Ajilanic 32 - Quiché Bible

Ri ramak' ri Ruben xukuje' ri rech ri Gad xejeki' pa ri elebal k'ij che ri Jordan

¹ Ri e amak', ri re ri Ruben xukuje' ri re ri Gad sibalaj e q'ui ri qui wacax e c'olic. Aretak xquilo chi ri e rulew ri Jazer xukuje' ri re Galaad sibalaj e utz che qui pok'isaxic wacax,

² xebe che rilic ri Moises, ri Eleazar ri cojol tabal tok'ob xukuje' ri e c'amal tak u be ri tinimit, xequibij c'u chque:

³ “Chiwilampe': ri ulew tak re Atarot, re Dibon, re Jazer, re Nimra, re Hesbon, re Eleal, re Sebam, re Neb xukuje' ri re Beon,

⁴ ri u ch'äcom ri Ajawaxel che ri tinimit re Israel, e ulew ri e yuk'bal tak wacax, e c'o c'ut qui wacax ri e pataninel tak awech.

⁵ We utz cawilo, chaya' we ulew ri' chke, mujak'axej c'ut ch'käp che ri nima' Jordan.”

⁶ Xutzelej c'u u bixic ri Moises chque: “¿La are' ta quiwaj ix quixcanaj ta can waral e are' ta c'ut ri e iwachalal quebe ta che u banic ch'o'j?

⁷ ¿Jasche qui ban chque ri aj israelib chi caqueblaj qui c'u'x rech man quek'ax ta chupam ri ulew ri u yo'm ri Ajawaxel chque?

⁸ Are jewa' ri xquiban ri e i tat aretak xebantak bic pa Cades-barney che rilic we ulew ri'.

⁹ Xebopan c'ä ruc' ri alaj nima' re Escol xquinic'oj c'ut ri ulew, xquiban c'ut chi xqueblaj qui c'u'x ri aj israelib rech man queboc ta chupam ri ulew ri u yo'm ri Ajawaxel chque.

¹⁰ Rumal ri' ri Ajawaxel xpe royowal pa ri k'ij ri', xuban ri chi'nic ri kas cäban na

¹¹ chi ri winak ri ebelinak ulok pa Ejipt ri e c'o chic juwinak qui junab cäpakic man quequila' ta na u wäch ri ulew ri xinchi'j chque chi quinya' che ri Abraham ri Isaac xukuje' ri Jacob, rumal rech chi man xetaken ta che ruc' jicomal.

¹² Xuwi' ri Caleb xukuje' ri Josue jic u takexic ri Ajawaxel xquibano. (Ri u tat ri Caleb are' ri Jepon ri aj senezeyib, ri u tat ri Josue are' ri Nun.)

¹³ Ri Ajawaxel xpe royowal chque ri aj israelib xuban c'u chque chi xebinicat chi na cawinak junab chupam ri chaki'j uwo sak, c'ä man c'o ta jun xc'asi' ta can chque ri xquiyac royowal cumal ri itzel tak qui banoj.

¹⁴ Are c'u ri ix camic ri ix qui c'ojolaxelab ri tataxelab aj maquib, quiwaj u banic ri xquiban ri e i tat, che u walijisaxic chi jumul ri royowal ri Ajawaxel chrij ri Israel.

¹⁵ We ri ix man quiwaj ta quitakej ri Ajawaxel, ri are' cuban na chi ri aj israelib quecanaj chi na can q'ui k'ijol chupam ri chaki'j uwo sak, ix c'u ri' ri quixmacubenic chi cäsachisax na qui wäch.”

¹⁶ Xekeb c'u ruc' ri Moises xquibij c'u che: “Ri cäkaj uj chi quekaban tak qui warabal tak ri e ka chij xukuje' tak ri e ka wacax, xukuje' tak tinimit chque tak ri kachalaxic.

¹⁷ C'äte c'u ri' kas uj cakawik na kib ruc' aninakil cuj nabej c'u chquiwäch ri niq'uiaj aj israelib chic, c'ä quekac'am na bic chupam ri culew. E are' tak c'ut, ri e kachalaxic quecanaj can chquipam ri tak tinimit, ri co quecanajic rech man c'o ta caquic'ulmaj pa qui k'ab ri winak ri e jekel chupam we ulew ri'.

¹⁸ Man cujtzelej ta na cho tak kachoch we ta ma ta conojel ri aj israelib e qui majim chi tak ri kas culew.

¹⁹ Rumal c'u rech chi ri kulew canajinak jewa', pa ri elebal k'ij che ri nima' Jordan, man quekatokij ta chic ulew ch'käp che ri Jordan, mawi c'äjela'.”

²⁰ Ri Moises xutzelej c'u u bixic chque: “We quebitz'akatisaj tak ri i tzij quebiwik c'u iwib che u banic ri ch'o'j chuxe' ri u takanic ri Ajawaxel,

²¹ we iwonojel ix i wikom tak iwib qui ramij ri nima' Jordan chuxe' ri u takanic ri Ajawaxel, quixcanaj c'u can chila' c'ä ri Ajawaxel quebuq'uiak na bic conojel tak ri e u c'ulel

²² u ch'äcom ta c'u ri ulew, c'äte c'u ri' cuya' quixtzelejic, man c'o ta chi c'u i c'as cacanaj ta can ruc' ri Ajawaxel xukuje' ruc' ri Israel. Cacanaj c'ut we u ulew ri' che iwechbal je jas c'u u bim ri Ajawaxel.

²³ We c'u man jewa' qui bano, chiwetamaj chi quiban jun macaj chuwäch ri Ajawaxel copan c'u na ri c'äjisabal i wäch rumal we macaj ri'.

²⁴ Chebiyaca' ba' ri tinimit tak chque tak ri e iwachalal xukuje' tak warabal chque tak ri e i chij, chi tz'akatisaj c'ut ri i tzij.”

²⁵ Ri e rija'lil ri Gad xukuje' ri e rech ri Ruben xquitzelej u bixic che: “We pataninel tak awech ri' caquiban na ri e a takom che qui banic.

²⁶ Ri e kixokil xukuje' ri ch'utik tak ka c'ojol, quecachilaj ri wacax xukuje' conojel tak ri kawaj, quecanaj na canok waral chquipam tak ri tinimit re Galaad,

²⁷ are c'u ri uj, ri uj pataninel tak awech, cakawik tak kib cujbe c'u che u banic ri ch'o'j chuxe' ri u takanic ri Ajawaxel, jacha' ri uj a takom che u banic.”

²⁸ Ri Moises xebuya' c'u tak we takanic ri' che ri Eleazar ri cojol tabal tok'ob, che ri Josue xukuje' chque ri c'amal tak be quech jujun tak ja winak ri e quech ri jalan tak amak' re Israel:

²⁹ “We conojel ri achijab quech ri ramak' ri Gad xukuje' ri Ruben queboc'ow junam iwuc' chupam ri Jordan qui wikom tak quib che u banic ri ch'o'j chuxe' ri u takanic ri Ajawaxel cäquich'äc ta c'u na ri ulew, c'äte c'u ri' ri ix quijach na ri ulew re Galaad pa qui k'ab jacha' kas che culew.

³⁰ We c'u man quek'axic quiwikom quib, caquitaklebej c'u na jun ulew chixo'l ix chupam ri ulew Canaan.”

³¹ Ri e rachalaxic ri Gad xukuje' ri rech ri Ruben xquitzelej u bixic: “Cakaban na ri u takom u banic ri Ajawaxel chque we e pataninel tak awech ri'.

³² Cujk'ax na ka wikom kib cujoc chupam ri ulew Canaan cakanimaj ri Ajawaxel, cacanaj c'u na ri ulew pa ka k'ab ri c'o pa ri elebal k'ij che ri Jordan jacha' che kechbal.”

³³ Jeri' chque ri amak' tak re Gad re Ruben, xukuje' ri pa niq'uiaj che ri ramak' ri Manases, ri Moises xebuya' chque ri ulew re Sehon, ajawinel aj amoreyib, xukuje' ri rech ri Og, ajawinel re Basan, xerachilaj ri tinimit tak ri e u tz'akatil xukuje' tak ri ulew ri e c'o chrij.

³⁴ Ri e aj ramak' ri Gad xequiban qui banic tak ri tinimit ri e rech ri Dibon, ri Atarot, ri Aroer,

³⁵ ri Atarot-sopan, ri Jazer, ri Jogbe,

³⁶ ri Bet-nimra xukuje' ri Bet-aran, co c'u xquiban chque xukuje' xequiban tak qui warabal ri qui chij.

³⁷ Ri e aj ramak' ri Ruben xequiban qui banic tak ri tinimit ri rech ri Hesbon, ri Eleal, ri Quiriataim,

³⁸ ri Neb, ri Baal-meon xukuje' ri Sibma, xeq'uex c'u tak ri qui bi' jujun chque xequicoj c'u ri qui bi' chquij ri xebanow qui banic.

³⁹ Ri e rachalaxic ri Maquir (u c'ojol ri Manases) xquimajij ri ulew re Galaad xquiban c'u quech che, xequiq'uiak bic ri aj amoreyib ri e jekel chila'.

⁴⁰ Are c'u ri Moises xujach ri ulew re Galaad pa qui k'ab ri e rachalaxic ri Maquir, xejeki' c'u wa' chila'.

⁴¹ Ri Jair, rachalaxic ri Manases, xuban rech che jujun tak qui tinimit ri aj amoreyib xucoj c'ut Habot-jair che qui bi'.

⁴² Ri jumulaj aj Noba xquimajij ri Kenat xukuje' tak ri tinimit ri e c'o pa u k'ab, xucoj c'ut ri kas u bi' chrij, Noba.