Ajilanic 11 - Quiché Bible

Ri Ajawaxel cuchi'j ti'j chque ri aj israelib

¹ C'o jun k'ij ri aj israelib xech'ach'at chrij ri Ajawaxel qui mac quech tak ri c'axc'olil ri quequiriko. Aretak xetataj rumal, ri Ajawaxel sibalaj xoyowaric, xutak c'u ulok jun k'ak' ri xunicowisaj rij ri e jekel wi.

² Ri tinimit xurak u chi' xutz'onoj to'banic che ri Moises, ri Moises xubochi'j c'ut ri Ajawaxel che wa'. Xchup c'ut ri k'ak'.

³ Rumal ri' xcoj Taber che u bi' we c'olbal ri', rumal chi chila' xnicow wi ri u k'ak' ri Ajawaxel che qui xibixic.

⁴ Chquixo'l ri aj israelib e qui yujum quib ronojel qui wäch winak, ri xak xuwi' caquichomaj ri wa'im. Xquiban c'u quech ri aj israelib cuc', xeboc c'u che ok'ej je c'u xquibij wa': “¡C'o ta banom wi c'o ta ti'j chke che u tijic!

⁵ ¡Quenataj c'u ne ri car chke ri xak quekacochi'j ri quekatij pa Ejipt! Xukuje' quekatij c'ut pepin, melon, alaj seboy, xanacat xukuje' axux.

⁶ Are c'u ri camic cätajin cujcäm che wija'l, man c'o ta chic jun jasach quilic xak xuwi ri jaswa'.”

⁷ (Ri jaswa' cäjunamataj ruc' ri u wäch culanto; k'ank'oj rilic jacha' ri cäpe k'ol,

⁸ junam c'u u na'il ruc' ri caxlanwa ri cäya' aseit ruc'. Ri winak quebel bic che u molic, cäquiquiej c'ut o caquiwech' pa wech'ebal, caquiban che riquil o caquiban che caxlanwa.

⁹ Chak'ab, aretak cakaj ri räxk'ab puwi' ri ulew, cakaj xukuje' ri jaswa'.)

¹⁰ Ri Moises xuta' u tzijol chi ri aj israelib xukuje' ri cachalaxic quebok' chuchi' tak ri qui cäbal ri lic'om. Ri Ajawaxel sibalaj oyowarinak. Xukuje' c'ut ri Moises xyojtajic,

¹¹ xubij c'u che ri Ajawaxel: “¿Jasche cäban la c'ax chwe in, in c'u ya' pataninel ech la? ¿Jas ri c'ax ri cäna' la chwij chi yo'm la we tinimit ri' che weklem?

¹² ¿La xa ta pune' in ta u tat o u nan rech cätz'onoj la chwe chi queben k'alula' bic e jacha' ta ne ac'alab ri c'ä quetu'n cho u c'u'x ri qui nan, c'ä pa ri ulew ri xchi'j la chque ri e qui mam?

¹³ ¿Jawije' ta lo quebenc'ama' wi ti'j che u ya'ic qui ti' we winak ri'? Quebok'ic quepe che u bixic chwe: ‘Chaya' ti'j chke che u tijic.’

¹⁴ Ri in nu tuquiel man quincuin ta chic quintakej ta u c'amic bic ronojel we tinimit ri'; are jun eka'n ri sibalaj al na chwe in.

¹⁵ We je cätakej la u banic wa' chwe, are utz na chi quesaj la ri nu c'aslemal, we kastzij chi nim quinil wi la. Jeri' quinel na chquixo'l e q'ui tak latz'.”

¹⁶ Are c'u ri Ajawaxel xutzelej u bixic chwe: “Chebamulij oxc'al lajuj nimak tak tatayib aj israelib, ri e aweta'm qui wäch chi c'o qui takanic chquixo'l ri winak, chebac'ama' c'u ulok chupam ri Lic'om Rachoch Dios re rikoj ib che eyem c'u chila' awuc'.

¹⁷ In quinkaj na bic quinch'aw c'u na awuc' chila', quinc'am c'u na niq'uiaj ri uxlabal ri c'o awuc' quinya' c'u na chque rech catquito' che u c'amic bic we tinimit ri'. Jeri' man xak ta a tuquiel catc'ojic.

¹⁸ Chataka' c'u ri tinimit chi chuch'ajch'ojisaj rib re chwek, caquitij c'u na ti'j. Xetataj wumal chi quebok'ic caquibij c'ut: ‘¡C'o ta banom wi c'o ta ti'j chke che u tijic! ¡Utz ka banom can nabe pa Ejipt!’ Quenya' c'u na ti'j chque rech caquitijo,

¹⁹ man xa ta c'u jun k'ij o quieb, mawi job o lajuj o juwinak k'ij. Jayi'.

²⁰ Jun ic' cäbeytaj na u tijic ri ti'j cumal, c'ä quebel na ulok pa tak qui tza'm chuya' c'u muluj c'uxaj chque, rumal rech chi in qui xutum in, ri Ajawaxel, ri in c'o pa qui niq'uiajil, e ok'inak quibim c'ut chnuwäch in: ‘¿Jasche xujel ulok pa Ejipt?’ ”

²¹ Xutzelej c'ut u bixic ri Moises: “Ri winak ri e petinak wuc' e wakib sient mil (600,000) achijab ri e tac'al puwi' ri cakan, ¿la cäbij c'u la chi cäya' la ti'j chke chi cakatij ti'j ronojel ri jun ic'?

²² ¿Jawije' ta lo e c'o wi chij ri man e ajilatal ta xukuje' wacax ri cuya' taj quepilic ri chubana' ta chque conojel? Pune' ta c'u ne quekaya' ta conojel ri car chque ri e c'o chupam ri plo, man cubana' ta wa' chque.”

²³ Are c'u ri Ajawaxel xutzelej u bixic che: “¿La are' pa a c'u'x chi sibalaj ch'utin ri nu cuinem? Camic cawila' na we quetz'akatok o jayi' ri nu bim.”

Oxc'al lajuj nimak tak tatayib cäquik'axej u tzij ri Dios

²⁴ Ri Moises xel bic xbe che u bixic che ri tinimit ri u bim ri Ajawaxel che, xebumulij c'u oxc'al lajuj nimak tak tatayib aj israelib xebucholajij c'u chrij ri Lic'om Rachoch Dios.

²⁵ Xkaj c'u ulok ri Ajawaxel pa ri sutz' xch'aw c'u ruc' ri Moises; xuc'am c'u niq'uiaj ri uxlabal ri c'o ruc' ri Moises xuya' c'u chque ri oxc'al lajuj nimak tak tatayib. Xak xuwi c'u xjeki' ri uxlabal paquiwi' xquichaplej u k'axexic u tzij ri Dios; man xban ta chi c'u jumul wa'.

²⁶ Quieb achijab, ri jun Eldad u bi' ri jun chic Medad, ri e are' juch'ob chque ri oxc'al lajuj (70), ri man xebe ta chupam ri Lic'om Rachoch Dios xane' xecanaj can chupam ri kajebal. Xukuje' c'u ne ri e are' xkaj ri uxlabal paquiwi' xquichaplej c'u tzijonem e jacha' e k'axal tzij chupam ri kajebal.

²⁷ Caxiq'uin c'u jun ala xbe che u bixic che ri Moises: “¡Ri Eldad xukuje' ri Medad cätajin caquik'axej tzij chupam ri kajebal!”

²⁸ Are' c'u ri Josue (u c'ojol ri Nun) ri pa ri u c'ojolal are' to'l rech ri Moises, xubij: “¡Wajaw, Moises, chek'ila' la maquitakej u banic!”

²⁹ Are c'u ri Moises xutzelej u bixic che: “¿La catachixoman chwe? ¡C'o ta banom wi chi ri Ajawaxel cuya' ta ri ruxlabal che ronojel ri u tinimit, conojel ta c'ut e k'axal tak u tzij ri Dios!”

³⁰ Ri Moises xukuje' ri nimak tak tatayib aj israelib xetzelej chupam ri kajebal.

Ri Ajawaxel quebutak ulok sakco'r

³¹ Ri Ajawaxel xubano chi xwalij ulok jun quiakik' puwi' ri plo ri xebuc'am ulok jumulaj sakco'r, ri xebetzak chupam ri kajebal xukuje' tak chrij, ri xquilatz'obej jun k'ij be chrij ri kajebal, ri cäliq'uiq'uic' craj niq'uiaj xc'ab u pimal.

³² Ronojel ri jun k'ij ri' xukuje' ronojel ri jun ak'ab xukuje' ronojel ri ucab k'ij ri winak xebe qui mulij sakco'r. Ri man nim ta xumulij, xumulij lajuj mulaj sakco'r, ri xequichaki'jarisaj chrij ri kajebal.

³³ C'ä cätajin c'u ne caquiba' ri aj israelib ri qui ti'jal ri sakco'r, aretak xpe ri royowal ri Ajawaxel paquiwi' xuc'äjisaj c'u qui wäch, xuban c'ut chixecäm q'uialaj winak.

³⁴ Rumal ri' xcoj Kibrot-hataab che u bi' we c'olbal ri', chila' c'u xemuk wi ri xak xuwi caquichomaj wa'im.

³⁵ Pa Kibrot-hataab xutakej wi bic ri u be ri tinimit c'ä xopan na pa Hazerot, chila' c'u xcanaj wi.