Ajilanic 13 - Quiché Bible

Ri Moises xebutak bic nic'wächinelab pa Canaan

¹ Ri Ajawaxel xutzijobej ri Moises xubij c'u che':

² “Chebataka' bic jujun achijab che retamaxic u wäch ri ulew re Canaan, ri quenya' chque ri aj israelib. Chataka' bic jun achi re jujun amak' ri c'o u takanic.”

³ Jacha' ri takanic ri xuya' ri Ajawaxel che, ri Moises xebutak bic kas aretak e c'o chupam ri chaki'j uwo sak ri c'o pa Paran. Conojel e achijab ri c'o qui takanic chquixo'l ri aj israelib,

⁴ e are' tak c'u wa': ri Samu re ri ramak' ri Ruben (ri u tat ri Samu are' ri Zacur);

⁵ ri Sapat re ri ramak' ri Simeon (ri u tat ri Sapat are' ri Hori);

⁶ ri Caleb re ri ramak' ri Juda (ri u tat ri Caleb are' ri Jepon);

⁷ ri Igal re ri ramak' ri Isacar (ri u tat ri Igal are ri Jose);

⁸ ri Osey re ri ramak' ri Eprain (ri u tat ri Osey are' ri Nun);

⁹ ri Palt re ri ramak' ri Benjamin (ri u tat ri Palt are' ri Rapu);

¹⁰ ri Gadiel re ri ramak' ri Zabulon (ri u tat ri Gadiel are' ri Sod);

¹¹ ri Gadi, re ri ramak' ri Jose, ri u bixic wa', ri ramak' ri Manases (ri u tat ri Gadi are' ri Susi);

¹² ri Amiel re ri ramak' ri Dan (ri u tat ri Amiel are' ri Jemal);

¹³ ri Setur re ri ramak' ri Aser (ri u tat ri Setur are' ri Micael);

¹⁴ ri Nabi re ri ramak' ri Neptali (ri u tat ri Nabi are' ri Bapsi);

¹⁵ ri Jeuel re ri ramak' ri Gad (ri u tat ri Jeuel are' ri Maqui).

¹⁶ E are' qui bi' wa' ri achijab ri xebutak bic ri Moises che retamaxic u wäch ri ulew. Ri Osey (u c'ojol ri Nun) xuq'uex ri u bi' xucoj c'u Josue che u bi'.

¹⁷ Xebutak c'u bic ri Moises che retamaxic u wäch ri ulew re Canaan, xubij c'u bic chque: “Jix pa ri Negueb chixpakal bic pa ri ulew ri c'o wi c'ächelaj.

¹⁸ Chica'yej c'ut jas u bantajic ri ulew, we e co ri winak ri e jekel chupam o e tukarib we xa e quieb oxib o e q'ui.

¹⁹ Chebiwila' we tak ri qui tinimit xa e cäbal ri lic'om o e co e tiq'uibam, xukuje' we utz ri ulew ri e jekel wi o man utz taj,

²⁰ awächinel o man wächinel taj, xukuje' we e c'o che' chuwäch o jayi'. Mixe'j iwib; chebic'ama' ulok jun tak qui wächinic ri ulew.” Xc'ulmataj c'u wa' pa ri k'ijol aretak queyac ri nabe tak uva.

²¹ Ri achijab xebe che retamaxic u wäch ri ulew xchaptaj bic kas pa ri chaki'j uwo sak re Zin, pa ri u mox k'ab ri relebal k'ij, c'ä pa Rehob, pa ri riquiak'ab ri relebal k'ij, chuchi' ri oquibal chupam ri Hamat.

²² Xebocbic pa ri Negueb xebopan c'u pa Hebron. Chila' e jekel wi ri Ahiman, ri Sesay xukuje' ri Talmay, e rija'lil ri Anac. Wukub junab yacom chic ri Hebron aretak xyac ri Zoan pa Ejipt.

²³ Xebopan c'ä pa ri alaj nima' ri c'o pa Escol, xquik'up jun u k'ab juwi' uva ri e c'o tak uva che, e quieb c'u xec'amow ulok xquitzayiba' ulok chrij jun che'. Xukuje' xequich'up crabaj xukuje' higo.

²⁴ We alaj nima' ri' xquicoj Escol che u bi', rumal ri tzayaj ri xquich'up ri aj israelib chi'.

²⁵ Aretak etamatajinak chic u wäch ri ulew cumal pa cawinak k'ij,

²⁶ xetzelej pa Cades, chupam ri chaki'j uwo sak re Paran. Chila' c'o wi ri Moises, ri Aaron xukuje' conojel ri aj israelib. Xquitzijoj c'u chque ri xequila' ri xequita' xequic'ut c'ut ri u wächinic ri ulew chquiwäch.

²⁷ Xquibij che ri Moises: “Xujbe pa ri ulew ri xujatak wi bic. Kastzij are jun ulew jawije' ri cäbelel wi ri leche xukuje' juyubal räx cab jacha' ri ja', e are tak wächinic wa' ri cuya'.

²⁸ Are c'u ri winak ri e jekel chila' sibalaj e cowilaj tak winak, ri tak tinimit sibalaj e nimak xukuje' sibalaj co qui banic e banom. Man xuwi ta c'u wa', xekil c'u ne ri e rija'lil ri Anac ri jutac'ajalaj achi.

²⁹ Chupam ri ulew Negueb e jekel wi ri aj amalesib, chupam ri c'ache'laj ulew e jekel wi ri aj hititib, ri aj jebuseyib xukuje' ri aj amoreyib, pa u xcut c'ut ri plo chunakaj ri nima' Jordan e jekel wi ri aj cananeyib.”

³⁰ Are c'u ri Caleb xquitz'apij u pa qui chi' ri winak ri e c'o chuwäch ri Moises, xubij c'ut: “¡Cujbe ba' che u ch'äquic we ulew ri'! ¡Uj cujcuin na che u ch'äquic!”

³¹ E are' tak c'ut ri xebe can ruc' xquitzelej u bixic: “¡Jayi', man cujcuinta che qui ch'äquic tak we winak ri'! Ri e are' sibalaj c'o na qui chuk'ab chkawäch uj.”

³² Xquichaplej c'u u bixic chque ri aj israelib chi ri ulew ri xebe che retamaxic u wäch sibalaj lawalo. Xecha': “Ri ulew ri xujbe che retamaxic u wäch quebucämisaj tak ri winak ri e jekel chila', conojel c'ut ri achijab ri xekil chila' sibalaj e nimak.

³³ Xekil xukuje' e nimak achijab ri sibalaj nimak cak'an, ri e rija'lil ri Anac. Pa qui xcut c'ut ri e are' cäkana' kib chi uj je ta ne xa sac' je c'u cujquil ri e are' xukuje'.”