Ajilanic 19 - Quiché Bible

Cholajil che ri josk'inic jas ri nak'atisabal

¹ Ri Ajawaxel xutzijobej ri Moises xukuje' ri Aaron, xubij c'u chque:

² “In, ri Ajawaxel, quinya' we takanic ri': Chabij chque ri aj israelib chi chiquic'ama' ulok chawe jun ati't wacax ri quiäkcoj rismal, ri ma ta c'o jun u yab ri xukuje' mawi jumul cojom ta eka'bal chrij u wi'.

³ Ri ix quijach na pa u k'ab ri cojol tabal tok'ob Eleazar, are c'u ri are' cäresaj na bic chrij ri kajebal cuya' c'u na takanic chi cäpil chuwäch.

⁴ Ri cojol tabal tok'ob Elea cuc'am na ruc' ri u wi' u k'ab jubik' quic', cuchicoj c'u na ruc' ri u wi' u k'ab wukub mul che ri u suq'uil ri Lic'om Rachoch Dios re rikoj ib.

⁵ Cäporoxtax c'ut ri ati't wacax chuwäch, caporox c'u xukuje' ri tz'um, ri ti'j, ri quic' xukuje' ri mes.

⁶ Ri cojol tabal tok'ob cuc'am che' re chacalte', jun alaj u k'ab k'ayes re hisop xukuje' quiäk quem, cuq'uiak c'u ronojel chupam ri k'ak' ri caporox wi ri ati't wacax;

⁷ cuch'aj c'u ri ratz'iak cuch'aj c'u rib xukuje' ruc' ja', c'äte ri' cuya' coc chupam ri kajebal, pune' c'u cäcanaj tz'il c'ä benak k'ij jas ri nak'atisabal.

⁸ Are' xukuje' c'u ri achi ri xporon ri ati't wacax, cuch'aj ri ratz'iak cuch'aj c'u rib xukuje' ruc' ja', cacanaj c'u na tz'il c'ä benak k'ij jas ri nak'atisabal.

⁹ Jun achi chic, ri ch'ajch'oj jas ri nak'atisabal, cujoc ri u chajil ri ati't wacax cuya' c'u pa jun c'olbal ch'ajch'oj chrij ri kajebal. We chaj ri' cajwataj na che ri tinimit Israel che u suc'umaxic ri ja' re ri ch'ajch'ojirisanic. Ronojel wa' jun tabal tok'ob u mac rech ri macaj.

¹⁰ Ri xjocow ri chaj, cuch'aj na ri ratz'iak, cacanaj c'u na can tz'il c'ä benak k'ij jas ri nak'atisabal. Jun pixab wa' ri man cayubquentaj, ri cäjeki' amak'el iwuc' ix ri sibalaj c'o u patan chiwe ix xukuje' chque ri aj israelib jacha' chque ri man e i winakil ta ri e jekel chixo'l.

¹¹ Ri cänakow apachique winak ri cäminak cacanoj tz'il wukub k'ij.

¹² Churox k'ij xukuje' chuwuk k'ij rajawaxic cuch'ajch'ojirisaj rib ruc' ri ja' re ch'ajch'ojirisabal cäcano c'u na can ch'ajch'oj.

¹³ We c'o jachin jun cuchap jun winak cäminak man c'u cuch'ajch'ojirisaj ta rib, cärawasij ri u k'ijilabal ri Ajawaxel, rumal c'u ri', rajawaxic quesax chquixo'l ri aj israelib. Man c'u chicom ta ruc' ri ja' re ch'ajch'ojirisanic, cäriktajic chi c'o pa ri tz'ilol.

¹⁴ Ri cac'ulmatajic aretak c'o jachin cäcäm chupam jun cäbal ri lic'om, e are tak wa': conojel ri queriktaj chupam ri cäbal xukuje' conojel ri queboc chupam, quecanaj tz'il wukub k'ij.

¹⁵ Conojel ri bo'j ri tek'etoj qui wi', o ri man kas ta utz qui tz'apixic banom, xukuje' quecanaj tz'il.

¹⁶ Pa apachique c'olbal, apachin ta ne ri cuchap jun cäminak winak ri xa xcämisaxic o xak xcämic, o e u bakil cäminak, o ri mukutal wi cäminak, cäcanaj wukub k'ij tz'il.

¹⁷ Aretak e c'o we tz'ilol ri', cac'am jubik' ri u chajil ri ati't wacax ri cäpil u mac rech ri macaj, cäya' c'u chupam jun lak rech cäya' sakalaj ja' puwi'.

¹⁸ Jun achi c'ut ri ch'ajch'oj, cuc'am na jun alaj u k'ab k'ayes re hisop, curub na chupam ri ja' cuchicoj c'u na puwi' ri cäbal ri lic'om paquiwi' ri jastak xukuje' paquiwi' ri winak ri e c'o chila', xukuje' ri xebuchap ri bak o ri winak ri xcämisaxic o xak xcämic, o ri mukutal wi cäminak.

¹⁹ Ri achi ri josk'im jas ri nak'atisabal are' chchicom ri tz'ilotajinak pa tak ri urox k'ij xukuje' pa ri uwuk. Pa ri uwuk k'ij u ch'ajch'ojisam chic. Are c'u ri winak ri tz'il canok cuch'aj ri ratz'iak xukuje' cuch'aj na rib ruc' ja', cäcanaj c'u na can tz'il c'ä benak k'ij.

²⁰ We jun winak ri kas tz'ilobinak ri man cujosk'ij ta rib rajawaxic quesax chuxo'l ri u tinimit, cärawasij c'ut ri u k'ijilabal ri Ajawaxel. Man chicom ta c'ut ruc' ri ja' re josk'ibal ib, u takem jekelem chupam ri tz'ilol.

²¹ Are jun pixab wa' ri man cayubquen taj. Jachin ri cuchicoj jun chic ruc' ri ja' re ch'ajch'ojirisanic, rajawaxic cuch'aj ri ratz'iak. Ri cächapow ri ja' re ri ch'ajch'ojirisanic, cacanoj can tz'il c'ä benak k'ij.

²² Ronojel ri cächap rumal jun winak tz'il, cäcanaj can tz'il; jachin c'ut ri cächapow jun winak tz'il, xukuje' cäcanaj can tz'il c'ä benak k'ij.”