri tinimit re to'bal ib jawije' ri u tzucum wi to'bal rib. Ri xcämisanic rajawaxic cäcanaj chila' c'ä cacäm na ri quinimal ri e cojol tabal tak tok'ob ri kas tastalic.

²⁶ We c'u quel bic chrij ri rulewal ri tinimit re to'tajisabal ib,

²⁷ ri rachalal ri xcämisaxic man c'o ta jun il cäkaj ta puwi' we curik chrij cucämisaj ta c'ut.

²⁸ Ri xcämisanic rajawaxic cäcanaj chupam ri tinimit re to'tajisabal ib c'ä cäcäm na ri qui nimal ri e cojol tabal tak tok'ob. C'äte ri' cuya' cätzelej pa ri rulew.

²⁹ We e chomanic tak ri' e jun pixab wa' chiwe ri quek'ax cuc' ri tataxelab quebopan c'u cuc' ri c'ojolaxelab, apawije' ta ne ri quixjeki' wi.”

Pixab paquiwi' tak ri k'alajisanic xukuje' ri tojbal

³⁰ “Xuwi rumal ri qui k'alajisanic quieb oxib cuya' cac'okox jun cämisanel che cämical. Xa jun k'alajisanel man cubana' ta che u c'okoxic ta jun winak che cämical.

³¹ Man cuya' ta cac'am puak che u q'uexwäch ri u c'aslemal jun cämisanel ri c'okotajinak che cämical; we winak ri' rajawaxic cäcämic.

³² Man cuya' taj cac'am puak rech cäya' ta che ri cämisanel ri xutzucuj u to'tajisaxic rib chupam jun chque tak ri tinimit ri e c'utum rech cätzelej ta chupam ri rulew c'ä mojok chcäm ri qui nimal ri e cojol tabal tak tok'ob.

³³ Miwawasij ri ulew ri quixxejekel wi na cuc' tak cämisanic, ri cämisanic cärawasij ri ulew man c'o ta c'u jas caya' ta che u q'uexwäch ri cämisanel we ta ma ta are ri u cämisaxic ri xbanow ri cämisanic.

³⁴ Miwawasij ri ulew ri quixxejekel wi na ri xukuje' quinejekel wi na, in c'ut ri Ajawaxel, in jekel chquixo'l ri aj israelib.”