3 Juan 1 - Quiché Bible

Ri Xuan Cuya' u K'ij Ri Gay

¹ In wa' in ri'j tata', quintz'ibaj we wuj ri' che ri lok'alaj wachil Gay, ri kas quinlok'ok'ej.

² Lok'alaj wachalal, quintz'onoj che ri Dios chi kas ta utz chatel na pa ronojel ri cabano, xukuje' quinrayij chi catriktajic chi utz a wäch, je jas ri a c'aslibal utz c'o ruc' ri Dios.

³ Sibalaj xinquicotic aretak xepe ri kachalal, xquibij c'u chwe jas ri xquil chrij ri a c'aslemal, chi cätbin jic pa ri kastzij.

⁴ Sibalaj quinquicotic aretak quinto chi ri e walc'ual e jekel pa ri kastzij. Man c'o ta chi jun nu quicotemal chuwäch wa'.

⁵ Lok'alaj wachalal, jicalaj chac cätajin cabano aretak quebapatanij ri e kachalal, xukuje' kas c'u are' na caban chque ri kachalal ri man e a winakil taj.

⁶ Ri e are' xquibij chque ri e re ri comon cojonelab jas ri xquilo, chi ri at c'o lok'ok'ebal a c'u'x. We c'u quebato' che ri qui be jas ri cäkaj chuwäch ri Dios, utz cabano.

⁷ Ri e are' pa ri u bi' ri Jesucrist e benak. Man c'o ta c'u jas xquic'am chque ri man e cojonelab taj.

⁸ Chekac'amowaj ba ri cojonelab ri jewa' cäquibano chujoc il chque je c'u ri' quekato' che u tzijoxic ri kastzij.

Ri itzelalaj u no'j ri Diotrepes

⁹ Xintz'ibaj bic chque ri e rech ri comon cojonelab. Are c'u ri Diotrepes, ri cäraj cux nim u k'ij chquixo'l, man cujuc'amowaj taj.

¹⁰ Rumal ri', we quinbe iwuc', quinnataj na che ronojel ri cätajin cubano, xak cuban tzij chkij xukuje' cubij tak tzij re etzelal chke. Man xuwi ta c'u wa', man quebuc'ulaj ta ri achalaxelab ri quebopanic, jachin tak c'ut ri cäcaj quebequic'ulaj cubij chque chi man takal ta u banic cumal, queresaj c'u bic chquixo'l ri comon cojonelab.

¹¹ Lok'alaj wachalal, maban ba awe ri etzelal, xane' chbana' ri utzilal. Apachin ri cuban utzilal, are ri' rech ri Dios. Apachin c'u ri cuban etzelal, man rilom ta u wäch ri Dios ri'.

Ri utzalaj u no'j ri Demetr

¹² Ronojel utz u tzijol ri Demetr xukuje' ne ri kastzij, cumal ri cätajin cubano. Xukuje' ri uj cäkak'alajisaj jas ri kilom, chi utz ri cubano. Ri at aweta'm chi ri cäkabij are kastzij.

Q'uisbal tak tzij

¹³ E c'o q'ui jastak ri xinwaj xebentz'ibaj ta bic chawe. Man xinwaj ta c'ut xebentz'ibaj bic chawe ruc' tinta xukuje' ruc' tz'ibabal.

¹⁴ Cu'l c'u nu c'u'x chi quinwil na a wäch chanim, cäkatzijobej c'u na kib chwinakil.

¹⁵ Chc'ol jamaril awuc'. Ri e awachil cäquiya' rutzil a wäch. Chaya' rutzil qui wäch ri kachil chquijujunal pa tak ri qui bi'.