Ajilanic 18 - Quiché Bible

Patanijic ri nimak qui k'ij ri caquiban ri e cojol tabal tok'ob xukuje' ri aj levitib

¹ Ri Ajawaxel xubij che ri Aaron: “At xukuje' ri e a c'ojol, junam cuc' ri niq'uiaj chi e u tz'akatil ri ramak' ri Levi, ri c'o catux chque, ix quixeklen tak na ri sachinakil ri queban che ri k'ijilabal; xuwi c'u ri at xukuje' ri e a c'ojol quixeklen tak na ri sachinakil ri quebiban ix chquipam tak ri e i patanijic aretak quebicoj ri tabal tok'ob.

² Rajawaxic cabano chi ri niq'uiaj e u tz'akatil chic ri ramak' ri Levi, ri c'o catux chque, chatquito' ri at xukuje' ri e a c'ojol che u banic ri patanijic chuwäch ri Lic'om Rachoch Dios re ri c'ulwächinic.

³ Ri e are' e c'o che ri a patanixic xukuje' che u patanixic ri Lic'om Rachoch Dios, man c'u quenakajin ta chque tak ri chaconisan rech ri k'ijilabal mawi che ri porobal; we c'u man je caquibano, quecäm na ri e are' xukuje' c'u ri ix.

⁴ Rajawaxic catcachilaj che ri patanijic chupam ri Lic'om Rachoch Dios re rikoj ib xukuje' conojel ri patanijic ri cachil tak quib. Man c'o ta c'u jun apachique winak cäkeb ta iwuc';

⁵ ix ri' ri ix ajekomal che ri u patanixic ri k'ijilabal xukuje' ri porobal. Jeri' man cäpe ta chi na woyowal cuc' ri aj israelib.

⁶ In xebentas ri e awachalal ri aj levitib chquixo'l ri niq'uiaj chi aj israelib che qui ya'ic chiwe, rech quepatanij che qui banic tak ri patan ri queban chupam ri Lic'om Rachoch Dios re rikoj ib;

⁷ xak xuwi c'u ri at xukuje' tak ri e a c'ojol cuya' cäquiban ri chac re ri u cojic ri tabal tok'ob jas ri rajawaxic u banic puwi' ri porobal o ri queban chrij ri ch'ukubal. We patanijic ri' rajawaxic are wa' ri rajawaxic u banic iwumal, in c'ut in jachowinak ri chac pa i k'ab re ri u cojic ri tabal tok'ob we c'o jachin jun capatanijic jacha' cojol tabal tok'ob, ri man cojol tabal tok'ob taj, cac'okox na che cämical.”

Ri tzukbal quib ri e cojol tabal tok'ob aj levitib

⁸ Ri Ajawaxel xubij che ri Aaron: “Ri sipanic ri queban tak chwe in e nu jachom pa a k'ab. Conojel ri tastalic tak sipanic ri quequiban ri aj israelib chwe, quebenya' chawe xukuje' chque tak ri a c'ojol e are tak c'u wa' ri e ya'tal chiwe; jun nak'atisabal wa' re amak'el.

⁹ Chque ri tabal tok'ob ri queporoxic, quecanaj conojel tak ri sipanic quech c'äj chawe, xukuje' ri tabal tok'ob ri rumal macunic o rumal chak'maquil quequichi'j ri aj israelib chwe; conojel we tastalicalaj tak sipanic ri' quecanaj chawe xukuje' chque ri e a c'ojol.

¹⁰ Ronojel achi ri c'o chixo'l cuya' cutij rech chque tak we sipanic ri' pa jun tastalicalaj c'olbal, e tastalic c'ut.

¹¹ Quebenya' c'u chawe xukuje' chque tak ri a c'ojol ri a mia'l ri c'ä e c'o pa ri awachoch, ri sipanic tak ri nimak qui k'ij ri quequic'am ulok ri aj israelib chwe. Jun pixab wa' ri cäjeki' canok amak'el. Apachique winak re ri aj u pa wachoch ri u ch'ajch'ojirisam rib, cuya' quebutijo.

¹² Xukuje' quebenya' ri nabe tak wächinic ri quequic'am ulok ri aj israelib chwe chujunab: ri aseit ri utz na ri u wa'l uva, xukuje' ri re ri trico.

¹³ Junam xukuje' ri nabe tak wächinic ri cuya' ri ulew ri quequichi'j chwe, quecanaj chawe. Apachique winak re ri aj u pa wachoch ri u ch'ajch'ojirisam rib cuya' quebutijo.

¹⁴ Ronojel sipanic ri quequitas ri aj israelib chwe, quecanaj chawe.

¹⁵ Conojel ri nabeal tak qui c'ojol ri aj israelib o ri nabe tak cal ri awaj, ri chiquichi'j chwe, quebux awech. E are' tak c'ut ri e qui nabeal ri winak xukuje' ri nabe tak cal ri awaj ri e tz'il, catz'onoj jun torobal che qui q'uexwäch.

¹⁶ Ri torobal rajawaxic cätojic jun ic' bantajinak chic ri alanic, job rakan sak puak cätojic je jas ri puak ri cäcoj chupam ri k'ijilabal, ri capajan niq'uiaj onz.

¹⁷ Man caya' ta c'u c'olbal chi quetor ri nabe tak cal ri ati'tab tak wacax, ri e chij tak o q'uisic' tak. Wa' e tastal chwe in, rajawaxic c'ut quebapil na; ri u quiq'uel cajamij na puwi' ri porobal, ri u xepoyil caporoj na jacha' che sipanic ri cac'oc'at ruxlab chwe.

¹⁸ At cuya' catcanaj ruc' ri ti'j, junam xukuje' ri uwo u c'u'x ri awaj, ri are sipanic ri nim u banic, xukuje' ruc' ri uwo rachak aj iquiak'ab.

¹⁹ Ronojel ri cuchuj ri quequitas ri aj israelib chwe, quebenya' chawe, xukuje' chque ri e a c'ojol ri e a mia'l ri c'ä e c'o pa ri awachoch. Jun pixab wa' ri cäjeki' canok amak'el. Jun c'ulwächinic ri man c'o ta u q'uextajic, junalic, ri quinban awuc' xukuje' cuc' tak ri e awija'lil.”

²⁰ Ri Ajawaxel xubij che ri Aaron: “At man cac'oji' ta awulew mawi tak e wechbal pa Israel, jacha' ri niq'uiaj aj israelib chic. In ri in awechbal xukuje' quinux awech pa Israel.

²¹ Chque ri aj levitib quinya' wi jacha' che quechbal ri lajujil ri rajawaxic caquic'am ulok ri aj israelib ri caquesaj che ri qui ch'äcoj, che u tojic ri patanijic ri caquiban pa ri Lic'om Rachoch Dios re rikoj ib.

²² Ri niq'uiaj aj israelib chic man ya'tal ta chque chi quenakajin ta che ri Lic'om Rachoch Dios re rikoj ib, caquiban c'u na jun macaj ri' ri cuc'am na ulok ri cämical paquiwi'.

²³ Ri aj levitib xak xuwi ri e are' ri quepatanij na chupam ri Lic'om Rachoch Dios re rikoj ib, e are' c'u quekajaben na ri etzelal ri chequibana'. Are jun pixab wa' ri cajeki' na canok. Ri caquiban ri tataxelab xukuje' ri c'ojolaxelab. Ri aj levitib man cac'oji' ta kas culew pa Israel.

²⁴ Chque e are' e nu yo'm che quechbal ri jun lajujil ri rajawaxic quequichi'j ri aj israelib chwe ri caquesaj che ri u wächinic ri culew. Rumal ri' nu bim chque chi kas man c'o ta culew cac'oji' pa Israel.”

²⁵ Ri Ajawaxel xutzijobej ri Moises xubij c'u che:

²⁶ “Chabij chque ri aj levitib chi aretak chequic'am chque ri aj israelib ri u lajujil ri quesan che ri u wächinic ri culew ri e nu yo'm chque che quechbal, rajawaxic cäquesaj jun lajujil che u chi'xic chwe in.

²⁷ Are wa' ri qui cuchuj, junam ruc' ri cuchuj ri caquiban ri aj israelib aretak caquiya' jubik' re ri qui trico xukuje' ri re ri u wa'l qui uva.

²⁸ Jeri', che we lajujil ri' ri quequiya' ri aj israelib chque, ri aj levitib caquitas ri qui cuchuj ri caquiya' che ri Ajawaxel caquiya' c'u na che ri cojol tabal tok'ob Aaron.

²⁹ Che ronojel ri chya' chiwe, rajawaxic quitas jubik' jacha' che cuchuj chwe in; are c'u ri quitas chwe rajawaxic are' ri utz na.

³⁰ Xukuje' chabij chque: ‘Aretak c'ut tastajinak chic iwumal ri quiya' na chwe, ri niq'uiaj chic cuya' qui chomaj chi jacha' i trico xukuje' u wa'l i uva,

³¹ cuya' c'ut quitijo ix xukuje' ri e iwachalal pa apachique c'olbal. Are ri tojbal iwech wa' che ri patanijic ri quiban chupam ri Lic'om Rachoch Dios re rikoj ib.

³² Aretak c'ut tastajinak chic iwumal ri utz na ri quiya' na chwe, cuya' qui tij ri niq'uiaj chic man c'o ta mac qui kajbej; we je qui ban wa' man quebiwawasij ta ri e qui sipanic tak ri aj israelib, man c'u quixc'okox ta che cämical.’ ”