Ajilanic 12 - Quiché Bible

Ri Mariy xukuje' ri Aaron xech'ach'at chrij ri Moises

¹ Ri Mariy xukuje' ri Aaron xquichaplej u yok'ic ri Moises, rumal rech chi xc'uli' wa' ruc' jun ixok k'ek'.

² Xquibij chi c'ut xukuje': “Ri Ajawaxel man xuwi ta ruc' ri Moises tzijoninak wi, xukuje' tzijoninak kuc'.” Xuta' c'ut ri Ajawaxel.

³ Kas c'u ne kastzij, ri Moises are' ri achi ri sibalaj mach'al na cho ri uwächulew.

⁴ Rumal ri' ri Ajawaxel xubij che ri Moises, ri Aaron xukuje' ri Mariy: “Jix ix iwoxichal chupam ri Lic'om Rachoch Dios re rikoj ib.” Coxichal xebe chla'.

⁵ Xkaj c'u ulok ri Ajawaxel chupam jun tzatzalaj sutz' xuya' c'u rib chuchi' ri oquibal chupam ri Lic'om Rachoch Dios; xusiq'uij c'ut ri Aaron xukuje' ri Mariy, aretak c'ut xequitac'aba' quib,

⁶ ri Ajawaxel xubij chque: “Chitatabej wa' ri quinbij chiwe: Aretak c'o jun k'axal tzij chixo'l wumal in, in quink'alajisaj wib chuwäch pa tak c'utwächinic xukuje' quinch'abej pa tak ichic';

⁷ ruc' c'ut ri pataninel wech ri Moises man je ta quiban wa'. Are' ri sibalaj jic na chquiwäch conojel ri e nu pataninelab,

⁸ ruc' c'ut ri are' quinch'aw chwinakil xukuje' pa jun ch'abal ri q'uiakalic. We c'u ri are' quinuca'yej chi winakil, ¿jasche qui chajij anima' quixyok'on che?”

⁹ Ri Ajawaxel sibalaj xoyowar cuc', xbe c'ut.

¹⁰ Xuwi c'u xnajtin ri sutz' che ri Lic'om Rachoch Dios, ri Mariy xnoj che chuwilaj ch'a'c, xsakniquinob ri u tz'umal. Aretak ri Aaron xutzalc'atij rib che rilic ri Mariy, xril c'ut chi nojinak che chuwilaj ch'a'c,

¹¹ xubij che ri Moises: “Bana' la tok'ob, wajaw, mäc'äjisaj la ka wäch u mac we macaj ri' ri kas ka banom.

¹² Mäya' la c'olbal chi ri are' cäcanaj jacha' jun cäminak ac'al ri maja' quil u wäch, ri quel ulok ruc' jun u tz'umal ri chukchubinak.”

¹³ Are c'u ri Moises xtz'onon che ri Ajawaxel: “Bana' la tok'ob, oh Dios quinbochi'n che la chi chcunaj la.”

¹⁴ Ri Ajawaxel xutzelej u bixic che: “We ta ri u tat xuchubej ta chupalaj, quesax na u q'uixbal wukub k'ij. Chiwesaj ba na bic wukub k'ij chrij ri kajebal, c'äte c'u ri' cuya' cätzelej ulok.”

¹⁵ Rumal c'u ri' ri Mariy xesax na bic wukub k'ij chrij ri kajebal. Man slab ta c'u na ri tinimit chila'.

¹⁶ Xuwi c'u xurik chi rib ri Mariy cuc', xquitakej qui be xebel bic kas pa Hazerot, xebekaj c'ut chupam ri chaki'j uwo sak pa Paran.