Ajilanic 2 - Quiché Bible

Qui cholajil ri kajebal

¹ Ri Ajawaxel xutzijobej ri Moises rachil ri Aaron, xubij c'u chque:

² “Ri aj israelib rajawaxic naj jubik' quebekaj wi chrij ri Lic'om Rachoch Dios re rikoj ib, chquijujunal chquixe' ri kas quetal xukuje' ri quec'utuwic e jachin tak.

³ Pa ri u elebal k'ij quekaj wi na ri ajch'ojab ri quebin chuxe' ri retal ri Juda. Ri e rajch'ojab ri ramak' Juda ri are' c'o ri Naason che c'amal qui be (ri u tat ri Naason are' ri Aminadab),

⁴ ri ajilabal c'ut ri xelic e oxc'al cajlajuj mil ruc' wakib sient (74,600) achijab.

⁵ Chquinakaj c'ut ri e are' quekaj wi ri e rajch'ojab ri ramak' ri Isacar, ri are' c'o ri Natanael che c'amal qui be (ri u tat ri Natanael are' ri Zuar),

⁶ ri ajilabal c'ut ri xelic e cawinak cajlajuj mil quiejeb sient (54,400) achijab.

⁷ Xukuje' quekaj ri e rajch'ojab ri ramak' ri Zabulon cuc' ri c'o ri Eliab che c'amal qui be (ri u tat ri Eliab are' ri Helon),

⁸ ri ajilabal c'ut ri xelic e cawinak wuklajuj mil ruc' quiejeb sient (57,400) achijab.

⁹ Jeri' ri achijab ri e c'o chuxe' ri u takanic ri Juda e ox k'at ajch'ojab, ri c'o jun cajilabal chnimalaj conojel re jun sient jumuch' wakib mil ruc' quiejeb sient (186,400) achijab, ri quenabej na chquiwäch ri aj israelib.

¹⁰ Pa ri u mox elebal k'ij quekaj wi na ri ajch'ojab ri quebin chuxe' ri retal ri Ruben. Ri e rajch'ojab ri ramak' ri Ruben ri c'o ri Elisur che c'amal qui be (ri u tat ri Elisur are' ri Sedeur),

¹¹ ri ajilabal c'ut ri xelic e cawinak wakib mil ruc' job sient (46,500) achijab.

¹² Chquinakaj c'ut ri e are' quekaj wi na ri rajch'ojab ri ramak' ri Simeon, ri c'o ri Selumiel che c'amal qui be (ri u tat ri Selumiel are' ri Zurisaday),

¹³ ri ajilabal c'ut ri xelic e cawinak belejlajuj mil ruc' oxib sient (59,300) achijab.

¹⁴ Xukuje' quekaj na cuc' ri e rajch'ojab ri ramak' ri Gad, ri c'o ri Eliasap che c'amal qui be (ri u tat ri Eliasap are' ri Reuel),

¹⁵ ri ajilabal c'ut ri xelic e cawinak job mil ruc' wakib sient cawinak lajuj (45,650) achijab.

¹⁶ Je c'u ri' ri achijab ri e c'o chuxe' ri u takanic ri Ruben e ox k'at ajch'ojab, ri c'o jun cajilabal chnimalaj conojel re jun sient cawinak julajuj mil ruc' quiejeb sient cawinak lajuj (151,450) achijab, ri quetaken na pa ri ucab c'olbal.

¹⁷ Ri aj levitib e are' ri quetaken na quecanaj c'u chquixo'l ri caj k'at kajebal, cacuc'aj c'u bic ri Lic'om Rachoch Dios re ri rikoj ib. Ri cajk'at mulaj caquitakela' na quib, pa ri qui cholajil ri qui kajic chuxe' c'ut ri kas quetal.

¹⁸ Pa ri u kajebal k'ij quekaj wi na ri ajch'ojab ri quebin chuxe' ri retal ri Eprain. Ri e rajch'ojab ri ramak' ri Eprain are' c'amal qui be ri Elisam (ri u tat ri Elisam are' ri Amihud),

¹⁹ ri ajilabal c'ut ri xelic e cawinak mil ruc' job sient (40,500) achijab.

²⁰ Chquinakaj c'ut ri e are' quec'oji' wi na ri e rajch'ojab ri ramak' ri Manases, ri c'o ri Gamaliel che c'amal qui be (ri u tat ri Gamaliel are' ri Pedasur),

²¹ ri ajilabal c'ut ri xelic e juwinak cablajuj mil ruc' quieb sient (32,200) achijab.

²² Xukuje' quekaj na cuc' ri e are' ri e rajch'ojab ri ramak' ri Benjamin, ri c'o ri Abidan che c'amal qui be (ri u tat ri Abidan are' ri Jedeoniy),

²³ ri ajilabal c'ut ri xelic e juwinak olajuj mil ruc' quiejeb sient (35,400) achijab.

²⁴ Je c'u ri' ri achijab ri e c'o chuxe' ri u takanic ri Eprain e ox k'at ajch'ojab, chnimalaj c'u conojel e jun sient wajxakib mil ruc' jun sient (108,100) achijab, ri quetaken na pa ri urox c'olbal.

²⁵ Pa ri riquiak'ab ri elebal k'ij quekaj wi na ri ajch'ojab ri quebin chuxe' ri retal ri Dan. Ri e rajch'ojab ri ramak' ri Dan c'o ri Ahiezer che c'amal qui be (ri u tat ri Ahiezer are' ri Amisaday),

²⁶ ri ajilabal c'ut ri xelic e oxc'al quieb mil ruc' wukub sient (62,700) achijab.

²⁷ Chquinakaj ri e are' quekaj wi ri rajch'ojab ri ramak' ri Aser, ri c'o ri Pajiel che c'amal qui be (ri u tat ri Pajiel are' ri Ocran),

²⁸ ri ajilabal c'ut ri xelic e cawinak jun mil ruc' job sient (41,500) achijab.

²⁹ Xukuje' quekaj na cuc' e are' ri rajch'ojab ri ramak' ri Neptali, ri c'o ri Ahir che c'amal qui be (ri u tat ri Ahir are' ri Enan),

³⁰ ri ajilabal ri xelic e cawinak oxlajuj mil ruc' quiejeb sient (53,400) achijab.

³¹ Jeri' ri achijab ri e c'o chuxe' ri u takanic ri Dan e ox k'at ajch'ojab ri e jun sient cawinak wuklajuj mil ruc' wakib sient (157,600) achijab chnimalaj conojel, ri quetz'apin qui wi' ri e benak chquij ri quetal.”

³² Ri cajilabal ri jujun tak ja aj israelib ri xelic e wakib sient oxib mil ruc' job sient cawinak lajuj (603,550) achijab.

³³ Je c'ut jacha' ri takanic ri u yo'm ri Ajawaxel che ri Moises, ri aj levitib man xebajilax ta pa ri ajilanic.

³⁴ Ri aj israelib xquiban ronojel jacha' ri takanic ri u yo'm ri Ajawaxel che ri Moises: chquijujunal xekaj chuxe' ri kas quetal xutakej c'ut chrij ri kas rachalaxic xukuje' cuc' ri kas e rachalaxic.