Ajilanic 20 - Quiché Bible

Ri ja' ri xel ulok chupam ri nimalaj abaj

¹ Pa ri nabe ic' re ri junab, ri aj israelib xebopan pa ri chaki'j uwo sak re Zin, naj c'u xebeytaj na pa Cades. Chila' xcäm wi ri Mariy, chila' c'u xmuk wi.

² Rumal c'u rech chi man c'o ta qui ja', ri winak, conojel xquimulij quib che u c'ulelaxic ri Moises xukuje' ri Aaron,

³ xquibij che ri Moises: “¡C'o ta banom wi xujcäm ta junam cuc' ri niq'uiaj aj israelib chic ri xuban ri Ajawaxel chi xecämic!

⁴ ¿Jasche xic'am ulok ri u tinimit ri Ajawaxel chupam we chaki'j uwo sak ri'? ¿La are ta lo quiwaj chi cujcäm ta uj xukuje' tak ri kawaj?

⁵ ¿Jasche xujiwesaj ulok pa Ejipt xujic'am c'u ulok chupam we c'olbal ri' ri xibibal? ¡Waral man cuya' taj c'o ta catiquic; man e c'o ta qui che'al higo, mawi qui c'amal tak uva, mawi tak crabaj; mawi ta ne ja' ri cakuq'uiaj taj!”

⁶ Ri Moises xukuje' ri Aaron xenajtin che ri tinimit xebe chuchi' ri oquibal chupam ri Lic'om Rachoch Dios re rikoj ib, chila' c'u xquimej wi quib c'ä xquiya' na ri qui palaj cho ri ulew. Are c'u ri u juluwem ri Ajawaxel xuc'ut rib chquiwäch,

⁷ xubij c'ut ri Ajawaxel che ri Moises:

⁸ “Chac'ama' ri ch'amiy, ruc' c'ut ri u to'banic ri Aaron ri awachalal, chebamulij ri winak. Aninak, chquiwäch conojel, chataka' ri nimalaj abaj chi chuya' i ja', cawil c'u na chi che ri nimalaj abaj capichc'on wi na ulok ri ja', rech cacuq'uiaj ri winak xukuje' tak ri cawaj.”

⁹ Ri Moises xuc'am ri ch'amiy ri c'o chuwäch ri Ajawaxel, je jas ri takanic ri xya' che rumal;

¹⁰ ri Moises rachil ri Aaron xequimulix taj ri winak chuwäch ri nimalaj abaj, xubij c'u ri Moises chque: “Chixtabenok, ri man ch'abexic ta quiwaj: ¿La cäkesaj ta na lo ja' chupam we nimalaj abaj ri' che u ya'ic chiwe ri qui wuq'uiaj?”

¹¹ Cätajin cubij wa', ri Moises xuwalijisaj ri u k'ab camul c'ut xuk'osij ri ch'amiy che ri nimalaj abaj xtixtob c'u ulok ri ja'. Jeri' ri winak xukuje' tak ri awaj xeboc che uq'uianic.

¹² Are' c'u ri Ajawaxel xubij che ri Moises xukuje' che ri Aaron: “Rumal c'u rech chi man xijiquiba' ta i c'u'x chwij mawi xiya' ta nu k'ij chquiwäch ri aj israelib, man quixoc ta na cuc' tak we winak ri' chupam ri ulew ri nu yo'm chque.”

¹³ Are bulbux ja' wa' re ch'ach'atem, jawije' ri xech'ach'at wi ri aj israelib chrij ri Ajawaxel ri are' c'ut xuc'ut ri u tastajic chquiwäch.

Ri Edom man cuya' ta be che ri Israel

¹⁴ Kas pa Cades, ri Moises xebutak bic jujun tako'n che ri ajawinel re Edom, che u bixic che: “Ri e awachalal aj israelib caquitak u bixic chawe: ‘At kas awetamam tak ri e u q'ueyowal tak ri uj oc'owinak wi.

¹⁵ Ri e ka mam xebe pa Ejipt sibalaj c'u naj xebeytaj chila', e are' c'ut ri aj ejiptib xquiban c'ax chke uj, xukuje' chque ri e ka mam;

¹⁶ xkata' c'ut to'banic che ri Ajawaxel, ri are' xutatabej c'ut ri ka rakoj tak chi'aj xutak c'ut jun tako'n ri xujresaj ulok pa Ejipt. Uj c'o c'u camic chupam ri tinimit re Cades, uj c'o c'ut chunakaj ri u c'ulbatil ri awulew.

¹⁷ Cäkatz'onoj chawe chi chaya' c'olbal chke chi cujoc'ow chupam ri awulew. Man cujoc'ow ta paquiwi' tak ri e a tico'n mawi paquiwi' tak ri e a uva, mawi quekakumuj ri ja' ri c'o chquipam tak ri e a c'ua'. Are' cäkatakej na ri nim be, man c'u cujel ta na chupam c'ä cujoc'ow na chupam ri awulew.’ ”

¹⁸ Are c'u ri ajawinel re Edom xutzelej u bixic chque: “¡Man quixoc'ow ta chupam ri wulew, we c'u man quibano jas ri quinbij chiwe quinel na bic che i c'ulaxic e wachil ri wajch'ojab!”

¹⁹ Ri aj israelib xquibij ri u cholajil che: “Are cakatakej na ri nim be, we c'u ne ri uj o ri e kawaj quekatija' ta kech ri ja' ri e c'o chupam ri i c'ua' cakatoj na pa a k'ab. Xuwi c'u ri cäkaj chi cujbinic cojoc'ow chupam ri awulew.”

²⁰ Are' c'u ri ajawinel re Edom xutzelej u bixic chque: “¡Man c'u quixoc'ow ta na!” Xel c'u ulok che qui c'ulaxic ri aj israelib achilatal rumal jumulaj cowilaj tak ajch'ojab ri e cuc'am utzalaj tak qui ch'ojibal,

²¹ xquicoj c'u qui chuk'ab che qui k'atixic rech man queboc'ow ta chupam ri culew. E are' c'ut ri aj israelib xquitzucuj chic jun qui be.

Ri u cämical ri Aaron

²² Ronojel ri tinimit Israel xel bic pa Cades xbe che u suq'uil ri juyub Hor.

²³ Chila' chunakaj ri u c'ulbatil ri Edom, ri Ajawaxel xubij che ri Moises xukuje' che ri Aaron:

²⁴ “Ri Aaron quecämok, man coc ta c'u na chupam ri ulew ri nu yo'm chque ri aj israelib, chunakaj c'ut ri bulbux ja' re ch'ach'atem ri ix man xebinimaj ta ri e nu takanic.

²⁵ At, Moises, chac'ama' bic ri Aaron xukuje' ri Eleazar (ri u c'ojol) puwi' ri juyub Hor;

²⁶ chila' cawesaj wi na ri atz'iak re ri cojol tabal tok'ob chrij ri Aaron cacoj c'u na chrij ri Eleazar. Ri Aaron cäcäm na chila'.”

²⁷ Ri Moises xubano jachique ri takanic ri xuya' ri Ajawaxel che. Chquiwäch conojel ri aj israelib, xepaki' puwi' ri juyub Hor,

²⁸ ri Moises chla' c'u xeresaj wi ri ratz'iak ri Aaron xucoj c'u chrij ri Eleazar. Kas chila' puwi' ri juyub, xcäm wi ri Aaron; ri Moises rachil ri Eleazar xekaj ulok puwi' ri juyub.

²⁹ Aretak xoc pa qui jolom ri aj israelib chi xcäm ri Aaron juwinak lajuj k'ij xcok'ej.