Ajilanic 14 - Quiché Bible

Ri aj israelib caquic'ulelaj ri Ajawaxel

¹ Xquichaplej c'ut u rakic qui chi' ri aj israelib, xebok' c'ut pa ri chak'ab ri'.

² Conojel e are' xquichaplej qui bixic lawaloyil chrij ri Moises xukuje' ri Aaron. Je xquibij wa': “¡C'o ta banom wi xujcäm ta can pa Ejipt, o waral chupam ri chaki'j uwo sak!

³ ¿Jasche xujuc'am ulok ri Ajawaxel chupam we ulew ri'? ¿Rech cujcäm chupam ri ch'o'j, e are' c'u ri kixokil xukuje' tak ri kalc'ual quekaj pa qui k'ab ri c'ulel? ¡Are utz na chke chi chujtzelej pa Ejipt!”

⁴ Xquichaplej u bixic chquixo'l: “¡Kacojo' jun che c'amal ka be chujtzelej c'u pa Ejipt!”

⁵ Ri Moises xukuje' ri Aaron xquimej quib c'ä xquiya' na ri qui palaj cho ri ulew chuwäch ronojel ri tinimit,

⁶ are c'u ri Josue xukuje' ri Caleb, ri xepe can che retamaxic u wäch ri ulew, xquijis ri catz'iak che u c'utic ri k'oxomal

⁷ xquibij c'u chque conojel ri aj israelib: “¡Ri ulew ri xujbe che retamaxic u wäch man c'o ta c'o wi!

⁸ We ri Ajawaxel cutok'obisaj ka wäch, cujuto' na che oquem chupam we ulew ri' cuya' c'u na chke. Are jun ulew ri cäbelel wi ri leche xukuje' juyubal räx cab jacha' ri ja'.

⁹ Mixc'ulelan c'u che ri Ajawaxel, mawi mixe'j iwib chquiwäch ri winak re ri ulew ri', rumal rech chi we winak ri' quebux na ka wa; we winak ri' man c'o ta jachin ta queto'wic, are c'u ri uj c'o ri Ajawaxel kuc'. ¡Mixe'j iwib!”

¹⁰ Pune' c'u xquitatabej wa', ri winak are ta xcaj xequiban ta che abaj. Are c'ut ri u juluwem ri Ajawaxel xuc'ut rib chupam ri Lic'om Rachoch Dios re rikoj ib, chquiwäch ri aj israelib,

¹¹ xubij c'ut ri Ajawaxel che ri Moises: “¿C'ä jampa' lo cutakej na retzelaxic nu wäch we tinimit ri'? ¿C'ä jampa' lo caquitakej na u queblaxic qui c'u'x chwij, pune' ta c'u ne e nu banom mayibal chquixo'l?

¹² Quintak na ulok jun cämisanel yabil paquiwi' che qui k'atixic rech man queboc ta che rechbexic we ulew ri'; chawe c'u at quinban c'u na jun tinimit ri nim na xukuje' c'o na u chuk'ab chquiwäch e are'.”

¹³ Ri Moises xutzelej u bixic che ri Ajawaxel: “Lal ruc' ri cuinem la, xesaj la ulok pa Ejipt we tinimit ri'. Aretak ri aj Ejipt chquetamaj ri quebana' la,

¹⁴ quequitzijoj na chque ri winak ri e c'o pa Canaan. Xukuje' ri e are' quitom u bixic chi ri lal, Ajawaxel, lal c'o pa u niq'uiajil we tinimit ri', cac'ut c'u ib la chwinakil chquiwäch are c'u ri sutz' la c'o paquiwi', are c'u ri pa k'ij canabej la chquiwäch pa jutac'aj sutz' xukuje' ri chak'ab pa jutac'aj k'ak'.

¹⁵ We quecämisaj la we tinimit jacha' ri u cämisaxic xa jun winak, ri nimak tak tinimit ri queta'm chi nim u k'ij ri tzijol la quequibij na:

¹⁶ ‘Ri Ajawaxel man xcuin ta che u banic chi we tinimit ri' xoc ta chupam ri ulew ri u banom ri chi'nic ri kas cäban na chi cuya' na chque, rumal c'u ri' xebucämisaj chupam ri chaki'j uwo sak.’

¹⁷ Rumal c'u ri', Ajawaxel, c'utu' la camic ri nimalaj cuinem la, je jas ri chi'nic

¹⁸ ri banom la. Lal bim la chi man chanim ta coyowar la, chi sibalaj nim ri lok'ok'ebal c'u'x la chi cäsach la macaj che ri etzelal xukuje' ri man nimanic taj, pune' c'u ne man cäya' ta la can ri ajchak'mac chi ma ta cäc'äjisaj la u wäch, xane' cäc'äjisaj la u wäch ri quetzelal ri tataxelab paquiwi' ri alc'ualaxelab, ri i' takmam, ri xiquin tak mam xukuje' ri e calc'ual ri xiquin tak mam.

¹⁹ Rumal c'u rech chi ri lok'ok'ebal c'u'x la sibalaj nim, sacha' la u mac we tinimit ri' che ri retzelal ri u banom, e coch'om c'u ya' la ulok kas pa Ejipt c'ä pa we c'olbal ri'.”

Ri Ajawaxel cuc'äjisaj qui wäch ri aj israelib

²⁰ Ri Ajawaxel xutzelej u bixic: “Utz ri', in quinsach qui mac, je jacha' ri a tz'onon chwe.

²¹ Je c'u wa', chi sibalaj kastzij jacha' ri in in c'aslic xukuje' chi ri nu juluwem u nojisam ronojel ri uwächulew,

²² man c'o ta jun chque ri quilom ri nu juluwem xukuje' tak ri mayibal ri xebenban pa Ejipt xukuje' pa ri chaki'j uwo sak, in qui c'ambejem c'u ne q'ui mul pa ri chaki'j uwo sak man quiyo'm ta c'u qui tzij che qui nimaxic tak ri takanic ri e nu yo'm,

²³ man c'o ta jun chque querila' ta na u wäch ri ulew ri xinchi'j chque ri e qui mam. Man c'o ta jun chque ri man nim ta in quilom cäquil ta na u wäch.

²⁴ Xuwi ri pataninel wech Caleb c'o jun ruxlabal ri jalanic nimaninak c'u chwe ruc' jiquil. Rumal c'u rech wa' ri are' quinya' che chi coc chupam ri ulew ri xbe che retamaxic u wäch, xukuje' ri e rija'lil quejeki' na chila'.

²⁵ (Ri aj amalesib xukuje' ri aj cananeyib e jekel pa ri lianic.) Are c'u ri ix, chixtzelej pa iwakan chwek chitakej i be pa ri chaki'j uwo sak chusuq'uil ri Quiäk Plo.”

²⁶ Ri Ajawaxel xutzijobej ri Moises rachil ri Aaron, xubij c'u chque:

²⁷ “¿C'ä jampa' lo ri quintakej na qui coch'ic ri qui ch'ach'atem we itzel tak aj israelib ri'? Xetataj wumal chi itzel quech'aw chwij.

²⁸ Jät jabij chque chi jewa' quinbij: “In, ri Ajawaxel quinban ri kas chi'nic ri kas cäban na rumal ri nu c'aslemal chi quinbana' na chi chic'ulmaj ix je jas ri nu tom ri i bim.

²⁹ Conojel ri c'o chic juwinak qui junab ri xtz'ibax qui bi' pa ri ajilanic ri lawalo e ch'awinak chwij, quecäm na, queroki' c'u can chupam we chaki'j uwo sak ri'.

³⁰ Xuwi coc ri Caleb rachil ri Josue, man c'o ta jun chiwe coc ta na pa ri ulew ri ruc' ronojel wanima' xinchi'j chiwe chi quixinjekeba' wi na.

³¹ E are' tak c'ut ri e iwalc'ual, ri xebibij chi quekaj na pa qui k'ab ri e i c'ulel, quebenc'am na u bic pa ri ulew ri iwetzelam u wäch, e are' c'u querikow na ri utzil ri c'o chupam.

³² Are tak quixcämic quixroki' na canok chupam tak we chaki'j uwo sak ri',

³³ ri chupam quejeki' wi na ri e calc'ual jacha' aj yuk'ab cawinak junab. Jewa' caquiban na ri e are' che u tojic ri man i jiquil taj, c'ä quixcäm na ri ix iwonojel waral chupam ri chaki'j uwo sak.

³⁴ Ri ix cawinak k'ij xixbeytaj che retamaxic u wäch ri ulew; xukuje' quixbeytaj na cawinak junab che u tojic ri c'äjisabal i wäch: jun junab che jun k'ij. Jeri' quiwetamaj na ri cac'ulmatajic rumal ri nu c'ulelaxic'.

³⁵ In, ri Ajawaxel, quinjiquiba' u bixic: jewa' ri takalic ri quenbana' che we itzel tinimit ri' ri u walijisam rib chwij. Chupam we chaki'j uwo sak ri' curik wi na ri u sachisaxic u wäch; waral quecäm wi na.”

Ri qui cämic ri lajuj itzel tak nic'wächinelab

^36-37 E are' tak c'ut ri achijab ri xebutak bic ri Moises che retamaxic u wäch ri ulew ri aretak c'u xetzelej ulok xel quiya' itzel tzijol, xquiban c'ut chi ri winak xec'ulelanic, ri Ajawaxel xuban chque chi xak c'ätetal xecämic.

³⁸ Chque conojel wa', xuwi ri Josue rachil ri Caleb xec'asi' canok.

Ri aj israelib xech'äcataj pa Horm

³⁹ Aretak ri Moises xuya' u bixic chque ri aj israelib ri u yo'm u bixic ri Ajawaxel, conojel sibalaj xebisonic.

⁴⁰ Chusakaribal ri ucab k'ij ak'ab xewalijic, xepaki' puwi' ri ulew ri naj elinak ri nojinak che c'ache'laj xquibij c'ut: “¡Uj c'o chic waral! Jo' pa ri c'olbal ri u chi'm ri Ajawaxel chke, kastzij uj macuninak.”

⁴¹ Xubij c'u ri Moises chque: “¿Jasche man quebinimaj ta ri e u takanic ri Ajawaxel? ¡Ri qui chomaj u banic xa tzakmajic quel wi na!

⁴² Mi takej i be, man c'o ta c'ut ri Ajawaxel iwuc'. Quixch'äctaj na cumal ri e i c'ulel.

⁴³ Je la' apanok chiwe quixqueyej ri aj amalesib xukuje' ri aj cananeyib, che u banic ch'o'j iwuc' quixquicämisaj c'u na. Rumal c'u rech chi i xutum can ri Ajawaxel, ri are' man c'o ta chic iwuc'.”

⁴⁴ Ri e are', xquicoj c'u na qui chuk'ab, xepaki' puwi' ri ulew ri nojinak che c'ache'laj; mawi c'u ne ri caxa re ri u c'ulwächinic ri Ajawaxel mawi ri Moises xeslabetaj pa ri kajebal.

⁴⁵ Xebel c'u ulok ri aj amalesib xukuje' ri aj cananeyib ri e jekel chupam ri ulew ri', xecokataj c'ut ri aj israelib c'ä pa Horm, xech'äcataj c'u cumal.