Ajilanic 30 - Quiché Bible

Ri u cholajil ri chi'nic

¹ Ri Moises xubij chque ri e c'amal tak qui be ri camak' ri aj israelib:

² “Ri Ajawaxel u yo'm takanic chi aretak c'o jun winak cuban jun chi'nic che o cuya' u tzij che u banic jun jasach chi'nic ri kas cäban na, rajawaxic cutz'akatisaj ri u tzij chubana' c'u ronojel ri u chi'm u banic.

³ Aretak jun ac'al ixok, c'ä c'o chuxe' ri u takanic ri u tat, cuban jun chi'nic che ri Ajawaxel o cuya' u tzij che u banic jun jasach,

⁴ we ri u tat, aretak coc pa u jolom chi u banom jun chi'nic o u yo'm u tzij che u banic jun jasach, man cuk'il ta c'u che u banic, ya'tal che chi cutz'akatisaj ri xuchi'j o u yo'm u tzij che u banic.

⁵ We ri u tat, aretak coc pa u jolom, cuk'il c'u che u banic, man ya'tal ta che chi cutz'akatisaj ri xuchi'j o ri xuya' u tzij che u banic. Xk'il c'ut rumal ri u tat, ri Ajawaxel man cucoj ta u chuk'ab che chi cutz'akatisaj u banic.

⁶ We c'u are' jun ixok ri u banom chi'nic che ri Ajawaxel o u yo'm u tzij che u banic jun jasach ri man xuchomaj ta na,

⁷ cac'ulextax c'ut, aretak c'u coc pa u jolom ri rachajil, man cuk'il ta c'u che u banic, ya'tal che chi cutz'akatisaj u banic ri xuchi'j o ri u yo'm u tzij che u banic.

⁸ We c'u ri rachajil, aretak coc pa u jolom, cuk'il che qui banic, man ya'tal ta chi c'u ri' che chi cutz'akatisaj qui banic ri xebuchi'j xukuje' ri u yo'm u tzij che qui banic ri man xebuchomaj ta na. Ri Ajawaxel man cucoj ta na u chuk'ab che chi quebutz'atisaj qui banic.

⁹ We ri cabanow jun chi'nic are jun malca'n o jachom, ya'tal che chi quebutz'akatisaj conojel ri u yo'm u tzij che qui banic.

¹⁰ Aretak jun c'ulanic ixok cuban jun chi'nic o cuya' u tzij che u banic jun chi'nic ri kas cäban na c'o c'u ne cho rachoch ri rachajil,

¹¹ we ri rachajil, aretak coc pa u jolom, man cuk'il ta che u banic mawi ma ta cakaj pa u jolom ri cubano, ri are' ya'tal che chi quebutz'akatisaj tak ri xebuchi'j qui banic xukuje' ri xebuya' u tzij che qui banic.

¹² We c'u ri rachajil, aretak coc pa u jolom, cubij chi man queban taj, man ya'tal ta chi che chi quebutz'akatisaj are' c'ut ri rachajil xbin che chi man quebuban taj. Ri Ajawaxel man cucoj ta u chuk'ab che chi quebutz'akatisaj.

¹³ Ri achajilaxel ya'tal che cujiquiba' u banic o cuk'il u banic apachique chi'nic o ri kas chi'nic ri cäban na ri chokinak wi ri rixokil xukuje' cätakchi'xic che man cäwa' taj.

¹⁴ We ri are' man c'o ta jas cuban che u k'ilic, we c'u coc'ow jun xukuje' jun k'ij chic, rumal rech chi man c'o ta jas cubij quebujiquiba' conojel tak ri chi'nic o ri e u yo'm wi tak u tzij chi quebubano.

¹⁵ We c'u c'äte cak'ilonic aretak oquinak chi pa u jolom, are' ba' queklenic chi ri ixok man catz'akatisan taj.”

¹⁶ E are' tak pixab wa' ri xebuya' ri Ajawaxel che ri Moises ri rajawaxic cuban ri achajilaxel ruc' ri ixokilaxel, xukuje' ri tataxel ruc' ri mialaxel, aretak c'ä k'apoj, c'ä c'o c'u ne chuxe' ri u takanic ri u tat.