Ajilanic 25 - Quiché Bible

Ri aj israelib caquiya' k'ijilanic che ri Baal-peor

¹ Aretak ri aj israelib xquijekeba' quib pa Sitim, ri cachijab xquichaplej u tz'iloxic quib cuc' tak ri ixokib aj moabib,

² ri quecula'j aretak caquiya' tabal tak tok'ob chque tak ri e qui diosib. Ri aj israelib e are' juch'ob che u tijic tak we wa ri' xek'ijilan chque ri e qui diosib ri aj moabib,

³ je c'u ri' xquiya' quib xejurux che u k'ijilaxic ri Baal-peor. Xoyowar c'ut ri Ajawaxel chrij ri Israel,

⁴ xubij c'u che ri Moises: “Chebamulij conojel ri e c'amal tak u be ri tinimit, chebacämisaj chnuwäch pa k'ij chi sakil. Jeri' coc'ow na ri woyowal che ri Israel.”

⁵ Ri Moises xuya' takanic chque ri qui k'atal tak tzij ri aj israelib: “Chijujunal ix rajawaxic quebicämisaj tak ri achijab re ri iwamak' ri xquiya' quib xejurux bic che u k'ijilaxic ri Baal-peor.”

⁶ Jun c'u aj israel xuc'am bic jun ixok aj Madian cho rachoch, chuwäch ri Moises xukuje' chquiwäch conojel ri aj israelib ri qui mulin quib, cätajin c'u ne quebok' ri e are' chuchi' ri Lic'om Rachoch Dios re rikoj ib.

⁷ Aretak xril wa' ri Pinees (u c'ojol ri Eleazar, ri' u mam c'ut ri Aaron cojol tabal tok'ob) xutas rib chque ri aj israelib ri quimulin quib, xuc'am bic ri u tz'imaj ch'ich' pu k'ab

⁸ xuterenej c'u bic ri aj israel c'ä pa ri warabal, chila' c'u xebuk'ok'ej wi ri aj israel chupam xukuje' ri ixok. Jeri' xtani' ri cämibal ri cätajin quebucämisaj ri aj israelib,

⁹ e cäminak chi c'u ne juwinak quiejeb mil (24,000) chque.

¹⁰ Are c'u ri Ajawaxel xutzijobej ri Moises xubij c'u che:

¹¹ “Ri Pinees banowinak chi coc'ow ri woyowal chquij ri aj israelib, rumal rech chi ri are' c'o junam achixomanic ruc' je jas ri c'o wuc' in chque. Rumal ri' man nu na yo'm ta wib chi in u c'amom ta bic ri achixomanic man xinq'uis ta c'u u sachixic qui wäch.

¹² Chabij che, chi, ri in quinban jun c'ulwächinic ruc' re jamaril,

¹³ rumal c'u rech wa' quinjächo, che are' xukuje' pa qui k'ab ri e rija'lil, chi quebux cojol tak tabal tok'ob re amak'el, rumal rech chi xachixom chwe je c'u ri' xurik ri sachbal macaj chque ri aj israelib.”

¹⁴ Ri aj israel ri xk'ok'exic junam ruc' ri ixok aj Madian, Zimri u bi', c'amal u be jun ja winak aj ramak' ri Simeon (ri u tat ri Zimri are' c'ut ri Sal).

¹⁵ Ri ixok aj Madian, Cozbi u bi', u mia'l c'ut ri Zur, c'amal qui be e jumulaj tak ja winak pa Madian.

¹⁶ Ri Ajawaxel xutzijobej ri Moises xubij c'u che:

¹⁷ “Chibana' c'ax chque ri aj madianib chebich'äc'a,

¹⁸ je jacha' ri e are' xquiban c'ax chiwe cumal ri itzel tak qui banoj xquiban c'u chiwe chi xixoc che u k'ijilaxic ri Baal-peor, xukuje' ri xuban ri Cozbi, u mia'l ri c'amal be aj Madian, ri xcoj tz'imaj ch'ich' che u cämisaxic aretak xintak ulok jun cämisanelalaj yabil chiwe rumal rech chi xik'ijilaj ri Baal-peor.”