Ajilanic 15 - Quiché Bible

Pixab chque ri tabal tak tok'ob

¹ Ri Ajawaxel xutzijobej ri Moises xubij c'u che:

² “Chabij chque ri aj israelib ri quinbij chawe: Aretak chixoc ri ix chupam ri ulew ri quenya' chiwe rech quixjeki' chupam,

³ qui chi'j c'u jun ama' wacax o jun chij che u poroxic che u ya'ic nu k'ij jacha' che tabal tok'ob o tabal tok'ob ri cachajirisaxic ri sibalaj cäc'oc'atic, we che u tz'akatisaxic jun chi'nic o jacha' sipanic ri pa ech wi, o rumal jun nimak'ij,

⁴ ri cäc'amow ulok ri sipanic rajawaxic cutik quiejeb libra ruc' niq'uiaj coc'alaj c'äj ri cäyok' jun litro aseit ruc'.

⁵ Xukuje' chque c'u ri tabal a tok'ob ri e yo'm qui bixic rajawaxic cätik jun litro u wa'l uva che jujun alaj ama'ib tak chij.

⁶ We ri tabal tok'ob are jun ama' chij quetik chi na belejeb libra c'äj ri cäyok' jun litro aseit ruc' jubik'.

⁷ Xukuje' jun litro u wa'l uva ruc' jubik', jacha' che sipanic ri sibalaj cäc'oc'at ruxlab chwe in.

⁸ We ri tabal tok'ob are jun c'ojol ama' wacax, che u chi'xic jacha' che tabal tok'ob ri cächajirisaxic o jacha' che tabal tok'ob re utzirisan ib, o che u tz'akatisaxic jun chi'nic,

⁹ quetik na oxlajuj (13) libra c'äj ri cäyok' quieb litro aseit ruc',

¹⁰ xukuje' c'u quieb litro u wa'l uva, jacha' che sipanic porom ri sibalaj cäc'oc'at ruxlab chwe in.

¹¹ Are wa' ri rajawaxic u banic chque jujun ama'ib tak wacax, chque jujun ama'ib tak chij chque jujun alaj mayib tak chij o chque jujun alaj ama'ib tak q'uisic' ri quechi'xic.

¹² Chquijujunal tak ri awaj ri quechi'xic queya' tak ri sipanic ri rajawaxic, je joropa' ri cajilabal ri awaj.

¹³ Ronojel aj Israel rajawaxic quebutz'akatisaj conojel tak we cholajil ri' aretak caquiban jun sipanic ri porom ri cac'oc'at ruxlab.

¹⁴ We c'o jun man i winakil taj, pune' xak oc'owel o kas jekel chixo'l, cäraj c'ut cuya' jun sipanic chnuwäch ri porom ri cac'oc'at ruxlab, rajawaxic quebutz'akatisaj tak ri junam cholajil je jas ri qui ban ix.

¹⁵ Xak junam cholajil cajwataj chiwe ix xukuje' chque ri man e i winakil taj; are jun pixab ri cajeki'c, ri caquiban ri tataxelab xukuje' alc'ualaxelab.

¹⁶ Junam pixab xukuje' junam cholajil c'o chiwe ix xukuje' chque ri man i winakil taj.”

¹⁷ Ri Ajawaxel xutzijobej ri Moises xubij c'u che:

¹⁸ “Chabij chque ri aj israelib ri quinbij chawe: Aretak ix oquinak chic chupam ri ulew jawije' ri quixinc'am wi bic,

¹⁹ qui chaplej c'u u tijic ri trico ri cäwalij chuwäch, rajawaxic quitas jubik' che u chi'xic chwe.

²⁰ Je c'ut jacha' ri u chi'xic ri nabe jubik' re ri trico ri yak'tajinak, jeri' xukuje' quiban ruc' ri nabe k'or ri qui suc'umaj quiban na jun sipanic chwe re wa.

²¹ We sipanic ri' rajawaxic qui ban amak'el.

²² Aretak rumal man nabenic ta ri ix i yo'm can u banic apachique chque ri jastak ri u yo'm u bixic ri Ajawaxel che ri Moises.

²³ Kas pa ri nabe k'ij ri cächaptaj bic, rech ri ix xukuje' ri e iwija'lil quebitz'akatisaj, rajawaxic quiban ri cätakex u bixic:

²⁴ We ri sachinakil man xnabex ta are' c'u banowinak ronojel ri tinimit, ronojel ri tinimit cuchi'j na jun c'ojol ama' wacax chwe jacha' tabal tok'ob ri cachajirisaxic ri cac'oc'at ruxlab, cärachilaj ri rach tak sipanic que c'äj xukuje' ri re u wa'l uva, jacha' ri takanic ri u yo'm ri Dios; qui chi'j chi c'u na jun ama' quisic' chwe jacha' che tabal tok'ob che u josk'ixic ri macaj.

²⁵ Ri cojol ri tabal tok'ob cuban ri nimak'ij ri nak'atisabal che u rikic ri sachbal macaj che utzil che ronojel ri tinimit Israel, quinsach c'u na qui mac are c'u jun macaj ri man xquinabej ta xquibano xquijäch c'ut ri qui sipanic chnuwäch xukuje' ri qui tabal tok'ob che u josk'ixic ri macaj.

²⁶ In quinsach na u mac ronojel ri tinimit Israel xukuje' ri man e i winakil ta ri e jekel chixo'l, we ri u mac ri tinimit man xunabej taj.

²⁷ We ri macaj ri man canabex ta u banic xa jun winak cabanowic cuchi'j na jacha' che tabal tok'ob che resaxic we macaj ri' jun alaj ati't q'uisic' re jun u junab.

²⁸ Ri cojol ri tabal tok'ob cuban ri nimak'ij ri nak'atisabal chnuwäch che u rikic ri sachbal mac che u josk'ixic ri macaj ri bantajinak ri man xunabej ta we winak ri', in quinsach c'u na ri u mac.

²⁹ Xak junam cholajil cajwataj chque ri e i winakil xukuje' chque ri man e i winakil ta ri e jekel chixo'l, we ri macaj ri bantajinak man xnabex ta u banic.

³⁰ We c'u ne c'o jun winak cunabej aretak camacunic, we aj israel o man aj israel taj, cuyac woyowal. Rumal ri', we winak ri' quesax na chquixo'l ri u winakil.

³¹ Xretzelaj c'u u wäch ri nu tzij man xebutz'akatisaj ta c'ut ri e nu takanic; kas xa jumul quesaxic cukajbej c'u na ri retzelal.”

C'äjisabal wächaj rumal man u ya'ic ta u k'ij ri k'ij re uxlanem

³² Aretak ri aj israelib e c'o pa ri chaki'j uwo sak, xquirik jun achi cätajin cumol si' pa ri k'ij re uxlanibal.

³³ Ri xerikowic xquic'am bic chuwäch ri Moises xukuje' chuwäch ri Aaron, xukuje' chuwäch ronojel ri tinimit,

³⁴ ri e are' xquichajij c'ut, man chomam ta c'ut jas ri cäban che.

³⁵ Xubij c'ut ri Ajawaxel che ri Moises: “We achi ri' rajawaxic cac'okox che cämical, chbuc' che abaj cumal conojel ri aj israelib chrij ri kajebal.”

³⁶ Xepe c'ut ri aj israelib xquesaj bic chrij ri kajebal xquibuc' c'u che abaj c'ä xcäm na, je jacha' ri takanic ri u yo'm ri Ajawaxel che ri Moises.

T'orot'ak cuc' chiyichak chuchi' ri atz'iak

³⁷ Ri Ajawaxel xutzijobej ri Moises xubij c'u che:

³⁸ “Chabij wa' chque ri aj israelib: Ri ix xukuje' ri e iwija'lil rajawaxic quequic'am bic t'orot'ak cuc' tak qui chiyichic che ri u chi' ri catz'iak. Ri t'orot'ak rajawaxic e re bätz' morato.

³⁹ Jeri' aretak ri ix quebiwil ri t'orot'ak, quenataj na chiwe conojel tak ri takomal ri e nu yo'm chiwe quebitz'akatisaj c'u na, man quixc'am ta c'u na bic cumal tak ri kas e i chomanic xukuje' tak i rayinic, ri qui mac quech tak wa' ix jech'obinak chnuwäch.

⁴⁰ Jeri' quenataj na conojel tak ri e nu takomal chiwe quebitz'akatisaj c'ut, quixtastaj c'u chwe, ri in qui Dios.

⁴¹ In ri' ri Ajawaxel ri i Dios ix, ri xixesan ulok pa Ejipt rech quinux i Dios. In ri' ri Ajawaxel ri i Dios.”