Ajilanic 24 - Quiché Bible

Ri Balaam cuya' na u bixic ri cac'ulmatajic

¹ Rumal c'u rech chi xril ri Balaam chi ri Ajawaxel utz che chi cätewichi'x ri Israel, man xbe ta chic che u c'amic ri cäc'ulmataj na ri cubij ta na ri Dios che, jacha' ri u banom quieb oxib mul, xane' xuya' u wäch che ri chaki'j uwo sak.

² Aretak c'u xril ri Balaam chi ri Israel quicholajim quib pa tak amak', xmajix rumal ri ruxlabal ri Dios;

³ are c'u ri Balaam xuya' u bixic we c'ulmatajic ri': “Tzijol ri cuya' ri Balaam (u c'ojol ri Beor) achi ri cäca'y pa che' pa abaj,

⁴ chi aretak cämajitajic sibalaj cäca'y na chi sak, ri quebuc'am tak tzijol xukuje' queril c'utwächinic ri cuc'ut ri Dios chuwäch ri c'o ronojel u cuinem.

⁵ ¡Jacob, sibal e je'l tak ri a cäbal ri lic'om! ¡Sibalaj je'lic, Israel, ri tak a kajebal!

⁶ ¡Ri e je ta ne ri e c'o tut ri quechololic, ticonijibal chuchi' jun nima', c'oc'al ri e ticom rumal ri Ajawaxel, tak chacalte' chuchi' ri ja'!

⁷ Ri Israel cäc'oji' na u ja' cätixixic che u kumuxic xukuje' che qui ja'xic tak ri qui tico'n. Ri rajawinel cätakan na puwi' ri Agag; ri u cuinem re ajawinic sibalaj cux na nim.

⁸ Ri Dios, ri xebesan ulok pa Ejipt, are je chque e are' ri cux che ri juyubal wacax ri e ruc'a'. Ri Israel quebubik' na tak ri e nimak tak tinimit c'ulel; quebuk'ajisaj tak na ri e u bakil, quebusoc c'u na cuc' tak ri e u ch'ab.

⁹ Aretak cacoti' che uxlanem, jeri' cäbantaj jun coj: man c'o ta jachin jun cuchajij ta anima' cuc'asuj. ¡Chtewichitaj ri cattewichinic, xukuje' chc'okotaj ri catc'okonic!”

Ri Balaam cuya' na u bixic ri cac'ulmatajic

¹⁰ Ri Balac aretak xuta' wa', sibalaj xpe royowal che ri Balaam, xupak' c'ut ri u k'ab xubij che: “In xatin siq'uij rech quebac'okoj tak ri e nu c'ulel, xc'ulmataj c'ut chi oxib mul chi wa' quebatewichi'j.

¹¹ ¡Are utz na chawe chi cattzelej cho awachoch! In nu chi'm chi quebenban na nimak tak nimarisabal a k'ij, are' c'u ri Ajawaxel k'atininak.”

¹² Are' c'u ri Balaam xutzelej u bixic che: “Nu yo'm chic u bixic chque ri e a tako'n chi,

¹³ pune' ta ne caya' ronojel ri k'an puak xukuje' ri sak puak ri cuch'ij ri nimalaj awachoch, ri in man quincuin ta chi ma ta chebinimaj tak ri e u takanic ri Ajawaxel mawi quinban jun jasach utz mawi lawalo ri xak ta pa wech wi, chi xuwi c'u quinbij na jachique ri quinutak ri Ajawaxel che u bixic.

¹⁴ Utz ba ri', quintzelej chupam ri wulew; quinbij c'u na canok chawe ri cuban na we tinimit ri' pa tak ri k'ij ri quepe na ruc' ri a tinimit.”

¹⁵ Are c'u ri Balaam xuya' na u bixic ri cäpe na: “Tzijol ri cuya' ri Balaam (ri u c'ojol ri Beor), achi ri caca'y pa ri che' pa ri abaj,

¹⁶ chi aretak camajitajic sibalaj cäca'y na chi sak, ri cuc'am ri retamanic ri cuya' ri Dios aj caj, ri quebuc'am tak tzijol xukuje' queril c'utwächinic ri cuc'ut ri Dios chuwäch ri c'o ronojel u cuinem.

¹⁷ Quinwil apan ri petinak, c'o ri quinwil apanok ri c'o chinaj: jun ch'imil ri quebel che ri Jacob, jun ajawinel ri cäwalij pa Israel. Cuxak'alej na ri u jolom ri Moab, quebuxak'alej na ri e rija'lil ri Set.

¹⁸ Cuch'äc na ri Edom, coc na ri Seir pa u k'ab, ri are' u c'ulel. Ri Israel quebuchacuj na nimak tak mayibalil.

¹⁹ Jun ch'äcanel quel na ulok che ri Jacob cusachisaj c'u na qui wäch ri quecanoj canok chupam ri tinimit.”

²⁰ Xril c'u apanok ri Balaam ri Amalec, xuya' c'u u bixic ri cac'ulmataj na: “Ri Amalec are jun nim tinimit ri nim u banic, xa c'u kas casachisax na u wäch.”

^21-22 Xeril c'u apan xukuje' ri aj quenitab, xuya' c'ut u bixic we c'ulmatajic ri': “Ri ix rija'lil ri Cain: pune' co e c'o ri to'bal iwib, pune' i cojom ri i soc chquixo'l ri nimalaj tak abaj, we socaj ri' cäsachisax na u wäch rumal ri k'ak' aretak queyut bic rumal ri Asiriy.”

²³ Chwi chi c'ut xuya' u bixic we c'ulmatajic ri': “¡Tok'ob u wäch! ¿Jachin lo ri c'ä c'aslic aretak ri Dios chebubana' we jastak ri'?

²⁴ Quepe jucub pa ri tak'aj re Chipr, caquiyojij c'u na canok ri Asiriy xukuje' c'u ri Jeber.”

²⁵ Chwi' chi c'u wa' ri Balaam xutakej ri u be xtzelej c'u cho rachoch. Ri Balac xukuje' xutakej u be.