Ajilanic 26 - Quiché Bible

C'ac' rajilaxic ri Israel

¹ Aretak oc'owinak chic we cämisanel cämibal ri', ri Ajawaxel xubij che ri Moises xukuje' che ri Eleazar (u c'ojol ri Aaron):

² “Chibana' jun ajilanic, pa jujun tak ja winak, chque conojel ri aj israelib ri juwinak chic qui junab cäpakic, ri e utz chi che u banic ch'o'j.”

³ Ri Moises xukuje' ri Eleazar xequiya' c'u takanic chque ri aj israelib pa tak ri lianic re Moab, chuxcut ri nima' Jordan, chuwäch ri Jerico,

⁴ chi chequitz'ibaj qui bi' ri e c'o chi juwinak qui junab capakic, je jacha' ri takanic ri u yo'm ri Ajawaxel che ri Moises. E are' tak wa' ri aj israelib ri e elinak ulok pa Ejipt:

⁵ Ri e rachalaxic ri e rija'lil ri Ruben, nabe u c'ojol ri Israel, ri e rech ri Enoc, Palu,

⁶ Hezron xukuje' ri Carmi;

⁷ je jas ri ajilanic ri e u k'ab tak rachalaxic ri Ruben e cawinak oxib mil ruc' wukub sient juwinak lajuj (43,730) achijab.

⁸ Che ri Palu xalax wi ri Eliab,

⁹ che c'u ri Eliab xebalax wi ri Nemuel, ri Datan xukuje' ri Abiram. Ri Datan rachil ri Abiram e qui tz'akatil ri jumulaj ya'l tak no'j ri', junam ruc' ri Core, xquiwalijisaj quib che u c'ulelaxic ri Ajawaxel xukuje' je xquiban che ri Moises rachil ri Aaron,

¹⁰ xujak c'u rib ri ulew xebubik' c'u bic e are' qui cabichal xukuje' ri Core, ronojel c'ut ri jumulaj xcämic, e quieb sient c'ut ruc' cawinak lajuj (250) achijab xecäm pa ri k'ak'. Xajwataj c'u wa' che c'utbal chque ri niq'uiaj chic.

¹¹ Man xecäm ta c'u ne ri e u c'ojol ri Core.

¹² Ri e rachalaxic ri e rija'lil ri Simeon e are' ri e rech ri Nemuel, Jamin, Jaquin,

¹³ Zera xukuje' ri Saul;

¹⁴ je jas ri ajilanic, ri e rija'lil ri Simeon ri cajilabal e juwinak quieb mil ruc' quieb sient (22,200) achijab.

¹⁵ Ri e rachalaxic ri e rija'lil ri Gad e are' ri e rech ri Zepon, Hagui, Sun,

¹⁶ Ozni, Er,

¹⁷ Arod xukuje' ri Arel;

¹⁸ je jas ri ajilanic, ri e rija'lil ri Gad ri cajilabal e cawinak mil ruc' job sient (40,500) achijab.

¹⁹ Chque ri e u c'ojol ri Juda, xecämic ri Er xukuje' ri Onan pa ri ulew re Canaan,

²⁰ jeri' ri e u k'ab rachalaxic ri e rija'lil ri Juda e are' ri e rech ri Sel, Pares xukuje' ri Zera.

²¹ Ri e rachalaxic ri e rija'lil ri Pares e are' ri e rech ri Hezron xukuje' ri Hamul;

²² je jas ri e ajilanic, ri e rija'lil ri Juda ri cajilabal e oxc'al waklajuj mil ruc' job sient (76,500) achijab.

²³ Ri e rachalaxic ri e rija'lil ri Isacar e are' ri e rech ri Tol, Pu,

²⁴ Jasub xukuje' ri Simron;

²⁵ je jas ri ajilanic, ri e rija'lil ri Isacar ri cajilabal e oxc'al quiejeb mil ruc' oxib sient (64,300) achijab.

²⁶ Ri e u k'ab rachalaxic ri e rija'lil ri Zabulon e are' ri e rech ri Sered, Elon xukuje' ri Jaleel;

²⁷ je jas ri ajilanic, ri e rija'lil ri Zabulon ri cajilabal e oxc'al mil ruc' job sient (60,500) achijab.

²⁸ Chque ri e u k'ab rachalaxic ri e rija'lil ri Jose e are' ri e quech ri cämak' ri Manases xukuje' ri Eprain.

²⁹ Che ri Manases, ri e u k'ab rachalaxic re Maquir; re Maquir, ri rachalaxic re Galaad;

³⁰ re Galaad, ri e u k'ab rachalaxic re Jezer, re Helec,

³¹ re Asriel, re Siquem,

³² re Semid xukuje' re Heper.

³³ Ri Zelopehad (u c'ojol ri Heper) man xec'oji' ta u c'ojol xane' e tak u mia'l, e are' c'u tak qui bi' wa' Maal, Noa, Hogla, Milca xukuje' Tirs.

³⁴ Je jas ri ajilabal ri e rija'lil ri Manases ri cajilabal e cawinak cablajuj mil ruc' wukub sient (52,700) achijab.

³⁵ Ri e rachalaxic ri e u k'ab tak rija'lil ri Eprain e are' ri e rech ri Sutel, ri Bequer xukuje' ri Tahan.

³⁶ Ri e rija'lil ri Sutel, e are' ri rachalaxic re Eran.

³⁷ Je jas ri ajilanic, ri e rija'lil ri Eprain ri cajilabal e juwinak cablajuj mil ruc' job sient (32,500) achijab. E are' tak wa' ri e rija'lil ri Jose, pa ri qui cholajil ri rachalaxic.

³⁸ Ri e u k'ab rachalaxic ri e rija'lil ri Benjamin e are' ri Bela, ri Asbel, ri Ahiram,

³⁹ ri Sepupam xukuje' ri Hupam.

⁴⁰ Ri e u k'ab rachalaxic ri e rija'lil ri Bela e are' ri e rech ri Ard xukuje' ri Naaman, e u c'ojol ri Bela.

⁴¹ Je jas ri ajilanic, ri e rija'lil ri Benjamin ri cajilabal e cawinak job mil ruc' wakib sient (45,600) achijab.

⁴² Ri e rija'lil ri Dan e are' tak ri e rech ri rachalaxic ri Suham.

⁴³ Je jas ri ajilanic, ri e rija'lil ri Suham ri cajilabal e oxc'al cajlajuj mil ruc' quiejeb sient (64,400) achijab.

⁴⁴ Ri e u k'ab rachalaxic ri e rija'lil ri Aser e are' ri e rech ri Imna, ri Isu xukuje' ri Beriy.

⁴⁵ Ri e u k'ab rachalaxic ri e rija'lil ri Beriy e are' ri e rech ri Jeber xukuje' ri Malquiel.

⁴⁶ Ri Aser xalax jun u mia'l ri xbinax Ser.

⁴⁷ Je jas ri ajilabal, ri e rija'lil ri Aser ri cajilabal e cawinak oxlajuj mil ruc' quiejeb sient (53,400) achijab.

⁴⁸ Ri e u k'ab rachalaxic ri e rija'lil ri Neptali e are ri e rech ri Jazeel, ri Gun,

⁴⁹ ri Jezer xukuje' ri Silem.

⁵⁰ Jas ri ajilanic, ri e rija'lil ri Neptali ri cajilabal e cawinak job mil ruc' quiejeb sient (45,400) achijab.

⁵¹ Ri aj israelib ri xebajilaxic aretak xban ri ajilanic ri cajilabal e wakib sient jun mil ruc' wukub sient juwinak lajuj (601,730) achijab.

Ri cäban che u jachic ri ulew

⁵² Ri Ajawaxel xutzijobej ri Moises xubij c'u che:

⁵³ “Chquixo'l tak we winak ri' cäjach wi na ri ulew, je jas ri u cholajil ri cajilabal ri xelic.

⁵⁴ Chque ri jun tak mulaj ri e q'ui na caya' na jun nim ch'akap ulew chque c'ut ri jun tak mulaj ri man e kas ta q'ui jun ch'akap ulew ri man kas ta nim. Chquijujunal ri jun tak mulaj caya' na jun ch'akap ulew chque je jas ri ajilanic ri xbanic.

⁵⁵ Ri u jachic ri ulew caban na rumal taklebenic. Chquijujunal caquic'am na ri quech je jas ri ramak' ri qui tat.

⁵⁶ Ri jachanic caban na rumal taklebenic, je chquixo'l ri e jun tak mulaj ri e q'ui na xukuje' chquixo'l ri man e q'ui taj.”

Cajilaxic ri aj levitib

⁵⁷ Ri e rachalaxic rech ri ramak' ri Levi ri xebajilax pa ri ajilanic e are' ri e rech ri Jerson, ri Coat xukuje' ri Merar.

⁵⁸ Ri e cachalaxic ri aj libnitab, ri aj hebronib, ri aj malitib, ri aj musitab xukuje' ri aj coretib, e ija'lil aj levitib. Ri u tat ri Amram are' ri Coat.

⁵⁹ Ri Amram xc'uli' ruc' jun u mia'l ri Levi, Jocabed u bi', xil c'u u wäch aretak c'ä c'o ri Levi pa Ejipt. Ri Amram ri Jocabed e are' u tat u nan ri Aaron, ri Moises xukuje' ri Mariy.

⁶⁰ Ri e u c'ojol ri Aaron e are' ri Nadab, ri Abiu, ri Eleazar xukuje' ri Itamar.

⁶¹ Ri Nadab xukuje' ri Abiu xecämic aretak xquichi'j jun k'ak' chic chuwäch ri Ajawaxel.

⁶² Ri achijab chnimalaj conojel ri e rija'lil ri Levi, ri jujun tak qui q'uil cäpakic, e juwinak oxib mil (23,000). Ri e are' man e ajilam ta cuc' ri niq'uiaj aj israelib chic, rumal rech chi ri e are' man yo'm ta jun quechbal.

⁶³ Are wa' ri xel wi ri cajilabal ri aj israelib ri xban rumal ri Moises xukuje' ri Eleazar ri cojol tabal tok'ob, pa tak ri lianic re Moab, chunakaj ri Jordan chuwäch ri Jerico.

⁶⁴ Chquixo'l ri e are' mawi ta ne xa ta jun c'o ta chque aretak ri Moises xukuje' ri Aaron xquiban ri ajilanic chupam ri chaki'j uwo sak re Sinai,

⁶⁵ are c'u ri Ajawaxel xyo'w u bixic chque chi quecäm na canok chupam ri chaki'j uwo sak. Xak xuwi c'u ri Caleb rachil ri Josue xeto'taj canok, mawi ta ne jun xcanaj ta can chque. (Ri u tat ri Caleb are' ri Jepon, ri u tat ri Josue are' ri Nun.)