Ajilanic 17 - Quiché Bible

Ri u ch'amiy ri Aaron cätuxic

¹ Ri Ajawaxel xutzijobej ri Moises xubij c'u che:

² “Chaya' takanic chque ri aj israelib chi chquijujunal ri c'amal tak be re amak' chequic'ama' ulok jun ch'amiy, o cablajuj ch'amiy chi conojel. At catz'ibaj ri qui bi' chquijujunal che ri qui ch'amiy,

³ che ri ch'amiy ri rech ri ramak' ri Levi catz'ibaj wi ri u bi' ri Aaron, rajawaxic c'o jun ch'amiy che jun c'amal be re amak'.

⁴ Quebaya' chupam ri Lic'om Rachoch Dios re rikoj ib, chuwäch ri caxa re ri c'ulwächinic, chila' c'ut ri quinrik wi wib iwuc'.

⁵ Quinbana' chi cätux ri u ch'amiy ri nu cha'om, je c'u ri' ri aj israelib man cäquitakej ta chi na i yok'ic chnuwäch in.”

⁶ Ri Moises xubij wa' ri xbix che chque ri aj israelib, chquijujunal c'ut ri c'amal tak be re amak' xquijach jun ch'amiy che, xemulitaj c'u cablajuj ch'amiy chi conojel. Chquixo'l wa' c'o xukuje' ri u ch'amiy ri Aaron.

⁷ Ri Moises xebucholajij ri ch'amiy chuwäch ri Ajawaxel chupam ri Lic'om Rachoch Dios re ri c'ulwächinic,

⁸ chucab c'u k'ij, aretak xbe pa ri Lic'om Rachoch Dios, xrilo chi ri u ch'amiy ri Aaron, ri rech ri ramak' ri Levi, tuxirinak: e q'uiyinak tak ri u tux, cotz'ijaninak, e c'o c'u tak almendr chuwäch ri e chak'.

⁹ Are c'u ri Moises xeresaj ulok conojel ri ch'amiy chuwäch ri Ajawaxel xuc'ut c'u chquiwäch ri aj israelib, aretak e qui nic'om chic, chquijujunal xequimajila' ri qui ch'amiy.

¹⁰ Xubij c'ut ri Ajawaxel che ri Moises: “Chatzelej ri u ch'amiy ri Aaron chuwäch ri caxa rech ri c'ulwächinic, chac'olo' c'u chi' jacha' che jun c'utbal che we tinimit ri' ri man cacaj ta ch'abexic. Jeri' caban na chi caquitanaba' na nu yok'ic chawäch, man c'u quecäm ta na.”

¹¹ Ri Moises ronojel xubano je jacha' ri xtak wi rumal ri Ajawaxel,

¹² e are' c'u ri aj israelib xquibij che ri Moises: “¡Uj c'o chupam sachinakil! ¡Konojel cujecämok!

¹³ Conojel ri quenakajin che ri u k'ijilabal ri Ajawaxel quecämic. ¿La cujecäm ta na lo konojel?”