Ajilanic 16 - Quiché Bible

Ri u walijisaxic rib ri Core xukuje' ri u c'äjisaxic u wäch

¹ Jun aj levi rija'lil ri Coat, ri Core u bi' (ri u tat ri Core are' ri Izar), e rachil oxib achijab chic e aj ramak' ri Ruben, ri qui bi' Datan xukuje' Abiram (ri qui tat ri Datan xukuje' ri Abiram are' ri Eliab), xukuje' ri On (ri u tat ri On are' ri Pelet),

² xquiwalijisaj quib chrij Moises. Chque wa' xequitik chi quib quieb sient cawinak lajuj (250) aj israelib, achijab ri e c'o qui tij pa ri tinimit, ri e are' juch'ob cuc' ri e ya'l tak no'j ri utz qui tzijol.

³ Conojel c'ut e are' xquimulij quib, xquic'ulelaj ri Moises rachil ri Aaron, xquibij c'u chque: “¡Chubana' wa' ri nimal ri quixc'amowic! Ronojel ri tinimit tastajinak rumal ri Dios, c'o c'ut ri Ajawaxel kuc' konojel. ¿Jasche qui walijisaj iwib ix jacha' k'atal tzij ri nim u banic puwi' ri u tinimit ri Ajawaxel?”

⁴ Ri Moises, aretak xuta' wa' xumej rib c'ä xuya' na ri u palaj cho ri ulew,

⁵ xubij c'u che ri Core xukuje' chque ri e teren chrij: “Chwek ak'abil ri Ajawaxel cuk'alajisaj na jachin ri rech xukuje' jachin ri u tasom rib che, cacuin c'ut quebujach tak ri sipanic chuwäch. Xuwi cacuinic quebujach tak ri sipanic chuwäch jachin ri cacha' rumal.

⁶ Chibana' ri quinbij chiwe: chebic'ama' ulok ri u bukibal ri Core xukuje' tak ri quech ri e rachil,

⁷ chebiya' rachak k'ak' chquipam xukuje' c'oc' k'ol chebicholoba' c'u chuwäch ri Ajawaxel chwek. Ri achi ri cacha' rumal ri Ajawaxel, are wa' ri tastajinak che. ¡Chubana' wa' chiwe aj levitib!”

⁸ Xubij c'u ri Moises che ri Core: “Chinitatabej aj levitib:

⁹ ¿La xa man nim ta qui wilo chi ri u Dios ri Israel ix u cha'om ix chuxo'l ri tinimit Israel, chi quixc'oji' c'u chunakaj quixpatanij c'u che qui cojic ri tabal tak tok'ob chupam ri u k'ijilabal ri Ajawaxel chibana' c'ut we patanijic ri' che ri tinimit?

¹⁰ Ri Ajawaxel rajwam chi ri at xukuje' ri e niq'uiaj chic e u tz'akatil ri awamak', ri aj levitib quec'oji' chunakaj ri are', ¿La c'ä caquirayij c'ut camic ri u cojic ri tabal tok'ob?

¹¹ Kastzij ri Aaron man c'o ta u banic rech cäban yok'onic chrij; chrij ri Ajawaxel wa' ri at xukuje' ri e awachil qui walijisam wi quib.”

¹² Ri Moises xutak qui siq'uixic ri Datan xukuje' ri Abiram (e u c'ojol ri Eliab), ri e are' xquitzelej ulok u bixic: “Man cäkajtaj cujbec.

¹³ ¿La xa man nim ta cawilo chi xujawesaj ulok chupam jun ulew ri cabelel wi ri leche xukuje' ri juyubal räx cab jacha' ta ne ri ja', rech caban chke chi cujcäm chupam ri chaki'j uwo sak, ri are c'u cawaj catux nimalaj c'amal ka be?

¹⁴ At man uj a c'amom ta bic chupam jun ulew jawije' cabelel ta wi ri leche xukuje' juyubal räx cab jacha' ri ja', mawi e a yo'm ta kulew mawi ticbal tak uva chke. ¿La are c'u cawaj chi conojel caquiya' ta quib quec'am bic e jacha' ta ne moyab? Jayi' man cujbe ta che awilic.”

¹⁵ Sibalaj c'u xoyowar ri Moises xubij c'u che ri Ajawaxel: “¡Mec'amowaj la ri qui sipanic! Ri in man nu tokim ta chque mawi ta ne xa jun bur, mawi c'u ne nu banom ta jun lawaloyil che jun chque.”

¹⁶ Xubij c'u ri Moises che ri Core: “Chixpe ta chwek at xukuje' tak ri e awachil, chuwäch ri Ajawaxel. Ri Aaron xukuje' cac'oji' na chi'.

¹⁷ Chi chquijujunal c'ut chicuc'aj ri qui bukibal chuya' c'u ulok c'oc' k'ol chupam. Ri at xukuje' ri Aaron chiwuc'aj ri i bukibal quebiya' c'u na cuc' ri quieb sient cawinak lajuj, bukibal chuwäch ri Ajawaxel.”

¹⁸ Chquijujunal c'ut xquic'am ri qui bukibal, xquiya' c'u rachak k'ak' chupam xukuje' c'oc' k'ol xquicholajij c'u quib ruc' ri Moises xukuje' ri Aaron, chuwäch ri Lic'om Rachoch Dios re rikoj ib.

¹⁹ Ri Core u mulin chi ronojel ri tinimit chquij chuwäch ri Lic'om Rachoch Dios re rikoj ib. Ri u juluwem ri Ajawaxel xuc'ut c'u rib chuwäch ronojel ri tinimit,

²⁰ are' c'u ri Ajawaxel xubij che ri Moises rachil ri Aaron:

²¹ “¡Chixel chuxo'l we tinimit ri', quebensachisaj c'u u wäch pa jok'otaj!”

²² Are c'u ri e are', xquimej quib xquiya' ri qui palaj c'ä cho ri ulew, je xquibij wa': “Oh Dios, lal ri caya' la ri qui c'aslemal conojel ri winak, ¿la cäpe oyowal la che ronojel ri tinimit u mac rech ri u mac xa jun winak?”

²³ Are c'u ri Ajawaxel xutzelej u bixic che ri Moises:

²⁴ “Chabij chque conojel ri aj israelib chi chquitasa' quib che ri cäbal ri lic'om jawije' e c'o wi ri Core, ri Datan xukuje' ri Abiram.”

²⁵ Ri Moises xwalijic, terenetal cumal ri nimak tak tatayib re Israel, xbe c'ut jawije' ri e c'o wi ri Datan xukuje' ri Abiram.

²⁶ Xubij c'u che ri tinimit: “Chitasa' iwib chque tak ri qui cäbal ri lic'om we itzel tak winak ri', c'o jun jasach minak chque ri jastak quech, mac'ulmataj c'u ne chi xukuje' ri ix quixecäm qui mac ri qui mac e are'.”

²⁷ Ri tinimit xelic xuya' can ri c'olbal ri c'o wi ri Core, ri Datan xukuje' ri Abiram. Ri Datan xukuje' ri Abiram e c'o chuchi' ri qui cäbal ri lic'om, e cachil ri quixokil xukuje' tak ri calc'ual.

²⁸ Ri Moises xutakej u bixic: “Ruc' wa' quinc'ut chiwäch chi are' ri Ajawaxel Dios ri in takowinak che qui banic we jastak tak ri', chi man xak ta c'u pa we wi quebenbano.

²⁹ We, c'u we winak ri' quebe e cämok jacha' ri qui camic conojel ri achijab, xa man in takom ta ri' rumal ri Ajawaxel;

³⁰ we c'u ri Ajawaxel cuban jun jasach ri mawi jumul ilom, cujak ta c'u rib ri ulew e c'asal ta c'ut quebubik' bic ruc' ronojel ri c'o cuc', e c'asal c'ut quekaj chupam ri ulew, qui wetamaj c'u na ix chi e are wa' ri achijab ri quetzelam u wäch ri Ajawaxel.”

³¹ Xuwi c'u xutanaba' tzijonem ri Moises, ri ulew xujak rib chquixe'

³² xebubik' c'u bic conojel ri achijab ri qui junam quib ruc' ri Core, junam cuc' ri calc'ual xukuje' ronojel ri c'o cuc'.

³³ E c'aslic xetzak bic chupam ri ulew, cuc' conojel tak ri jastak quech, xutz'apij c'u rib ri ulew. Je u sachisaxic qui wäch wa' xban chquixo'l ri aj israelib.

³⁴ Aretak xetatajic chi caquirak qui chi', conojel ri aj israelib ri xeriktaj chquinakaj xexiq'uinic xebanimajic je xquibij wa': “¡Mujubik' ne bic ri ulew uj xukuje'!”

³⁵ Xutak c'u ne bic xukuje' ri Ajawaxel jun k'ak' ri xebucämisaj ri quieb sient cawinak lajuj achijab ri qui chi'm c'oc' k'ol.

³⁶ Ri Ajawaxel xutzijobej ri Moises xubij c'u che:

³⁷ “Chataka' ri Eleazar (u c'ojol ri Aaron) chi cheresaj ri bukibal chquixo'l ri jastak ri xec'atic, naj c'u chebuq'uika' wi ri rachak k'ak' ri c'ä e c'o tak chquipam.

³⁸ Ri e qui bukibal tak we achijab ri e cäminak rumal rech ri mac ri qui banom, e tastajinak canok rumal rech chi xecoj che u ya'ic c'oc' k'ol chnuwäch. Chibana' ba' ripirak tak ch'ich' che we ch'ich' ri', che u ch'ukic rij ri porobal, c'utbal c'u wa' ri chcanaj chque ri aj israelib.”

³⁹ Ri cojol tabal tok'ob Elea xebumulij tak ri bukibal re k'an ch'ich' ri xequic'am ulok ri achijab ri xecäm chupam ri c'atic, xuya' takanic chi cheban liq'uilak tak ch'ich' chque che u camulixic u ch'ukic rij ri porobal.

⁴⁰ Jun c'utbal wa' chque ri aj israelib chi man c'o ta jun, ri ma ta e are' ri e rija'lil ri Aaron, cuya' cakeb ta ruc' ri porobal che u chi'xic c'oc' k'ol che ri Ajawaxel; we c'u man jewa' cubano, je cuc'ulmaj na jas ri xuc'ulmaj ri Core xukuje' tak ri xerachilaj. Ronojel c'ut xbanic je jas ri takanic ri xuya' ri Ajawaxel che ri Eleazar rumal ri Moises.

⁴¹ Chucab c'u k'ij, ronojel ri tinimit xuchaplej u yok'ic ri Moises xukuje' ri Aaron je c'u xquibij wa': “¡Ix cätajin qui cämisaj ri u tinimit ri Ajawaxel Dios!”

⁴² Conojel c'ut caquimululej quib chrij ri Moises xukuje' ri Aaron; e are c'ut ri e are' xquiya' ri qui wäch che ri Lic'om Rachoch Dios re rikoj ib. Pa ri jok'otaj ri' ri sutz' xuch'uku xuc'ut c'u rib ri u juluwem ri Ajawaxel.

⁴³ Are' c'ut ri Moises rachil ri Aaron xebec'ol chuwäch ri Lic'om Rachoch Dios re rikoj ib,

⁴⁴ are' c'u ri Ajawaxel xubij che ri Moises:

⁴⁵ “¡Chixel chquixo'l we winak ri', xa c'u pa jok'otaj quinsachisaj na qui wäch!” Ri Moises xukuje' ri Aaron xquimej quib c'ä xquiya' na ri qui palaj cho ri ulew,

⁴⁶ xubij c'ut ri Moises che ri Aaron: “Chac'ama' ulok ri a bukibal, chaya' ri rachak k'ak' chupam ri c'o puwi' ri porobal chaya' c'u c'oc' k'ol chupam; jät c'u chanim jawije' c'o wi ri tinimit chatz'onoj c'u sachbal macaj che ri Dios paquiwi', nicowinak c'ut ri royowal ri Ajawaxel, ri cämisanel yabil chaptajinak.”

⁴⁷ Ri Aaron xubano jachique ri xubij ri Moises che caxiq'uin c'ut xbec jawije' ri u mulin wi rib ri tinimit. Ri cämisanel yabil ri xtak ulok rumal ri Dios cätajin quebucämisaj chic ri winak. Ri Aaron xucoj k'ol xutz'onoj c'u sachbal u mac ri tinimit.

⁴⁸ Xuya' c'u rib chquixo'l ri e cäminak chic cuc' ri c'ä e c'aslic, xk'ilk'ob c'u ri cämisanelalaj yabil,

⁴⁹ e cäminak chi c'ut cajlajuj mil ruc' wukub sient (14,700) winak, man xeboc ta c'u pa ajilabal ri e cäminak nabe, aretak xuwalijisaj rib ri Core.

⁵⁰ Aretak xk'ilk'ob ri cämisanelalaj yabil, ri Aaron xtzelej chi' ri Lic'om Rachoch Dios re rikoj ib che u rikic rib ruc' ri Moises.