Ajilanic 10 - Quiché Bible

Ri trompet tak ri e re sak puak

¹ Ri Ajawaxel xutzijobej ri Moises xubij c'u che:

² “Chabana' quieb trompet e sak puak ri e colomam ruc' bajibal, ri quebajwataj chawe che qui mulixic ri winak xukuje' che u ya'ic ri etal che u takexic ri qui be.

³ Aretak quebok'isax ri quieb trompet, ronojel ri tinimit rajawaxic cumulij na rib chawäch, chuchi' ri oquibal chupam ri Lic'om Rachoch Dios re rikoj ib ruc' ri Dios.

⁴ Aretak c'u xa jun cok'isaxic, xuwi caquimulij na quib ri e c'amal tak qui be ri amak' ri nimak qui k'ij.

⁵ Aretak ri rok'ibal ri trompet quecachilaj cowilaj tak rakoj chi'aj, caquitakej na qui be ri e kajinak pa ri elebal k'ij,

⁶ pa ri ucab ok'ibal caquitakej na qui be ri e kajinak pa ri u mox elebal k'ij. Ri cok'ibal tak ri trompet ri e achilatal cumal rakoj tak chi'aj are etal che ri benam.

⁷ Ri xak ok'ebal re trompet are etal rech caquimulij quib ri winak.

⁸ Ri quebok'isan tak ri trompet e are' ri cojol tabal tok'ob, ri e rija'lil ri Aaron. Are jun pixab wa' ri cajeki' canok.

⁹ Aretak cawalij ulok jun c'ulel che u banic ch'o'j iwuc' chupam ri kas iwulew quixel c'u na bic che u banic ch'o'j, chebiwok'isaj ri trompet chebirakakej tak i chi'. Jeri' ri in ri Ajawaxel ri i Dios, quixnataj na chwe quixinto'tajisaj c'u na pa qui k'ab ri e i c'ulel.

¹⁰ Chebiwok'isaj ri trompet pa tak ri k'ij re quicotemal, jacha' pa tak ri k'ij re nimak'ij o re c'ac' ic', aretak quebichi'j tabal tak tok'ob ri quechajirisaxic xukuje' tabal tak tok'ob re utzirisan ib. Jeri' ri in quixnataj na chwe. In ri' ri Ajawaxel ri i Dios.”

Ri aj israelib quebel bic pa Sinai

¹¹ Pa ri juwinak rajilabal ri ucab ic' rech ri ucab junab, xwalij ri sutz' puwi' ri k'ijilabal re ri c'ulwächinic.

¹² Ri aj israelib xquitakej qui be xebel bic chupam ri chaki'j uwo sak re Sinai. Ri sutz' xetok'ol chupam ri chaki'j uwo sak re Paran.

¹³ Jacha' ri takanic ri xuya' ri Ajawaxel rumal ri Moises,

¹⁴ ri xec'amow be e are' ri ajch'ojab ri e c'o chuxe' ri retal ri Juda, ri are' c'o ri Naason che c'amal qui be (ri u tat ri Naason are' ri Aminadab).

¹⁵ Ri c'amowinak qui be ri rajch'ojab ri ramak' ri Isacar are' ri Natanael (ri u tat ri Natanael are' ri Zuar).

¹⁶ Ri c'amowinak qui be ri rajch'ojab ri ramak' ri Zabulon are' ri Eliab (ri u tat ri Eliab are' ri Helon).

¹⁷ Xquitur c'ut ri k'ijilabal, e are' tak c'ut ri e rija'lil ri Jerson xukuje' ri Merar, ri are' quekle'n ri u c'amic bic xquitakej qui be.

¹⁸ E benak chi c'ut ri ajch'ojab ri quebin chuxe' ri retal ri Ruben, ri are' c'o ri Elisur che c'amal qui be (ri u tat ri Elisur are' ri Sedeur).

¹⁹ Ri rajch'ojab ri ramak' ri Simeon are' ri Selumiel (ri u tat ri Selumiel are' ri Zurisaday).

²⁰ Ri c'amowinak qui be ri rajch'ojab ri ramak' ri Gad are' ri Eliasap (ri u tat ri Eliasap are' ri Reuel).

²¹ E benak chi c'ut ri e rija'lil ri Coat, ri e uc'aninak tak ri tastalicalaj tak chaconisan. Aretak c'u quebopanic, quequirika' chi ri k'ijilabal woctajinak chi apanok.

²² E are' chi c'u e benak ri ajch'ojab ri quebin chuxe' ri retal ri Eprain, are' c'u quicojom ri Elisam che c'amal qui be (ri u tat ri Elisam are' ri Amihud).

²³ Ri c'amowinak qui be ri rajch'ojab ri ramak' ri Manases are' ri Gamaliel (ri u tat ri Gamaliel are' ri Pedasur).

²⁴ Ri c'amowinak qui be ri rajch'ojab ri ramak' ri Benjamin are ri Abidan (Ri u tat ri Abidan are' ri Jedeoniy).

²⁵ Che ri q'uisbabalil, chquij ri niq'uiaj ajch'ojab chic, xetaken ri quebin chuxe' ri retal ri Dan, ri are' c'u c'o ri Ahiezer che c'amal qui be (ri u tat ri Ahiezer are' ri Amisaday).

²⁶ Ri c'amowinak qui be ri rajch'ojab ri ramak' ri Aser are' c'o ri Pajiel (ri u tat ri Pajiel are' ri Ocran).

²⁷ Ri c'amowinak qui be ri rajch'ojab ri ramak' ri Neptali are' ri Ahir (ri u tat ri Ahir are' ri Enan).

²⁸ Are cholajil wa' ri caquitakej u banic ri ajch'ojab aj israelib aretak caquimajij ri qui be.

Ri Moises carulaj ri u baluc che u bic cuc'

²⁹ Ri u tat ri Hobab are' ri Reuel aj Madian. C'o jun k'ij ri Moises xubij che ri baluc Hobab: “Ri uj cujbe pa ri ulew ri u chi'm ri Ajawaxel chi cuya' chke. Tasaj kuc' cakaban c'u na utzil chawe, ri Ajawaxel u chi'm chi cuban na utzil che ri Israel.”

³⁰ Xutzelej c'u u bixic ri Hobab che: “Jayi' in are utz na chwe chi quintzelej pa ri wulew, jawije' e c'o wi tak ri e wachalaxic.”

³¹ “Man catbe taj,” xcha' ri Moises. “At kas e aweta'm tak ri c'olbal ri cuya' cäban wi kajem pa ri chaki'j uwo sak, cuya' c'ut catajwataj che c'amal ka be.

³² We catpe kuc', cakaya' na awe ri utzil ri cuya' na ri Ajawaxel chke.”

³³ Je c'u ri' xebel bic chupam ri u juyub ri Ajawaxel oxib k'ij c'ut xebinic. Ri u caxa ri Ajawaxel re ri c'ulwächinic are ri benak nabe chquiwäch, cätajin cutzucuj jun c'olbal chque ri caban wi uxlanem.

³⁴ Pa k'ij, xak alicha' quebin jubik', ri u sutz' ri Ajawaxel benak paquiwi'.

³⁵ Aretak cuchaplej binem ri caxa, ri Moises je cubij wa: “¡Walij la Ajawaxel! ¡Chquijabuj ta quib ri caquiban qui c'ulel che la! ¡Aretak chäca'yex la cumal chebanimaj u bic tak ri itzel quil la cumal!”

³⁶ Aretak c'u cätaq'ui' ri caxa je cubij wa' ri Moises: “¡Chatzelej la camic, Ajawaxel, cuc' ri rajch'ojab re Israel! Ri man e ajilatal taj.”